Texts
Return to list
| edit | delete | Create a new
| Statistics
| ? Help
Masal’tsev Jyrki.
Nuoret juuret lumen alla
Source:
Oma mua. 2026. 21.10 (№ 41 (1831)). С. 3
Masal’tsev Jyrki
Nuoret juuret lumen alla
Karelian Proper
New written karelian
Šajekuun 10. päivänä Koštamukšešša vietettih luova kokouš Petroskoin Juuret-etnoklasterin kera.
Toimenpivošša oli kakši ošua: konsertti ta iänitunti. Enšin Tat’t’ana Bel’ajevan ta Zoja Mironovan Taivaz-duetti näytti oman Pekka ta Matti – kakši karjalaista yštävyä -näytelmän. Puolituntini juttu kahen nuoren vienalaisen pojan ošašta oli kerrottu musiikkišoitolla ta lauluilla: kaččojat kuultih kantelen ta ilmašoittimien šoittuo, joikuja, piirileikkijä ta paikkalisen folklorin toisie tevokšie. Šen jälkeh Tat’t’ana ta Petroskoin jouhikonšoittaja Jyrki Masal’tsev esitettih omua musiikkiohjelmua kantelella ta jouhikolla: Luatokan Karjalan perintehellisie šoittokappalehie, luatijan lauluja šekä šuomelaista polkkua.
Ennen toimenpivon toisen ošan alkamista, musikantit ta vierahat keškeyvyttih čäijyh ta pakinah, min jälkeh etnokluasterin johtaja Tat’t’ana vietti koštamukšelaisilla perintehellisen laulamisen oppitunnin. Enšin näytettih vierahilla kaikkien lauluharjotukšien pohja – henkityš- ta näkölihakšien harjotukšet, mit autetah avata omua iäntä. Šen jälkeh Tat’t’ana šelvitti, kuin šynnytäh tarvittavat iäntehet, kumpasista tulou tavallini karjalaini pakina ta laulamistapa. Tietyä lauluja on vain puoli työtä, on tärkie i oikein laulua, vet joka alovehella laulamisella on oma luonto.
– Juuret- ta Taivaz -ryhmissä myö koko vuosi opaštuma Vienan laulamista ta valmistima musiikkiohjelmie. Šentäh meijän himotti tuuvva omie työtulokšie pohjoseh, missä nämä laulut oli nauhotettu ta missä niitä vielä täh šuaten tiijetäh, šuvatah ta lauletah. Tiälä myö pakajamma rahvahan kera, emmäkä vain šuorita opaššuštehtävyä. Meijän erikoisena unelmana oli näyttyä Pekka ta Matti -näytelmän, ta tänäpiäna še onnistu. Kaiken lisäkši ihmiset lauletah meijän kera. Meilä kaikešta tärkein on kiäntyö ihmisien muistoh ta herättyä heissä oman laulun ta omien juurien tuntuo. Myö tahomma jatkua šemmosie matkoja ta ašettua yhteykšie. Ieššä emmä taho vain esittyä, ka i kaččuo toisien joukkojen töitä, löytyä kokemušta, idejoita, opaštuo toini toiselta – joka joukolla on oma ainutluatuni luova kačahuš, šano Tat’t’ana Bel’ajeva.
Kylmäh šiäh ta enšimmäiseh lumeh kaččomatta toimenpito tuli oikein lämpimäkši ta liikuttavakši. Rahvaš reagiiruičči niin, kuin järještäjät himotettihki.
– Meijän luokši Vienan Karjalah harvaseh tullah ta oikein hyvä, jotta tultih nuoret ta kerrottih kaikista näistä folklorias’s’oista. Mie iče en maha laulua yhtäkänä, no tänäpiänä himotti laulua ta himotti kuunnella, kuin rahvaš lauletah. Miula oli oikein mukava!, kerto vaikutelmistah Maikki Urbanovič.
"Juuret" pälvehtiy uušie vaštautumisie Vienan kera!
