VepKar :: Texts

Texts

Return to list | edit | delete | Create a new | history | Statistics | ? Help

Anastasia Konošenko. Riddu Riđđu - festival’ udes kerazi igähižid rahvahid

Anastasia Konošenko

Riddu Riđđu - festival’ udes kerazi igähižid rahvahid

Veps
New written Veps
8-12. päivil kezakud Norvegias Mandalen-tahos oli norišton muzikan festival’Riddu Riđđu”. Festivalile om jo 24 vot. Mandalenale oliba tulnuded rahvahad erazvuiččiš maišpäi: Norvegiaspäi, Šveciaspäi, Suomespäi, Kanadaspäi, Gvatemalaspäi da Venämalpäi. Venämad ezitiba saamelaižed Murmanskaspäi, nencad Narjan-Maraspäi, igähižiden rahvahiden ezitajad Kamčatkaspäi, Jakutijaspäi da Čukotkaspäi. Vepsläižid festivalil ezitiba Šokšun školan vepsän kelen opendai Anastasia Konošenko da Petroskoin universitetan uläopenik Darja Švecova.
Festivalil oliba kut nored, muga lapsed-ki. Festivalin programm zavodihe 10 casud homendest. Programmas oli erazvuiččid mastar’-klassoid, miččiš kaik tahtnikad voiba opetas kargaidamha, pajatamha, poimimaha da eskai tehmaha erazvuiččid azjoid nahkaspäi. Mugažo oli mastar’- klass teatraližen taidehen da fotokuvadamižen navedijoiden täht.
Kaikuččel ehtal oli muzikaline koncert, miččel pajatiba tutabad gruppad Norvegiaspäi, Kanadaspäi, Grenlandiaspäi, Mongoliaspäi. Saamelaižid ezitiba mugomad pajanikad, kut Mari Boine, Arvvas, Amok da toižed.
Kaikuččel päiväl norištol oliba tundmused muzikaližiden gruppoidenke. Nenil vastusil voi tehta küzundoid pajanikoile da fotografiruidas heidenke.
Festivalin tahol oli tehtud čumad, jurtad, miččiš oliba rahvahaližiden sobiden da käzitöiden ozutelusid. Mugažo festivalin aigan kaikutte ristit voi ostta pedran lihad, marjkeitosid, nahkaspäi tehtud predmetoid da äi tošt.
Nece oli lujas melentartuine da ilokaz festival’, miččes löuzim uzid sebranikoid kaikešpäi miruspäi.