Texts

Return to list | edit | delete | history | ? Help

Ekologijan kinofestival’

Corpus: New-writing language

New written Veps, Journalistic texts

Source: Valerii Sidorkin, Kodima. № 5, (2016), p. 7

Ekologijan kinofestival’
(Vepsian)

Uz’ vägestuz: Fil’m vepsän kelel möst sai vägestusen ühtes konkursan nominacijoišpäi.
Petroskoiš kudendel kerdal oli tehtud Rahvazkeskeine ripmatoi Barenc-ekologine fil’mfestival’, (Barenc ecologi film festival). Sen tegijad oma valdkundan Karjala-Norvegii-sebr da norišton Solveig-klub.
Vides päiväs festivalin žuri da kacujad tundištihe lühüdda täuz’metražiden vändfil’ moidenke, dokumentaližiden da animacijan fil’moidenke. Fil’moiden tegijad oma kino-ohjandajad Venämaspäi, Norvegiaspäi, Franciaspäi, Ispaniaspäi, Velikobritaniaspäi, Suomespäi, Germaniaspäi, Ukrainaspäi, mugažo ekzotižiš maišpäiIndiaspäi da Meksikaspäi.
Kut sanub festivalin nimi, fil’mad oliba londusen ekologijan polhe da sen problemoiden polhe.
Karjalad festivalil eziti fil’m vepsän kelel (venän da anglian kelen subtitroidenke). Fil’man nimi om Paimnen torvut. Sen tegijad oma Larisa Čirkova da Vladimir Slavov. Idejan fil’man täht andoi Sattuma-gruppan tetab muzikmez’ da muzikinstrumentoiden mastar’ Dmitrii D’omin. Fil’m om omištadud vepsläižele paimnen torvudele, mittušt nügüd’ jo ei sa kulištada küliš.
Festivalil jäl’gmäižen päivän vägestajile da laureatoile lahjoitihe diplomid. Fil’m vepsän kelel om tehnus laureataks Karjalanominacijas. Laureatoiden keskes oliba mugažo Rebalda-fil’m (Belomorskan šol’l’oiden püdajiden polhe), Jelena Otrepjevan Moskvički-fil’m, Tiina Saarion Erämaan lumo-fil’m, meksekanmehen Eduard Kuirozan The Primordial Turtle-fil’m (ogibaloiden čerepahoiden polhe) da indeican Sumeša LekhinBastion of the Giants-fil’m (slonoiden polhe).
Barenc ekologižen fil’mfestivalin gran-pri oli anttud venälaižele kino-ohjandajale Tatjana Sobolevale Poslannik Bol’šoi zemli-fil’mas. Se starinoičeb Sibirin londusen kaičuztahos.
Festivalil oli tehtud Černaja kniga-projektan prezentacii. Sen tegii om Piterin socialižiden projektoiden sebr. Nece projekt om oigetud planetal kadonuzile živatoile da linduile.