Texts
Return to list | edit | delete | Create a new | history | Statistics | ? Help
Galina Baburova. Jogavozne kodvind kodikelen tedoiš
Galina Baburova
Jogavozne kodvind kodikelen tedoiš
Veps
New written Veps
Karjalan
školiš , miččiš opetas rahvahaližid kelid mäniba olimpiadad , miše valita parahimid openikoid , kudambad ütneškandeba sid’ regionankeskeižehe olimpiadaha .
Petroskoin Suomalaižugrilaižes školas openikoid , kudambad opendaba vepsän kel’t , ei ole äi .No kaik-se neche olimpiadaha vepsläižilpäi ühtni 9 mest .Ned oma kaks’ prihašt seičemendes klassaspäi da seičeme openikad ühesandes , kümnendes da ühtestoštkümnendes klassoišpäi .
Pidab sanuda , miše olimpiadtegendad necil vodel oliba jügedad .Ezmäine tegend , kut i kaiken , om kundlemine .Openikoile lugetas tekst , heile tarbiž tarkašti kundelta se da sid’ antta vastusid küzundoihe tekstan mödhe .Toine tegend om oigetud el’gendusele .Openikad lugeba tekstan , kändaba sen da mugažo andaba vastusid küzundoihe .Koumandes tegendas tekstas ei olend erasid sanoid , openikoile pidi meletada , miččed ned oma da kirjutada niid tekstaha .Nelländes tegendas tarbiž oli panda tekstaha oiktoid sanoid , miččed oli taritud alemba .Videnz’ om sädandtegend .Openikoile tarbiž oli kuti täutta penikaišt anketad ičesaze .Lapsed starinoičiba kus hö eläba , mitte heil om kanz , midä hö navediba söda , lugeda , mitte om heiden armaz vänd , midä hö navediba tehta lebuaigal .Jäl’gmäine tegend om kaiken ani tärged , se om pagin .Sečemenden klassan openikoile oli taritud Armaz vodenaig-tem paginaks .Vanhembad lapsed starinoičiba ičeze armhas sebranikas .Paginan jäl’ghe lapsile pidi antta vastusid žürijoukun küzundoihe temadme .Žürijoukuhu necil vodel mülüiba Karjalan telenägudesen radnik Maria Filatova da Kodima-lehtesen toimitai Galina Baburova .Täl kerdal openikoiden paginad-starinad kuvatihe kameroile .
Olimpiadradoiden satused oliba erazvuiččed .Vanhembiš klassoiš žürijoukud lujas ihastoitiba koumen openikan kel’tedod .Ned openikad tegiheki parahimikš .Koumanden sijan sai Andei Lukin , toižen – Polina Kononova , ezmäižeks tegihe Natoi Aleksejeva .Seičemendes klassas ezmäižen sijan sai – Danil Lonin .
Jogavozne kodvind kodikelen tedoiš
Veps
New written Veps