Texts
Return to list | edit | delete | Create a new | history | Statistics | ? Help
Irina Sotnikova. Ihastoita edemba-ki ičeiž lugijoid!
Irina Sotnikova
Ihastoita edemba-ki ičeiž lugijoid!
Veps
New written Veps
Uded
painused : Elokun lopus Periodika-painištos om paindud nellänz’ vepsänkeline Verez tullei-al’manah .
Al’manahan idei om siš , miše ozutada vepsän rahvast , sen kul’turad da tradicijoid , vepsän kelen kehitoitandad , vepsläižiden küliden elod erazvuiččiš polišpäi .Sikš al’manahan täht om valitud melentartuižid temoid i tehtud mugomad rubrikad kut : ”Runod ”, ”Proza ”, ”Hengkuvad ”, ”Tedomir ”, ”Meiden elo ”, ”Lapsile ”.
Nece om literaturine kulehtez , miččehe mülüba proza da runoid kut aigvoččiden , muga lapsiden-ki täht .Avtoroiden keskes oma hüvin tutabad vepsläižele lugijale nimed .Nene om Nina Zaiceva , Valentina Lebedeva , Nikolai Abramov , Natalja Silakova , Ol’ga Žukova , Oleg Mošnikov i toižed .Mugažo pidab homaita noriden kirjutajiden satusid : Galina Baburovan runoid , Maria Mironovan da Rostislav Mošnikovan starinoid lapsiden täht .
Al’manahas mugažo voib löuta hengkuviden starinoid , materialoid tetabiš mehiš , kudambad tegiba suren panendan vepsän kelen da kul’turan kaičendaha , pagištoitusen L’udmila F’odorovna Aleksejevanke , kudamb holdub vepsän kelen kaičendas da iče om pandud neche azjaha äi väged .
Paiči starinoid ristituiden elon polhe , täs voib lugeda tedokirjutesen LDIAprojektan satusiš , tedištada vepsläižen Pondal-külän elos , muzejas , mitte radab Kurbal ...Kirjutesespäi , mitte om omištadud suomalaižugrilaižen školan 20-voččen jubilejale , lugii tedištab vähäižen školan istorijas , openikoiš da opendajiš , äjad kudambišpäi nügüd’-ki radaba školas .Om melentartušt lugeda siš-ki , kut zavodihe vepsän kelen opendamine školas , äjak oli siloi lapsid , kudambad tahtoiba opeta kodikel’t .Kirjutez starinoičeb sures rados , mitte om tehtud neniš voziš , i mil škol eläb tämbei .
Päkirjutesen kulehtesen täht kirjuti Nina Zaiceva .Se om Venäman V Suomalaižugrilaižes tedokonferencijas , mitte oli tehtud Petroskoiš kezakun lopus .
Al’manahad čomitab Marina Ginijatullinan Puhuda ühthe hil’he-kirjutez ližalehtesidenke .Nenil ližalehtesil oma čomad kuvad Vepsän kul’tursebran erazvuiččišpäi aigtegoišpäi 25 vodes .
Korenkuvad kulehtesen täht tegi Nikolai Abramov , pirdatused – minä , necen kirjutesen tegii .
Mö olem hüviš meliš , miše al’manah om paindud , i meletam , miše se linneb melentartuižen kut aigvuoččile , muga lapsile-ki .Täs kaikutte lugii voib löuta se , mi om hänele mel’he .Toivom , miše se edemba-ki ihastoitaškandeb ičeze lugijoid .
Verez tullei-al’manahan voib ostta Kodima-lehtesen toimištos , sen arv om 100 rubl’ad .
Ihastoita edemba-ki ičeiž lugijoid!
Veps
New written Veps