Texts
Return to list | edit | delete | Create a new | history | Statistics | ? Help
Galina Baburova. Petroskoiš mäni uden vespläižen fil’man prezentacii
Galina Baburova
Petroskoiš mäni uden vespläižen fil’man prezentacii
Veps
New written Veps
Prezentacii
: Larisa Smolina da Vladimir Slavov tegiba jo nelländen fil’man vepsläižiden polhe da tarjoičiba kacujile arvostelda se .
Muga tegihe , miše necen voden tal’vku om täuz’ erazvuiččil aigtegoil .Vepsläižed da kaik , kenele om melentartušt vepsläine kul’tur , habi ehtiba oleskelda kaiktäna .Uden vepsläižen fil’man prezentacii om üks’ niišpäi .En tege vigad , ku sanun , miše necidä aigtegod lujas varastadihe Petroskoiš .11. tal’vkud fil’m oli ozutadud ezmäižen kerdan Karjalan Rahvahaližes kirjištos .
Uden fil’man nimi om ”Paimnen torvut ”.Se om tehtud Karjalan Rahvahaližen politikan ministerstvan abul Karjalan büdžetan tugirahoile .Fil’m starinoičeb torvuden znamoičendas vepsläižen paimnen elos .Sjomkad oli tehtud Petroskoiš , Änižröunan vepsläižiš küliš da eskai Suomes (erasid tedoid fil’man tegijad saiba Rahvahaližes muzejas Helsinki-lidnas ).Fil’man tegemižehe mugažo ühtniba Petroskoin konservatorijan radnik Dmitrii D’omin da Šoutjärven vepsläižen etnografižen muzejan radnik Jevgenii Fotejev .
Dmitrii D’omin om suomalaiž-ugrilaižen muzikan kafedran opendai , hän iče mahtab tehta rahvahan vändimid .Fil’mas hän starinoičeb paimnen roliš külän täht , sanub , miččid kel’dändoid oli paimnel radon aigan , kut paimen tegi ičeleze torvuden da min täht se oli hänele .Dmitrii iče-ki ozutab fil’mas , kut voib tehta torvut .Larisa Smolina da Vladimir Slavov sanuba , miše Dmitrijad mugažo voib nimitada fil’man tegijaks , sikš ku läz kaik etnografine pala om tehtud hänen taguiči .
Vepsläižen paimnen roliš fil’mas om Jevgenii Fotejev , kudamb mugažo ei lujas amu pajataškanzi Vepsän rahvahan horas .Jevgenii om lujas artistine da lahjakaz mez’ , hän kebnas tartui fil’man radho .Hän ei varaidand kamerad da , kut sanuba fil’man tegijad , todes eli ičeze ”paimnen mirus ” kuvadandan aigan .
Fil’man leiktai da kameramez’ om Konstantin Nikolajenko .Prezentacijan aigan fil’man tegijad sanuiba , miše täl kerdal radon aigan heil oli äi jügedusid da erazvuiččid mel’pidoid sihe , kut tarbiž tehta da kerata fil’m .Larisa Smolina sanub : ”Nikonz fil’man tegijad ei olgoi lophusai täuduližed ičeze radol .Kaiken tahtoiše midä-se vajehtada vai ližata ”.Nacein , se om tozi .Sädandrados ei ole agjad mel’kuvitelusile ...Sädaimehed kaiken napriba tehta ičeze radod völ parembaks da parembaks .Nece om professijan erigoičuz .No siš azjas radon ozutajan om kacujiden arvsana .Pidab sanuda , miše adivod , kudambad tuliba Paimnen torvut-prezentacijale , arvostiba fil’mad lujas korktas .
Äi lämid sanoid oli sanutud fil’man tegijoile .Prezentacijan jäl’ghe oli diskussii .Kacujad jagoihe ičeze tundmusil fil’man polhe .Pagištihe ei vaiše paimniš da torvudes , sanutihe ičeze johtutesiš .Ved’ nügüd’ vaiše erased ristitud muštaba nenid aigoid , konz küliš oliba surid lehmiden kogoid .Meiden aigal lehmäd oma ühtel vai kahtel perehel küläs .Nene johtutesed veiba mel’he , miše aigad ei sa seižutada , i , nacein , miččed-se azjad konzse kadoba meiden elospäi .No meiden väges om kaita mušt niiš hot’ , ozutesikš , mugoižiden fil’moiden abul .
Petroskoiš mäni uden vespläižen fil’man prezentacii
Veps
New written Veps