Texts
Return to list | edit | delete | Create a new | history | Statistics | ? Help
Minun unohtamatoi sulaku
Minun unohtamatoi sulaku
Veps
New written Veps
Üläopenikoiden
elo : Opendamoi Piterin universitetan filologižen fakul’tetan venän kelen da literaturan tedokundal .Tedan vepsän kel’t .Keväz’kus tundištimoi konferencijal Nina Zaicevanke .Minä iče ühtnin üläopenikoiden konferencijaha sulakus – siš da toižiš azjtegoiš tahtoin starinoita .
Sulaku oli lujas bohat azjtegoil minun täht .Sulakun 2.päiväl minä vedin konferencijad tataran kelen kirjamišton istorijadme .Nece istorii om jügedahk : 1927.vodhesai tataralaižed kirjutiba araban kirjamištol , 1927-1939-voziš oli latinan kirjamišt ”Janalif ”, a 1939.vodelpäi – kirilline kirjamišt .Minun prababoi , tataralaine , iče starinoiči minei , kut kirjamištod vajehtihe hänen sil’miš .Hän eli Iževsk-lidnas , Udmurtijas , siš eläb-ki nügüd’ minun armaz baboi-ki da hänen heimolaižed .Kaikuččel kezal minä oleskelen hänenno da openzimoi lujas hüvin udmurtan kel’t .Minä voin lugeda , kulda , el’geta udmurtaks .Muloi ühtnin Udmurtijas Kezaškolha , mitte völ lujemba vahvišti minun udmurtan kel’t .No baboi ei teda da ei voi pagišta udmurtaks , a tataraks – pagižeb !Minä amu jo tahtoin oppida tataran kel’t-ki i uhokus löuzin Tatarstanan kaikenaigaižen ezitaikundan Piteriš tataran kelen kursid !Nügüd’ minä kävun nenile kursile .
Sulakun 6.da 9.päivil minä kävuin teatraha ristituidenke tataran kelen kursišpäi .Mö kävuim tatarankeližile spektaklile , miččiden nimed oliba ”Hodža Nasretdin ” da “Bankrot ”.Spektaklid oliba Sures Dramatižes Teatras .Ned oli hüvin tehtud .I hot’ minä en el’gendand tegendad hüvin , üks’kaik minei tuli lujas mel’he , sikš miše mugoi azjtego ei ole paksus !
Sulakun 16.päiv oli ühthiždiktantoiden päiv .Minä kirjutin totališt diktantad venän kelel kahtenden kerdan da diktantad udmurtan kelel nelländen kerdan .Kut minä jo tedan , diktantan minä kirjutin videle , hot’ se ei olend kebn .Sen tekstoiš om lujas äi sijoid , miččiš keskznamoid voib panda erazvuiččin , i kaik-se linneb oiktaks .Oliba-ki jügedad orfografižed sijad da punktuacii .Udmurtan diktantad lugetas Minun Udmurtii-radiodme i sikš voib tehta audiokirjutesen da kirjutada sidä möhemba .Sikš ku minä läksin kirjutamha ”Totališt diktantad ”, minä pakičin tehta audiokirjutesen da kirjutin udmurtan diktantad toižel päiväl .Toivon , miše olen kirjutanu sen hüvin , sikš miše männuzil vozil minai oliba korktad ballad .Sulakun 20.päiväl minä ühtnin meiden universitetan üläopenikoiden konferencijaha .Sen suomalaiž-ugrilaižes sekcijas minä starinoičin ičein nügüdläižes tös : minä kändan venäkel’he vanhan ižoran kelen grammatikad , mitte oli kirjutadud ižoran kelel völ 1936.vodel .Siloi ižoran kel’t opetihe školiš kuti maman kel’t .Sen grammatikan terminologii om minun kurstön tem .Iče ižoran kel’ om üks’ Venäman suomalaiž-ugrilaižiš kelišpäi , om mugažo üks’ Leningradan agjan igähižiden vähäluguižiden rahvahiden kelišpäi .Kel’kandajad – ižoralaižed – eläba nügüd’ Kingiseppin da Lomonosovan rajonoiš .Heiden päkülä om Viistina (minä olin siš ).Kelel pagižeb ei enamba , mi 150 mest .Äjäd ristitud , kenes valub ižoralaine veri , tahtoiba oppida sidä .Hö da kel’tedomehed , kudambad ei tekoi ižoran kel’t , ei voigoi el’geta ižorankelišt tekstad .Sikš minä radon sen känduses .
Sulakun 26.päiväl kävuin ”Totaline diktant ”- lahjoičendale .Minä sain siš viž-arvznaman !Mugoižid ristituid om lujas vähä : kaikes Piteriš 6400 ristituspäi läz 80.Ceremonii Norištonteatras Fontankajogel oli organizoitud lujas hüvin .Meiden ”päorfograf ”, Totaližen diktantan komissijan ezimez’ Piteriš S .V .Drugoveiko-Dolžanskaja lugi diktantan värtekstad , miččihe oli keratud ühtnijoiden kaikid ilosižed kulemižvigad .Lahjoičendan jäl’ghe hän iče allekirjuteli vägestajiden sertifikatoid .I tetpas , oliba hüväd lahjad .
Tahtoižin , miše oliži mugoine vepsänkelineki diktant .Diktuida sidä voiži Karjalan radios , a sen jäl’ghe panda se saitha .Kodvda ičtaze nikonz ei linne liigaks .
Minun unohtamatoi sulaku
Veps
New written Veps