Texts
Return to list
| edit | delete | Create a new
| Statistics
| ? Help
Uljana Maksimova (Tikkanen).
Pohjoiskanšojen etuštajat keräyvyttih festivalih
Source:
Oma mua. 2026. 21.10 (№ 41 (1831)). С. 3
Uljana Maksimova (Tikkanen)
Pohjoiskanšojen etuštajat keräyvyttih festivalih
Karelian Proper
New written karelian
Šajekuun 15.–16. päivinä Piiterissä piettih Pohjosen kanšojen kielien festivali -konferenšši. Še yhisti tietotutkimukšien tulokšie šekä kieliaktivistien ta luovien ryhmien esitykšie.
Pohjosen kanšojen kielien festivali piettih VII kertah Kanšallisukšien talošša šekä Venäjän kotišeutumusejošša. Tänä vuotena še oli omissettu Venäjän kanšojen yhtenäisyön vuuvvella šekä uuvvella pruasniekalla, Venäjän kantakanšojen kielien päivällä. Konferenššin ohjelman enšimmäini oša oli omissettu tietehellisillä tutkimukšilla. Venäjän šuurien tietokeškukšien, yliopistojen ta instituuttien tohtorit, tietoruatajat ta spesialistit šaneltih kielipolitiikan perspektiivilöistä šekä digitalimahollisukšista kielien kehittämisen hyväkši.
Talouven korkiekoulun tietotutkimuškeškukšen Sosialikulttuurisien ta etnokielien tutkimukšien keškukšen johtaja, professori, filologijan tohtori Mira Bergel’son korošti, jotta kaikin voimin pitäy kannattua kieliaktivistija.
– On tärkie, jotta lapšet tiijettäis omie kielie ta vielä on tärkie, konša aikuhiset ruvetah opaštumah muamonkielie. Juuri hyö noššetah kielien kunnivuo yhteikunnašša, šano Mira Borisovna.
Tietehellisien tutkimukšien lisäkši oli esitykšie kieliaktivistien toiminnan tulokšista ta hyövyllisistä projektiloista. Oli kerrottu hantien kielen opaššuš-šovellukšešta, nenetsien kielellä luajitušta stolapelistä, venäjän kielen šekä muamonkielien opaštamisešta lapšilla ta aikuhisilla, Pohjosen kanšojen projektien kannatukšešta, podkastien valmistamisešta ta kanšanmusiikin tutkimisešta ta kehittämiseštä.
Festivalin järještäjänä on Piiterin Jamalo-Nenetsin autonomisen alovehen etuššuš šekä Jamalo-Nenetsin autonomisen alovehen vähälukusien kantakanšojen ošašto.
– Myö yritämmä järještyä festivali niin, jotta še näyttäis kaikkie elävyä ta nykytärkietä, mitä on kielialalla nykyaikana. Kučumma kieliaktivistija, kumpaset joka päivä yritetäh lisätä muamonkielien harraštajien miäryä ta omalla esimerkillä yllytetäh šäilyttämäh muamonkielie, šano Piiterin Jamalo-Nenetsin autonomisen alovehen etumieš Aleksandr Palagin.
Lisäkši konferenššin aikana oli annettu Nasledije-kilpailun palkintoja parahista projektiloista Venäjän pohjosen Kantakanšojen kielien hyväkši. Voittajien luvettelošša on Venäjän kanšojen iänet -projekti, kumpasen aikana oli nauhotettu starinoja kantakanšojen kielillä, nuorisopodkasti, mansien kielen opaššuškirja enklannin kielellä ta toisie projektija, kumpaset šuatih rahvašta kiinnoštumah kielih ta kulttuuriloih.
