Texts
Return to list | edit | delete | Create a new | history | Statistics | ? Help
Vepsän kel’ uzile sugupol’vile
Vepsän kel’ uzile sugupol’vile
Veps
New written Veps
Openduz
: Nügüd’ se om lujas ülev azj – teta ičeze kodikel’t .
Nikenele ei ole čudokast , miše voded jokseba lujas heredas , i uded pol’ved vajehtaba toižid .Kaik mäneb ümbrustme möst i möst .Jogahižen voden školihe da üläopištoihe tuleba uded openikad da üläopenikad , a ned , kudambad ei amu oliba heiden sijal lähteba udehe aigvoččiden eloho .Meiden Karjalan valdkundas kaiken aigan letas küzund kodikeliden oloiš , niiden kehitoituses da kävutoitandas .Kaikuččen voden školiš da üläopištos varastadas uzid tahtnikoid opeta kodikel’t .Karjalas om 4 školad , miččiš opetas vepsän kel’t .Ned oma Šokšun , Šoutjärven , Kalagen školad , miččed sijadasoiš Änižjärven randal da Suomalaižugrilaine škol Petroskoiš .
Vaiše necil openduzvodel opendai Šokšuspäi mäni radmaha Šoutjärven školha .Sikš ei ole sel’ged , ken sigä opendaškandeb lapsid vepsän kel’he .Nügüd’ Šokšun škol ecib ristitud vepsän kelen opendajan sijale .Ihastoitab situacii Kalag' - da Šoutjärv'-küliden školiš , ved’ kaik openikad , kudambad tuleba ezmäižehe klassaha opendaba kodikel’t .Täl vodel Kalagen školha ezmäižehe klassaha tuli 11 openikad , Šoutjärven školas necil openduzvodel ezmäižes klassas opendasoi 13 openikad .
Suomalaiž-ugrilaižehe školha tuli üks’ prihaine vepsläižiden juridenke .Vepsän kelen opendajan Nadežda Petrovan sanoiden mödhe , nügüd’ školas vepsän kel’t opendab läz 27 last .No ku školiš om äi lapsid , kudambad tuliba opendamha karjalan da vepsän kel’t , ka üläopištos niid tegesoi vähemba .Se-ki om sel’ged .Ei kaikutte ristit el’gendab , miše opeta kodikel’t om lujas melentaruine da tarbhaine azj .Enambišton täht se om tühj da ližatoi .Paksus ristitud , kudambad opendaba kodikel’t , voiba kulda : “Mikš nece sinei om ?Tarbiž-ik nece sinei ?Ved’ niken ei pagiže nenil kelil !Kuna sinä mäned radmaha ?”.Sikš školiden pästnikad meletaba , miše nece professii ei linne tarbhaižen heiden täht .A se om lujas huba !Nügüd’ se om lujas ülev azj – teta ičeze kodikel’t , a ku nece om vähäluguižen rahvahan kel’ , kaita se om kuti supergerojan missii .Muga konz-se sanui üks’ baltianmeren-suomalaižiden keliden kafedran üläopenik .Om lujas hüvä , miše oma ristitud , kudambad el’gendaba sidä .Nügüd’ Petroskoin üläopištos viž üläopenikad opendab vepsän kel't .Koumandel voz’kursal sidä opendab üks’ neičukaine – Jekaterina Veršinina , toižel voz’kursal – Darja Švecova da Darja Hil’ .Sureks ozaks necil vodel ezmäižele kursale tuli kaks’ prihašt – Gleb Fomin da German Issar .Molembad prihaižed oma Petroskoišpäi .German nikonz ei ole oppinu suomen da vepsän kel’t , da paiči sidä nikonz ei ole kulnu niid .No hän iče sanub , miše hänele kaiken aigan oli melentartušt teta nenid kelid .Midä koskeb Glebad – hän om Suomalaiž-ugrilaižen školan pästnik .Hän om oppinu vepsän kel’t vaiše kaks’ vot , da hänen melentartuz neche kel’he om lujas sur’ .Glebal oma vepsläižed jured , hän meletab , miše opeta kodikel’t om hänen velg .Hüvä om , ku jäb mugoine norišt , mitte el’gendab ičeze kelen arvon da korktan znamoičendan .Nikonz en väzu toštta , miše kodikeles om vägi .Ei sa varaita , miše midä-se tuleb toižeks .Ved’ ku ristit tegeb armast azjad , sid’ kaik hänel tuleb hüvin !Ei tarbiž kundelta toižid , kudambad sanuba , miše eläd värin , tarbiž kundelta vaiše ičtaze da uskta , miše armaz azj abutab elos kaiken !
Vepsän kel’ uzile sugupol’vile
Veps
New written Veps