Texts

Return to list | edit | delete | Create a new | history | ? Help

Kodikelen tundijad luguiš da nimiš

Corpus: New-writing language

New written Veps,

Source: Galina Baburova, Kodima. № 4, 2016, p. 8


Kodikelen tundijad luguiš da nimiš
(Veps)

Vägestamine kelen tedoiš: 2. sulakud Karjalan opendusen kehitoitandan institutas mäni kodikelen olimpiadan regionaline etap.
Keväz’kun lopus Karjalan školiš mäniba olimpiadad, miččiden abul valitihe parahimid kodikelen openikoid. Pidab sanuda, miše nügüd’ Karjalas läz 7000 last opendab päivkodiš da školiš suomen, karjalan da vepsän kelid. Meiden valdkundas vepsän kel’t opetas nelläs sijas: Petroskoin Suomalaižugrilaižes školas, Šokšun, Šoutjärven da Kalagen keskškoliš. Naku neniden školiden parahimad openikad vägestihe kodikelen tedos kesketi. Paiči Änižjärven rajonad olimpiadaha ühtni Präžan, Oloncan, Kalevalan, Medvežegorskan, Kondopogan, Suojärven, Kostomukšan školad, tuliba suomen kelen tedajad Piterin školaspäi-ki. Kogonaz olimpiadradod kirjuti 88 last.
Heiden keskes oliba 4., 7., da 9-11.–klassoiden openikad. Olimpiadad vepsän kelel kirjuti ezmäižes gruppas nel'l' last, seičemenden klassan openikoiden keskes oli mugažo nel’l’ last, vanhembiden klassoiden openikad oli 11. Kut kaiken, lapsile tarbiž oli ozutada kodikelen tedoid paginas da kirjutandas. Pidab sanuda, miše lapsed hüvin kirjutiba olimpiadradoid. Balloiden lugumärad oliba ani ühteiččed. Žurij oukud lujas ihastoitiba lapsiden starinad märitud temoihe, openikad čomin andoiba vastusid küzundoihe.
Nelländen openduzvoden openikoiden keskes ezmäižen sijan sai Milana Karpova, toiženDarja Kirillina, koumandenDarja Figurina. Kaik neičukaižed oma Kalagen školan openikad. Heiden opendai om Ol’ga Mironova. Pidab sanuda, miše Ol’ga Jevgenjevnan openikad lujas paksus tegesoiš olimpiadan vägestajikš.
Seičemenziden klassoiden openikoiden keskes vägesti Danil Lonin Petroskoin Suomalaižugrilaižes školaspäi. Opendai om Nadežda Petrova. Toižen da koumanden sijan saiba noren vepsän kelen opendajan Anastasia Konošenkon openikad Šoutjärven školaspäi Maksim Kudr’avcev da Jelizaveta Volkova.
Vanhembiden klassoiden openikoiden keskes vägestajaks tegihe Kalagen openik Al’ona Mališeva. Hänen vepsän kelen opendai om mugažo Ol’ga Mironova. Nadežda Petrovan kaks’ neičukašt Petroskoin Suomalaižugrilaižes školaspäi sai toižen da koumanden sijanNatalja Aleksejeva da Polina Kononova.
Kaik parahimad olimpiadan openikad saba diplomad da muštlahjad. Olimpiadan vägestajad-žo lähteba matkaha Suomehe.