Texts
Return to list | edit | delete | Create a new | history | Statistics | ? Help
Maria Mironova. Midä keväz’ tegeb!
Maria Mironova
Midä keväz’ tegeb!
Veps
New written Veps
Tuli
keväz’ i mec heraštui .Lumi sulab , jokseba ojaižed , niiš heläidaba jälautikoižed , tullei vihel’dab oksiš .Linduižed čičitaba , pajataba , eskai öl ei vaikastugoi !
A Pakaižuk ei ole edahan , hän kaiken kuleb .Meletab : ”Kut oli hüvin , konz minä olin ižandan !Mecas oli hillüz’ , vaiše pud čuhkoiba .Nacein ei ole kaikile mel’he keväzline judu i heikand .Kaik linneba hüviš meliš , ku minä pördamoi tagaze .”Tuli Pakaižuk öl mecha i peitihe kuzen alle .
Päiduškanzi jo .Kuleb Pakaižuk : jokseb mecadme jäniš .”Hubin om jänišale , – meletab Pakaižuk . – Lumi-se om jo läz kaik sulanu , ma om hahk , a iče se om vauged . Kaikutte jänišad voib nägištada i tabata .”
Äkkid hüppähti jäniš tehudele .Vaiše se ei ole jo vauged : jäniš om hahk !Sen jäl’ghe hüppähtiba sebranikad – mugoižed-žo hahkad jänišad .Pakaižuk eskai čududelihe .
– Midä keväz’ tegeb !
Hüpiba ilokahad jänišad siriči .
Pakaižuk nägeb , miše ištub mecanröunal must tedr , i om kuti hil’ .
”Naku tedranno bed tuli , meletab Pakaižuk . – Ved’ se ödui lumen al . Nügüd’ lunt ei ole , a mec völ pal’l’az seižub .Ei ole tahod , kuna tedr voiži peittas – ni lumen alle , ni puiden alle .
A tedr ei meleta-ki peittas : sennoks emätedrad lendaba mecröunale , i se niiden edes ičeze čomut ozutab , heledal änel burbutab .
– Čuf-ši ! Čuf-ši !
Tedrannoks sebranikad lendaba , a se zavodib ridan .Zavodiše tora .
”Midä keväz’ tegeb-se ! – meletab Pakaižuk . – Kožmuseline lind tartui toraha . Tünüdes-ki unohti ”.
Päiväl tegihe lämembaks , tedrad lendiba poiš mecanröunalpäi .
Astub mecadme laih kondi .
” Kut sinei-se om , värkäpšuine ? – meletab Pakaižuk . – Nacein tusttud ičeze pezad ? Nukkuižid pezas i ed tedaiži näl’gäd .”
A kondi azotihe , kaivab künzil maspäi miččid-se jurid , pureskeleb niid , röhkib hüviš meliš : jured-ne oma magedad .
Pakaižuk holdui .
– Nece-ki ihastub kevädehe ! Niken ei tusttu mindai ...Lähtta küzuda Kevädel , mil se kaikid melespäi vei ?
Mäni kuzen alpäi , läksi mecadme ecmaha Kevät .A Keväz’ iče hčnennoks lendab .Iče kaik om änikoiš , päiväižen sädegiš .
Sanub hänele :
– Midä , vanh ?Kargaidamha da meiden pajoid kundelmaha tulid ?Vai pöl’gästoitta keda-ni tahtoiškanzid ?
– Pöl’gastoitad heid !.. A midä sinä tegid ningomad , miše kaik melespäi läksiba ?
Muhadaškanzi Keväz’ .
– A sinä iče küzu heil , mihe hö kaik ihastuba ?
Löuzi Pakaižuk jänišan .
– Sinä mihe ihastud ?
– Kevädehe , Ukoine . Ihastun lämähä , päiväižehe , vihandaha heinähä .Ved’ kaiken tal’ven en nägend vihandad taiment , kaikid haboid travin , karktad kor’t söin .A heinse maged om .
Löuzi Pakaižuk tedran .
– A sinä mihe ihastud ?
– Suugad oigeta , väged ozutada . Čuf-ši !Čuf-ši !
Löuzi Pakaižuk kondjan .
– A sinä mihe ihastud ?
– Änikoihe ihastun …
– Oh-oh , nagranzoitid mindai ! Čomad neiččed ihastuba änikoihe .Ik sinä-ki zavodid sidoda niišpäi änikpal’mikoid ?A tahtoid , minä andan sinei äi vauktoid änikoid , kaiken man niil peitan ?
I zavodi Pakaižuk pudištada hijamal .A hijamaspäi lunt lendaškanzi .
Kondi sanub :
– Ei , Ukoine !Sinun änikod oma elotomad .Ned ei mujugoi , ei ihastoitkoi sil’mäd .Sinä tuled , ka tal’ved tod , a Keväz’ astub – rusttad kezad tob .A mö , kondjad , sured magedsud olem !Minä tal’vel nukun pezas , lunt da jäd minun päl om , a unes kaiken nägen magedad met da marjoid .
– Nu , ku sinä , värkäpšuine , uništad magedas , ka minei lähttä pidab .
Pakaižuk käreganzi i läksi muga edahaks , miše jäniš , tedr da kondi ani unohtibaki siš .
Midä keväz’ tegeb!
Veps
New written Veps
–
–