Texts
Return to list | edit | delete | Create a new | history | Statistics | ? Help
Irina Sotnikova. Hö lahjoičiba meile mirud!
Irina Sotnikova
Hö lahjoičiba meile mirud!
Veps
New written Veps
Praznik
: Kalagen eläjad ezmäižen kerdan ühtniba Kolematoi rahvazjouk-akcijaha .
Vodespäi vodhe semendkun 9.päiväl meiden man rahvaz praznuičeb surt praznikad – Vägestusen päiväd .Necil vodel äjiš lidnoiš da küliš Vägestusen päiväl uden tradicijan oli Kolematoi rahvazjouk (Bessmertnii Polk )-akcii .
Ristitud astuiba irdoidme pidädes kädes ičeze heimolaižiden fotoid – niiden , ked ühtniba Surehe voinaha .Kaikuččen vodenke kaik enamba ristituid ühtneb neche akcijaha .Ved’ sen pätegend om kaita muštod voinas , meiden man urohoiš , kudambad vojuiba frontal , oliba tagamal , koliba Kodiman valdas .
Jubileivodel meiden-ki Kalag’-külän eläjad ühtniba neche akcijaha .Ei sa sanuda sanoil , mi tegihe ristituiden hengel da südäimel .Necil päiväl meiden pradedad da prababad , dedad da babad todeks oliba rindal meidenke .
Sä oli lujas hüvä .Školanno kerazihe lujas äi külän eläjid .Jäl’gmäižiš voziš en mušta mugomad rahvahan lugumärad , mitte oli necil vodel .Akcijan ühtnikad pidiba kädes ičeze tatoiden , dedoiden , pradedoiden , baboiden fotokuvid da portretoid nimidenke .Fotokuvad heiden kädes sanuiba siš , miše hö muštaba , ülendasoiš , tahtoiba kaita istotrijad sures ezitatoiden urohontegos .Kacmata sihe , miše kaikuččen vodenkevoin om kaik edemba meišpäi , mö , jäl’genikad , kaiken muštaškandem niiš , ken koli kaites Kodimad .Kolematoi rahvazjouk-akcii koski kaikuččen ristitun südäint .Minä nadeimoi , miše se tuleb hüväks tradicijaks meiden-ki küläs .
Astund oli školaspäi kul’turpertihesai , kus jäl’ges mäni miting .Mitingal meiden veteranoid , Suren voinan ühtnikoiden leskiakoid , enččid min’oroid da kaikid tulijoid tervehtoiti Kalagen administracijan pämez’ Irina Zalivako da Prionežjen administracijan pämez’ V’ačeslav Škapov .
Mitingan aigan openikad lugiba runoid da pajatiba pajoid voinan polhe .Jäl’ges oli änetomuden minut kolijoiden muštoks da änikoiden panend kaumoile .
Mitingan jäl’ghe kul’turpertiš külän eläjiden täht oli tehtud koncert .
Praznik tuli mel’he kaikile ristituile .Tahtoin spasiboita akcijan sädajid i kaikid , ken ühtni praznikan tegemižehe .
Olen hüviš meliš , miše minei-ki tuli oza ühtneda neche akcijaha .Minun heimos mugažo oma ezitatad , kudambad ühtniba Surehe voinaha .Üks’ niišpäi om minun pradedoi Aleksandr Matvejevič Mironov .Hän mäni läbi kaikes voinas i pördihe kodihe .Oli pauklahjoitud ordenal da nelläl medalil .Koli , konz hänele oli 64 vot .Mö , kaik heimolaižed , starinoičem hänen polhe ičemoi lapsile , vunukoile i ülendamoiš hänel .Hän igäks jäb meiden südäimihe , kut äjad toižedki rohktad urohod , kudambad lahjoičiba meile mirud .
Hö lahjoičiba meile mirud!
Veps
New written Veps