Texts
Return to list
| edit | delete | Create a new
| Statistics
| ? Help
Darja Hil’.
Vepsän kelen kursad zavodihe Petroskoiš
Source:
Kodima. 2026. № 10 (403). С. 3
Darja Hil’
Vepsän kelen kursad zavodihe Petroskoiš
Veps
New written Veps
Petroskoiš zavodihe vepsän kelen augotižkursad. Urokad vedäb mahtokaz opendai Maria Šašina, ned pidetas sobatoin 11:30 časud Karjalan rahvahiden sebruden kodiš (Petroskoi, Titovan ird, 3, 3. žir).
Kursan ühtnikoil om voimuz tundištadas vepsän kelenke, kundelta eläbad vepsän paginad, sureta sanavarad, a mugažo äjan tedištada vepsläižiden kul’turan da tradicijoiden polhe.
– Täl vodel kävuda kursile tahtoib lujas äi ristituid: augotižgruppas om 30 mest! Nece om unikaline situacii. Läz kaikuččel kursiden ühtnikal om vepsläižid jurid, no erasil ristituil niid ei ole – hö vaiše tahtoiba opeta kel’t, tedištada midä-se vepsän rahvahas. Nägen, kut kazvab melentartuz’ vepsän kel’he, i nece lujas ihastoitab mindai, – starinoiči opendai Maria Šašina.
Eriližed urokad vedetas niiden täht, ked tahtoiba jatkata vepsän kelen opendamišt da süveta ičeze tedoid. Jatktandkursad pidetas Karjalaižiden, vepsläižiden da suomalaižiden resurskeskuses (Petroskoi, Titovan ird, 3, 1. žir) ezmärgin 18:00 časud.
– Meiden urokoil kaiken oma läm’ il’mišt da hüvä mel’. Mö äjan vändam erazvuiččihe kel’vändoihe, jom čajud, starinoičem toine toižele melentartuižid starinoid. Jatktandgruppan openikoidenke meil om jo sebraližid kosketusid. Hö mugažo kävuba paginklubha, ühtneba kel’konkursoihe, kirjutaba kirjutesid "Kodima"-lehtesen täht da paksus tegesoiš vepsän rahvahan aktivistoikš, – ližadab Maria.
Opendamine om maksutoi, kävuda kursile voib kaikutte tahtnik.
