Texts

Return to list | edit | delete | history | ? Help

Čoma da melentartuine festival’

Corpus: New-writing language

New written Veps, Journalistic texts

Source: Maria Košeleva, Kodima. № 11, (2014), p. 8

Čoma da melentartuine festival’
(Veps)

Festival’: Suomalaiž-ugrilaižen školan openikad lugiba runoid, pajatiba pajoid da ozutiba teatrozutelusid ičeze kodikelel.

Redukun lopus suomalaižugrilaižes školas mäni tradicionaline festival’Karjalan jalokivet”. Se oli tehtud redukun 30.- 31. päivil.
Festivalin ühtnikoin oliba suomalaiž-ugrilaižen školan openikad. Ičeze ezitusid lapsed ozutiba kodikelelsuomen, karjalan vai vepsän kelil. Se oli konkursan päpakičusen. Festivalihe ühtniba läz kaik školan klassad. Redukun 30. päiväl oli ezmäine festivalin päiv. Necil päiväl eziniba augotižškolan openikad. pajatiba pajoid, lugiba runoid da eskai kargaižiba. Toižel päiväl vanhembad lapsed mugažo pajatiba da kargaižiba, no paiči sidä völ ozutiba teatrozutelusid. Konkursan ühtnikad tegiba čomid dekoracijoid, heil oliba melentartužed sädod. Opendajad da üläopenikad, kudambil necil aigal oli pedagogine praktik školas, abutiba lapsile vaumitadas festivalinnoks.
Žüriš oliba kodikeliden opendajad da Petroskoin universitetan üläopenikad, kudambad oikti arvosteliba jogahišt ühtnikad.
Festivalil oli koume vepsänkelišt ühtnikad. Ned oliba ezmäižen, seičemenden da kahesanden klassoiden openikad. Ezmäižen klassan openikad lugiba Ol’ga Žukovan lapsiden runoid. Lapsil oliba lujas čomad rahvahaližed sädod. Seičemenden klassan openikad ozutiba melentartuižen teatrozutelusenPaimen da murahaine”. Lapsed kahesandespäi klassaspäi ozutiba ilokahan ozutelusen Kindasovo-külän mužikoiš. Lapsed eziniba lujas hüvin, kaik kacujad nagroiba komedas.
Festivalil lapsed ozutiba ičeze kelen mahtoid da lahjoičiba kaikile kacujile hüväd mel’t.
Om lujas hüvä se, miše mugoine čoma da melentartuine festival’ tegihe tradicionaližeks. Ved’ sil kaik lapsed pagižiba ičeze kodikilel. Nece festival’ kehitoitab lapsiden kelen mahtoid i ühtenzoitab openikoid da opendajid.