Texts
Return to list
| edit | delete | Create a new
| Statistics
| ? Help
Galina Baburova.
“Kipinä” radab lapsiden täht jo 40 vot!
Source:
Kodima. 2026. № 10 (403). С. 8
Galina Baburova
“Kipinä” radab lapsiden täht jo 40 vot!
Veps
New written Veps
Redukun 9. päiväl "Kipinä"-kulehtez praznuiči jubilejad. Praznikaline azjtego mäni "Periodika"-painištos.
Jo 40 vot "Kipinä"-kulehtez radab lapsidenke da lapsiden täht, sikš jubilejad-ki sen radnikad pätiba praznuita lapsidenke. Vaumištadihe kviz, miččel oli küzundoid Karjalan igähižiden rahvahiden kul’turiden temale. Kvizaha ühtniba lapsed Petroskoin Suomalaiž-ugrilaižes školaspäi, "Lasten piiri"- da "Vesläžed"-ansamblišpäi – kaiken oli 27 mest. Lapsid jagetihe videhe joukuhu. Ihastoiti se azj, miše kaikutte jouk andoi ičeleze nimen Karjalan rahvahaližil kelil: "Pajon loškuttajat", "Aurinkoinen", "Lasten piiri", "Veslaižed", "Suomalaiset naapurit". Lapsed surel tahtol ühtniba vändoho. Pidab sanuda, miše hö teziba oiktoid vastusid äjihe küzundoihe, sikš voibištelend oli teravan, i kaiken-se "Aurinkoinen"-jouk tegihe vägestajaks. Kacmata sihe, kaik ühtnikad saiba lahjad. Lapsed oliba ihastusiš i sanuiba, miše mugoižed vändod abutaba ei vaiše iloiteldas, no sada-ki uzid melentartuižid tedoid.
– Mö tahtoim tehta praznikan lapsile. Ved’ meiden rad om oigetud lapsihe. Mö radam ühtes erazvuiččiden školidenke. Tahtoim vahvištoitta da kaita nenid hüvid kosketusid, – starinoiči "Kipinän"-kulehtesen pätoimitai Jana Filimonkova. – Kvizan vaumištiba kulehtesen radnikad iče.
Jubileivoden "Kipinä"-kulehtesen radnikad tegiba äi melentartuižid vastusid školiden openikoidenke. Oli tehtud matkad Karjalan külihe-ki, kus opetas karjalan, vepsän da suomen kelid. Lapsiden täht pidetihe erazvuiččid mastar’-klassoid. Sen ližaks mäni jubilejale omištadud "Lugem "Kipinäd" -konkurs. Konkursaha ühtni 30 last Petroskoišpäi da toižiš Karjalan lidnoišpäi i külišpäi. Ühtnikoile tariž oli löuta melentartuižid sarnoid, starinoid vai runoid vanhoiš kulehtesen nomeroiš, lugeda niid än’heze da kuvata lugendad videole. Kanman jubilejan praznuičendad tehtihe konkursan ühthevedod. Vägestajikš tegihe 5. klassan openikad Mihail Gerčin da Jevgenii Gorkovenko Šoutjärven školaspäi (opendai om Ales’a Anušenkova). Žürijouk mugažo homaiči Vologdan agjan küliden lapsiden da vepsän kelen opendajan Ol’ga Balabanan videoid.
Mugažo jubileivoden "Kipinä" ičeze lehtpolil süvemba tundištoitab lugijoid ristituidenke, kudambad radoiba vai radaba kulehtesen hüvüdeks. Ozutesikš, vepsläižiš "Kipinän" nomeroiš jo oliba kirjutesed opendajas, tedomehes, runoilijas Ol’ga Žukovas, tetabiš taidehkuvadajiš Margarita Jufas da Lida Žukovas.
Johtutam, miše "Vepsläine kibin" -kulehtesen vepsänkeline nomer lähteškanzi vodelpäi 2011. Siš aigaspäi se paindas nel’l’ kerdad vodes: kevädel, kezal, sügüzel da tal’vel. "Kipinän" materialad om oigetud eriigäižile lapsile, kulehtez anttas ilma maksuta Karjalan školiden openikoile, kudambad opendaba vepsän kel’t. Ližaks kaikutte tahtnik voib ezipakita sidä "Periodika"-painištos.
