Texts
Return to list
| edit | delete | Create a new
| Statistics
| ? Help
Kuznecov Maksim.
Matk Petroskoihe oli ozakaz!
Source:
Kodima. 2026. № 10 (403). С. 4
Kuznecov Maksim
Matk Petroskoihe oli ozakaz!
Veps
New written Veps
16.-18. sügüz’kud minä olin Petroskoiš. Tulin Karjalan pälidnaha ühtnemaha "Bubrihan lugendad" -tedokonferencijaha da pagižmaha vepsän kelel. Matk oli lujas produktivine!
Petroskoi om minei mel’he: nece om tün’ lidn, miččes voib lebaitas da kävelta Änižen randirdadme, söda kalitkoid da pedranlihad restoranoiš, ecta suomenkeližid laudaižid pertiš. Täl vodel minä olin Petroskoiš jo videnden kerdan da koumanden kerdan ühtnin "Bubrihan lugendad" -tedokonferencijaha.
Necen voden konferencijan tem oli "Venäman Öbokan tedoalovehidenkeskeižed gumanitarižed oppindad". Kel’tedon sekcijas erazvuiččiš lidnoišpäi tulnuded ühtnikad ezitiba ičeze dokladoid karjalan da vepsän keliš, da völ oli pagin suomen, estin, ižoran da saamen keliden polhe. Radoi völ etnografijan sekcii.
Iče starinoičin tedomehile siš, kut vepsän kirjkeles kävutadas III. infinitivan formid (oz. tehmaha, tehmas, tehmaspäi, tehmata). Kaik nened formad voib löuta grammatikan kirjoiš (erašti kirjutadas adessivan tehmal-tipižes formas-ki), no aktualižiš tekstoiš niid voib vastata harvoin – harvemba, mi suomen keles. Vepsän keles tehmaha-tipižid formid paksumba kaiked kävutadas likundverboidenke (oz. mänen magadamha). Tehmas-tipine form znamoičeb aktuališt tegendad (minä olen kirjutamas necidä tekstad ani nügüd’), no mugoine tark znamoičend om tarbhaine meile lujas-lujas harvoin. Tehmaspäi-tipižid formid kävutadas siloi, konz ližaverb andab vastust küzundaha "Mišpäi"? (tulin kalastamaspäi, väzuin radmaspäi). Grammatikan kirjoiš kirjutadas, miše sidä voib vastata kel’ta-verban-ki rindal, no paksumba siloi nägem I. infinitivad: nügüd’, nacein, kirjutadaižihe jo kel’din pagišta, a ei kel’din pagižmaspäi. Tehmata-tipine form tetas da mušttas hüvin, no sen-ki sijas voib vastata toižid konstrukcijoid.
Konferencijan aigan ei vaiše kundeltas dokladoid, no sünduba eläbad-ki kosketused. Olin hüviš meliš, miše ozastui pagišta vepsän kelen tundijoidenke – "Kodima"-lehtesen radnikoidenke, Petroskoin universitetan opendajanke Maria Košelevanke da üläopenikanke Stanislav Kustovanke. En eskai varastand nägištada konferencijal Nina Grigorjevna Zaicevad, no hänenke-ki kosketimoiš lujas hüvin. Hän sanui minei, miše hän om vaumiž toimitada minun uzid kändmižid.
Aigad kävelta Petroskoidme oli vähä, no ehtin kävuda Karjalan Dramateatraha kaks’ kerdad. Ezmäine spektakl’ – "Kain" – oli jüged kacta, a toine – "Miš mehed oma vaitti" – vastkarin, vessel, no molembad tuliba mel’he. Toivon, miše konz-ni tulen Petroskoihe völ kerdan da voin lebaitas sigä hätkemba.
