Texts
Return to list | edit | delete | Create a new | history | Statistics | ? Help
Galina Baburova. Sarn päiväižes
Galina Baburova
Sarn päiväižes
Veps
New written Veps
Amuižiš
aigoiš oli pohjoižel ma , kus ei paštand päiväine .Lujas pimed oli siš mas .Vaiše tähthaižid voi nägištada mustas taivhas .No tähthišpäi vauktut om vähä …
Must taivaz ripui Pimedan man päl .Neciš mas oli muga pimed , miše ristitud tundištiba toine tošt vaiše änen kal’t .Lämoid mugažo ristitud ei nähnugoi .Ičeze pertiden piluihe hö panliba samloid , no eläda oli kaik-se vilu .Sikš ku käred tellei puhui siš mas .Nene ristitud eliba lujas hubin .
Oli siš Pimedas mas korged mägi .Se peiti pol’ taivast .Niken ei tedand , miččed tähthad kobaidaba necen mägen toižes poles …
Mägenno seižui pit’k da korged aid .Mugoine pit’k , miše niken ei voind ümbärta sidä .Pimedan man eläjad teziba , miše aidan taga om sur’ pert’ mustiš parzišpäi .Seičeme mustad velled eliba siš pertiš .Oli nenil vellil sada tuhad pedrad .Pedroiden nahk om läm’ , liha om magukaz…No Pimedan man eläjad ei tednugoi necidä .Heil ei olend pedroid , hö söiba vaiše kalad , mittušt saskeliba mustan jän alpäi .Muga eliba hö äi tuhid vozid .
Niken Pimedan man eläjišpäi ei meletand , miše voib eläda toižin .No kerdan hö nägištiba , miše pidust’ pit’käd aidad ajab raccil vauktal pedral uk .Pedr oli mugoine vauged da čoma , miše sišpäi tegihe kuti päiv .Sikš ristitud nägištiba ukon melevad modod .Oli sel’ged , miše ukole om äi vot , hän nägišti elos äjan .Uk ei kadehtind nikelle i vaiše tahtoi jätta ristituile hüväd muštod ičesaze .
– Tervhen ! – sanui uk da seižuti pedran .
– Kut om pimed teiden mas , – sanui uk , i ristitud nägištiba hänen hahkad bardad pol’vihesai .
– Jose tö nikonz et nähnugoi päiväšt ? – küzui uk .
No niken ei andand vastust , sikš ku niken ei el’gendand , miš oli pagin .Pimedan man eläjad ei tednugoi ni päiväšt , ni kudmašt , vaiše tähthaižid-lämoimadoižid mustas taivhas .
– Nägen , – sanui uk , – tö et tekoi , mi om päiväine . Päiväine tob ristituile lämäd da sur’t ilod !Se eläb toižes mägen poles , korktan aidan taga .Pit’kha heredal pedral tarbiž ajada , miše nägištada päiväšt .Ristitun elod ei täudu , ku astta jaugai pidust’ necidä aidad sinnapäi .
Vaiknašti kundliba Pimedan man eläjad ukod da čududelihe – mitte om nece päiväine , kudamb voib antta lämäd da ilod ?...Kulištiba ukod mustad velled-ki .
Äkkid hö kidastaškanziba :
– Meletomad ristitud !Jose mirus voib olda mi-se mugoine , mitte voiži antta ilod da lämäd sil-žo aigal ?Jose voib olda mi-ni mugoine , midä mö em tednuižigoi ?Nece uk om kelastai , starinoičeb teile sarnoid , a tö kundlet !Ei ole mirus mujud paremba mustad !Lögam händast da ajagam meiden maspäi !
Pimedan man eläjad meletiba , jose starinoitud sarnas voib löda ?
Melev uk likuti päl , kibinad sil’miš kadoiba .Sanui hän :
– Om jüged uskta sihe , midä ed näge .No ku om aid , om midä-se sen taga-ki .Ku om mägi , om ma sen-ki taga .Ku oma tähthaižed , ka voib olda toine-ki sur’ tähtaz , hoštai , kut sada tuhid tähthid , läm’ da čoma .Om mirus äi toižid mujuid , ei vaiše must .Must om manitusen da kelastusen muju .Minä lähten .Tulen vaiše sen ristitunnoks , kudamb uskob päiväižehe .
Mustad velled tahtoiba tabata ukod , no vauged pedr iški kabjal – kadoi uk , a sen ühtes noidasine pedr-ki .
Ristitud tartuiba ičeze enččihe azjoihe Kaik zavodiba eläda , kut ende-ki .
Vaiše üks’ priha ei voind eläda tünäs .Hän pani muštho ukon sanoid päiväižes , mitte andab ristituile lämäd da ilod .Läksi hän pimedan järvennoks , sinna , kus kazvab pedransamal .Kacuhti priha mustaha taivhaze , kacuhti mustaha vedehe da mustaha maha :
– Kut-žo hüvä oliži , ku kaik nece ei oliži must !Tahtoin uskta päiväižehe !Tahtoin nägištada sidä !No melev uk kadoi , abidoittihe händast .Kadoi vauged pedrki .Kut-žo minä löudan sidä mugoižes pimeduses ?...Äkkid samlos ozutihe noidasine pedr .Oli se mugoižen vauktan , miše sen nahkaspäi tegihe vauvhemba .
– Minä olen tägä , – sanui pedr . – Varastan sindai . Ištte raccile .
Priha lujas čududelihe , no ištuihe pedran sel’gha .Pedr joksi samlodme , soidme , siriči mustiš järviš…Sid’ pedr seižutihe .Priha nägišti , miše hänen edes kivel ištub se uk bard pol’vihesai .
– Tervhen , – sanui uk . – Spasib , miše uskod päiväižehe . Ristituiden keskes voib löuta kaiken vägevid hengid… .Ei ole rahvast mugoižita hengita …
– Spasib sinei hüväs vaihes , – sanui priha . – Ole hüvä , starinoiče , kut minei sada päiväižen Pimedan man eläjiden täht ? Hot’ sen palaižen , mitte voiži antta meile lämäd da ilod .
– Void sinä sada päiväšt , – sanui uk . – No sen täht , miše päiväine lämbitaiži kaiked , tariž ristituiden uskond . Ku sinun man eläjiden uskond oliži hot’ hoikan hibusen karččeks , ka siloi-ki voižid sada päiväžen .Siloi se lämbitaiži kaiken .
– Hüvä , – sanui priha , ištuihe pedrale da pördihe ičeze maha . Pimedan man eläjile priha starinoiči , kut azj oli , da pakiči heil hibusid .Kaikutte ristit andoi prihale ičeze hibusen .Vaiše mustad velled ei andnugoi …
Sarn päiväižes
Veps
New written Veps
–
–
–