Texts
Return to list | edit | delete | Create a new | history | Statistics | ? Help
Maria Košeleva. Nägemoiš, keza! Tervhen, sügüz’!
Maria Košeleva
Nägemoiš, keza! Tervhen, sügüz’!
Veps
New written Veps
Täl
vodel lidnan päiv , mitte vedetas jogahižen voden jäl’gmäižil kezakun lebupäivil ei ole ozastunu kaikile tetaban ozatomuden taguiči .No lidnan valdmehed pätiba , miše ei sa jätta lidnalaižid praznikata da oma sirdänuded sen sügüz’kun augotišhe .Praznikale anttihe ani toine nimi , se ei ole oficialine lidnan päiv , se oli uz’ lidnalaine LETO .PTZ - perehen praznik .Se oli mugoine azjtego , miččel voinuiži ühthevedeta kezan satusid da sanuda kezale ”nägemoiš ”.
Praznik oli sobatan , 10.päiväd sügüz’kud , sä ei olend lujas päipaštokahan , taivaz oli pil’viš , no kaikense se ei telustand perehile kävelta lidnadme da kacta , midä sigä tegese .Praznikan tegijoile ozastui hüvin säta kogonaižen melentartuižen programman , miččehe , nacein , mülüi kaik , midä tarbiž jogahižele lidnan eläjale : oli azjtegoid kut lapsiden , muga aigvoččiden-ki ristituiden täht .Täl kerdal suremb tarkuz’ oli oigetud ei sport - da kul’turazjtegoile , kut nece tehtas lidnan päiväl , a Karjalan vaumištajiden radoho , niiden satusihe .Kaikid satusekambid vaumištajid pauklahjoitihe praznikan päscenal .
Päprazniksijan tradicijan mödhe oli Änižen randird , pidust mittušt paiči päscenad oli äi toižid melentartuižid lavoid .Sikš ku praznik oli sidotud kezan lophu , lidnan eläjad voiba tundištadas äjiden Karjalan vaumištajiden tavaroidenke : suriden da peniden radištoidenke , živattanhoiden da kanzoiden elomištonke da rahvahiden mastariden radonke .Mugažo jogahine tahtnik sigä voi abutada Koditomiden živatoiden pertile , kävuda karjalaižiden mastariden ozuteluz-jarmarkaha da äi toišt .Kundaližiden sebroiden rividen keskes voi vastata mugoižid rahvahaližid sebroid , kut Šoutjärven rahvahaline etnografine muzei da Mel’nic-fond Präžaküläspäi .Täl kerdal praznikan päsijal lidnalaižed voiba tundištadas mugažo Petroskoin norišton-ki sädandkollektivoidenke da sebroidenke .
Päscenal adivod , kut tobjimalaz-ki , voiba tundištadas erazvuiččiden kollektivoiden sädandradonke .Petroskoin da läheližiden agjoiden artistad kargaižiba , pajatiba , lugiba runoid , ühtel sanal – tegiba muga , miše lämbitada lidnalaižid vilul sügüz’ližel päiväl .Koncertan ezitajan täl kerdal oli popul’arine Infiniti – muzikjouk , miččen muzikad tuliba kundelmaha äi norištod da perehid .Tradicijan mödhe praznik lopihe čomal praznikaližel lämoiambuskelusel .
Praznikan aigan avaitihe Kanzan pukujo , mitte , tegijoiden sanoiden mödhe , tegihe koviden da üks’meližiden perehkosketusiden lidnan znamaks .Petroskoin perehed ištutiba 150 pud – vahtarid da raidoid .Pukujon nimi om ”Perehine ”, a jogahižes ištutadud pus rippub sen ištutanuden kanzan familii .
Voib sanuda , miše praznik oli hüvän , sen tegijoile ozastui ližata vanhaze praznikaha miččen-se uden formatan i , ku nece idei kehitoittas edembaki , praznikal oma kaik šansad tehtas völ popul’arižembaks , mi se oli nügüd’ .”Nägemoiš , keza ! Tervhen , sügüz’ !”– mugoižil sanoil lopihe nece praznik . Toivotam , miše sügüzel meiden lidnas linneb äi uzid da melentaruižid azjtegoid , miččed tuleba mel’he jogahižele lidnalaižele da abutaba lidnale kehitoittas edemba-ki .
Nägemoiš, keza! Tervhen, sügüz’!
Veps
New written Veps