Texts
Return to list
| edit | delete | Create a new
| Statistics
| ? Help
Galina Baburova.
Anna Lisicinan kodiküläs lugetihe pjes
Source:
Kodima. 2026. № 10 (403). С. 4
Galina Baburova
Anna Lisicinan kodiküläs lugetihe pjes
Veps
New written Veps
Karjalan päzutandan päivän Kalagen Kul’turpertiš lugetihe pjes kahten Karjalan neiččen geroitegos. Lugendaha ühtniba vepsän man školiden openikad da opendajad.
Ezmäižen kerdan kirjutajan Aleksandr Ivanovan "Nece oli Karjalas"-pjes lugetihe vodel 2022 "Vepsän rahvahan tütär" -projektan aigan. Siloi lugendad mäniba Petroskoiš, Kvarcitniida Präža-küliš. Pjesan lugiba Karjalan Rahvahaližen teatran artistad i Karjalan kul’turan da taidehen kolledžan openikad. Kalagen eländtahon pämez’ Aleksandr Pol’akov uništi, miše nece pjes konz-ni oliži lugetud Sovetsikijan Sojuzan Gerojan Anna Lisicinan kodimal-ki. Täl vodel nece idei hänen tomotusen mödhe tuli eloho.
– Nece pjesan lugend erini männuzišpäi sil, miše täl kerdal Karjalan Rahvahaližen teatran artistoiden ližaks sihe ühtniba vepsläižiden küliden sijaližed eläjad. Tahtoin sanuda, miše nece om hüvä jouk. Ristitud holevas kaičeba muštod neniš tegoiš, heile om läheline pjesan tem. Kaik ozastui, kacmata sihe, miše nene ei olgoi professionaližed artistad da kenen-se täht nece oli ezmäine mahtišt lugeda än’heze äiluguižen kundliijoukun edes, – sanui azjtegon ohjandai, Karjalan arvostadud artist Aleksandra Aniskina.
Täl kerdal lugendaha ühtniba Šokšun, Šoutjärven i Kalagen školiden openikad da opendajad. Kaikutte opendai valiči lapsid ičeze školaspäi.
– Kogonaižen sügüz’kun ajelim Šoutjärvehe repeticijoile. Repeticijad mäniba kaks’ kerdad nedališ, – starinoičeb Kalagen školan pämez’ Svetlana Gotič.
Anna Lisicinan roliš oli Darja Bošakova Kalagen školaspäi. Hän om mugošt mel’t, miše openikoiden täht ühtneda lugendaha oli lujas vastusenpidäjan azjan.
– Anna Lisicinan urohontego om sur’, znamasine! Školas meile äjan starinoitas siš, – sanub Darja. – Oli jügedahk ühtneda lugendaha Anna Lisicinan roliš. Tariž oli süveneda enččehe aigaha, el’geta minun hengen tabad, tuntta hänen emocijoid da ozutada necidä kaiked kacujile. Nägin, kut kacujad itkiba lugendan aigan, a sid’ pit’kha aplodiruiba. Nacein, kaik ozastui da mäni hüvin. Lapsiden täht nece oli hüvä mahtišt. Pjesan lugendan jäl’ghe kaikiden täht oli tehtud ekskursii muzei-pertidme Anna Lisicinan muštho. Muzei oli avaitud muloi. Vodes se täuttihe uzil eksponatoil.
