Texts
Return to list | edit | delete | Create a new | history | Statistics | ? Help
Vepsän kelen opendamine Šokšun školas
Vepsän kelen opendamine Šokšun školas
Veps
New written Veps
Openduz
: Enamb seičemed vot Šokšun škol ei voind löuta vepsän kelen opendajad .
Vodel 2015 Šokšun školale täudub 210 vot .Nügüd’ sigä opendase 87 openikad .Kacmata sihe , miše škol seižub tradicionaližes vepsläižiden eländtahos , vepsän kelen urokad sigä ei olend enamb seičemed vot .
Vodel 2013 školas udes zavot’t’ihe opeta vepsän kel’t .Abuks tuli nor’ opendai Petroskoišpäi – Nastoi Konošenko .Opetes universitetas , hän löuzi voimust tuleskelda Šokšhu radole kaks’ kerdad nedališ .”Opetas da rata ühten aigan ei olend jüged , – sanub Nastoi , – sikš ku lujas navedin ičein radod ”. Tehtas opendajaks hän uništi völ laps’aigaspäi .
– Kut sinä putuid radmaha Šokšun školha ? Ken kucui sindai ?
– Školaspäi minä tahtoin rata vepsän kelen opendajan . Konz minä openzimoi 4.voz’kursal universitetas , kulištin , miše Šokšus ei ole vepsän kelen opendajad .Minä zvonin školha i mindai kuctihe radole .
– Miččiš klassoiš vedäd urokoid ?
– Vedän urokoid ezmäižes , toižes da koumandes klassas .
– Om-ik lapsil taht opeta vepsän kel’t ?
– Minä mujan , miše lapsil om sur’ taht opeta vepsän kel’t . Hö eläba vepsän mal , i äjad lapsed oma vepsläižed .
Openikoiden kazvatajad surel tahtol hökkähtiba , miše heiden lapsed opendaškanziba školas kodikel’t .Hö eskai abutaba vaumištadas festivalihe , miččihe Šokšun školan openikad jo ehtiba ühtneda .
– Sinä radad opendajan Šokšun školas ei amu , no jo ehtid openikoidenke ühtneda erazvuiččihe konkursoihe da festivalihe . Ole hüvä , starinoiče niiden satusiš !Ihastusiš-ik openikad ühtneba mugoižihe azjtegoihe ?
– Lapsed surel tahtol ühtniba Vepsläine sarn-festivalihe , kus mö ozutim sarnan . Mugažo mö olim Šoutjärves , ühtnim Pajon kera-festivalihe .Lapsile oli lujas mel’he vaumištadas sihe , a sid’ ezineda-ki laval .
– Tedan , sinä iče ühtnid kodikelen opendajan konkursaha . Starnoiče , midä tariž oli tehta , ozutada ?Oli-ik jüged ?Ken völ paiči sindai ühtni sihe ?Ken vägesti ?
– Ka , nece oli sur’ mahtišt minun täht . Se oli lujas melentartuine , no ühten aigan jüged azj .Voib olda , sikš , miše minä olen nor’ opendai i vaiše ezmäižen kerdan ühtnin mugoižehe konkursaha .Tariž oli vedäda vepsän kelen urokad , klassčasud da starinoita ičein polhe .Meid , opendajid , oli 20 mest , oli sur’ voibištelend .Konkursas vägesti suomen kelen opendai Essoilaspäi .L’udmila Pupulainen tuli parahimaks kodikelen opendajaks .
Ühtnend konkursas om tärktemb vägestust .Opendajan rados päazj om armastuz lapsihe , sur’ taht antta heile midä-se ut .Nastoil om völ äi konkursoid tulijal aigal .Toivom , miše konz-ni hänen armastuz radho da naprind toba hänele korktoid satusid !Vägid da tirpandad Nastoile mugoižes jügedas da tarbhaižes azjas !
Vepsän kelen opendamine Šokšun školas
Veps
New written Veps