Texts
Return to list
| edit | delete | Create a new
| Statistics
| ? Help
Leipäkiisseli
Source:
Oma mua. 2026. 04.11 (№ 43 (1833)). С. 8
Resepti on otettu Karjalan kanšojen keittijö -kirjašta
Leipäkiisseli
Karelian Proper
New written karelian
Ainehet (1 litrah): 1 ruisleipä, 1 litra vettä livottamista varoin ta vähäsen potakkajauhuo livottamista varoin, 8 lusikkua ilman kukkulua potakkajauhuo, šokerie – mavun mukah.
Valmistamini:
Mušta leipä leikkua viipalehiksi ta hyvin kuivua – mitä kovemmakši puahtuu, šitä täyvellisempi tulou kiisselin maku. Illalla (kylmänä vuuvvenaikana) livota kuivattu leipä 1 litrašša vettä ta jätä yökši (kešällä livota leivät muutomakši tunniksi eikä yökši – jotta ei happanis). Huomenekšella šiivilöiče notkie marl’an tahi šiivilän läpi, purissa leipä. Lisyä šokerie ta pane tulella. Pieneššä miäräššä kylmyä vettä livota potakkajauho tašasekši ševokšekši. Konša notkie kiehuu, varovašti kua potakkajauhoševoš aina hämmennen. Kiehauta, hämmennen, ta heti ota pois tulelta. Tariče kiisseli vähäsen lämpimänä tahi jähytettynä. Voipi juuvva maijon kera.
Leipäkiisseli on yksinkertani, ka omaperäni pohjosen keittijön ruokalaji. Šen maku riippuu leivän puahtumisešta: mitä tummempi on kuori, šitä täyvellisempi on juomisen tuokšu ta väri. Ennein vanhah leipyä kuivattih venäläiseššä kiukuašša. Antonina Genrihovna muistelou, jotta lapšuošša muamo aina luati kakrakiisselie, a leipäkiisselie harvemmin. Škuapin piällä šeisottih luuvvat kakrakiisselin kera, lehtilöillä peitettyinä. Kakrakiisseli oli šakie, šitä šyötih lusikoilla. Muamo kuato šen piällä viluo kipätkyä ta ripotteli šokerilla.
Reseptin anto Antonina Genrihovna Karlova (on šyntyn 1957), kotosin Kalevalan piirin Kepan kyläštä, Vuokkiniemen kylän eläjä vuuvvešta 1973. Leipäkiisselin reseptin hiän tiijušti omalta muamolta (Ol’ga Petrovna Lesonen kotosin Kivijärven kyläštä) ta nyt välittäy šitä ielläh perehperinnön ošana.
