Texts
Return to list | edit | delete | Create a new | history | Statistics | ? Help
Meile tarbiž kaita vepsän kel’t
Meile tarbiž kaita vepsän kel’t
Veps
New written Veps
Uhokun
24.päiväl meiden školha tuliba opendajad toižiš školišpäi da pämehed Babajevon agjaspäi , miše pagišta tärktoiš azjoiš .Ištundan tem oli – ”Kaita vepsläižiden kul’turan da kelen jäl’gestust – radon mahtišt da tulijan aigan nägemusid .”
Ezmäi pämehed oliba vepsän muzejas Pondlal .Vera Mednikova tegi hüvän tundištoituzmatkan .Jäl’ges meiden školas adivoid vastsiba vepsän kelel pämez’ L’udmila Nikolajevna Zagul’ajeva , opendajad da openikad .Meiden opendai Ol’ga Vasiljevna Balaban tegi tundištoituzmatkan školadme vepsän da venän kelel .Hän ozuti adivoile , miččed oma radhonused , kut mö eläm meiden školas .Jäl’ges adivoiden täht oli tehtud azjtego ”Adiv kodihe – ihastuz kodiš ”.Ol’ga Balaban oli emäg , ičeze suren kanzanke hän vastsi adivoid .Necen azjtegon vaumiči toine opendai Jelena Anatoljevna Šalajeva .Hän oli kodi-ižand , tuli pert’he toižidenke adivoidenke .Lapsed pajatiba , lugiba sarnoid , pagižiba sän polhe vaiše vepsän kelel .Adivoile nece lujas tuli mel’he .
Jäl’ges oli ”kehker stol ”, miččen avaiži Babajevon agjan openduzministerstvan pämez’ Gennadii Vasiljevič Jevgenjev .Meiden školan pämez’ L’udmila Zagul’ajeva sanui , miše škol om vepsän kul’turan kehitoitusen da kaičendan keskuz .Se om üksjaine , kus opetas vepsän kel’t Vologdan agjas .
Necil vodel školale linneb 90 vot .Opendajad lapsidenke keradaba kodirandan materialad da ühtneba konkursoihe i konferencijoihe , kut školas , muga toižiš-ki sijoiš .Školas radab Linduižed-fol’klorsebr .Sen ohjandai om opendai Jelena Šalajeva .Fol’klorsebras lapsed opendaba vepsän sarnoid , runoid , pajoid .Sid’ hö ajaba ezinemha , saba kitändkirježid .Mö radam ühtes vepsän muzejan pämehenke Vera Mednikovanke , kirjišton holitajanke Natalja Nikolajevna Bistrovanke .Kaikuččel kezal školas om lager’ .Vodel 2009 meil oli vepsän kelen da kul’turan Taimen-tedomatk , miččehe ühtniba lapsed da opendajad toižiš školišpäi .
Pämehiden nevondišt lugi školan radon hüväks , nevoi avaita meiden školas sädajan rahvazjoukun ühtes toižidenke školidenke , miše jatkata kaita vepsän kel’t da kul’turad .Мeiden lapsed surel tahtol opendaba ičemoi kel’t .A mö meletam , miše meiden škol avaidab verajan heile edemba-ki .
Meile tarbiž kaita vepsän kel’t
Veps
New written Veps