Texts
Return to list | edit | delete | Create a new | history | Statistics | ? Help
Maria Filatova. Viž vot nece om ani augotiž
Maria Filatova
Viž vot nece om ani augotiž
Veps
New written Veps
Praznikal
ozateldihe kluban ohjandajad , pämest – Larisa Smolinad da toivotadihe Paginklubale pit’käd igäd .Paginklub vaumiči adivoile melentartuižen programman : vastusel pagištihe , vätihe , mušteltihe hüvid päivid , pajatadihe , lugetihe runoid , jodihe čajud .Mi om Paginklub – sen polhe tedaba äjad .Paginklubas mö kirjutim jo äi kerdoid .No ku kundled sen polhe ezmäižen kerdan , ka mö ihastusiš starinoičem sen polhe udes .
KEN EI TEDA PAGINKLUBAD ...
Paginklub om tetab , nacein , jogahižele Petroskoin vepsläižele .Pidab sanuda , miše se tetas äjiš toižiški vepsläižiš elosijoiš .No petroskoilaižile se om erine azj .Ku küläs vepsän paginad voib kundleta irdal , laukas vai susedoilpäi , ka lidnan vepsläižed ei kundelkoi ičeze kel’t , ei pagiškoi kodikelel .Muga maman kel’ , mitte oli konz-se ezmäižen kelen kaikiš sijoiš , lidnas hotkas unohtadas .Nügüd’ ristitud , kudambad tahtoiba kundelta kodikel’t da tahtoiba pagišta sil , voiba tehta sidä Paginkluban vastusil .
Paginklub ”Vepsläižed besedad ” oli tehtud vodel 2011 keväz’kus .Paginkluban augpanijoin oliba kelen oppii , tedomez’ Nina Zaiceva da Helsinkin üläopišton professor Riho Grüntal’ .Siloi norile aktivistoile tuli mel’he idei tehta vastusedpaginad vepsän kelel .Niile kuctihe kaik tahtnikod : ned , kudambad tahtoiba opeta vepsän kel’t vai muite löuta sebranikoid da pagišta ičeze kodikelel .Vastusid zavottihe tehta ühten kerdan nedališ Petroskoin rahvahaližes kul’turkeskuses .Ezmäižele Paginkluban vastusele tuli läz kümned mest .Muga zavodihe Paginkluban elo .Kaikuččen nellänz’päivän ehtal paginklub avaiži ičeze verajad da vastsi adivoid .
MIDÄ PAGINKLUBAS TEHTAS ..
Vides vodes Paginklub om tehnu lujas äi hüvid ehtoid .Vastusile tuleskeliba runoilijad , heile anttihe küzundoid , lugetihe runoid .Oli tehtud-ki erazvuiččid mastar’ –klassoid .Ozutesikš , opetihe panda päle paikad , opetihe plett’a vöid .Ühtes praznuitihe pühid , ühtes johtutadihe lähttud elospäi ristituid .Nored aktivistad kaiken napriba tehta midäse melentartušt adivoiden täht .Hö tahtoiba , miše Paginklubaha tuliži völ enamb rahvast .Maria Košeleva , Paginkluban ühtnik sanub : ”Noriden päs om melid , kut kehitoitta da kaita vepsän kel’t .Mö el’gendam , miše Paginklubaha pidab kucta rahvast , paksumba norid mehid .Voib olda , mö voim ozutada norile , miše vepsän kul’tur om melentartuine , se ei ole vaiše vanhoiden mehiden azj ”.
KELLE PAGIN OM TÄRGED ...
Paginkluban vastusele tuleskeleba eri –igäižed ristitud : pičuižed lapsed , školan openikad , nored prihad da neiččed , rauhadki mehed .Erased jo tedaba vepsän kel’t i tuleskeleba klubaha pagižmaha , tedmaha uzištoid , samha hüvid melid .Tožed ei tekoi kel’t , no tahtoiba kosketadas vepsän rahvahan kul’turaha , tahtoiba tedištada vepsläižiden nügüdläižes elos .
Paginklub ühtenzoitab erazvuiččiden paginoiden vepsläižid .Ved’ paginoile tuleba ei vaiše petroskoilaižed .Internetan kal’t paginaha tartuba Piterin agjan vepsläižed da Karjalan Änižröunan vepsad .Om-ki sido verazmaižidenke .Paginklub om tarbhaine äjiden täht .Kluban ohjandai Larisa Smolina todenzoitab necidä azjad : ”Ku mö vastamoiš viž vot , ka se znamočeb , miše nece om tarbhašt .Se om tarbhašt ei minun täht , a kaikuččele vepsän rahvahan ezitajale .Joga nedalin minei zvon’das , küzeltas : ”Linneb-ik vastuz , voib-ik tulda ?”.Minä olen ozakaz , miše ristitud iče tahtoiba tulda , iče tahtoiba pagišta kodikelel , vastatas toine toiženke .Paginklubas mö tedištam , mi tegesoi ümbri kaikuččes mehes ”.
PAGIKLUBAN JÄL’GIDME ...
Vepsläižel Paginklubal om hüvid satusid .Kluban ohjandai jo äjil konferecijoil da forumoil starinoiči necen radon polhe , saneli , miše se om hüvä azj kelen kaičendan täht .Vepsläižiden jäl’gidme astuiba karjalaižed-ki : Paginkanzu jo amu ühtenzoiti eri –paginoil pagižijoid karjalaižid .Pidab sanuda , miše Paginkluban idei tuli mel’he Šoutjärven eläjile .Heil sündui Paginkera –sebr .
Paginkluban ohjandajad da ühtnikad toivoba , miše heiden rad mäneb vepsän rahvahan hüvüdeks , hö uskoba , miše viž vot nece om ani augotiž , i Paginklub eläškandeb völ äi vozid .
Viž vot nece om ani augotiž
Veps
New written Veps