Texts
Return to list | edit | delete | Create a new | history | Statistics | ? Help
Maikki Spitsina. Matka Kalevalašta Pohjolah alko
Maikki Spitsina
Matka Kalevalašta Pohjolah alko
Karelian Proper
New written karelian
Tuiskukuun 10.päivänä
Kiži-musejošša avautu mukava Kalevalašta Pohjolah -näyttely .
Enšimmäini näyttelyteatteri avautu Kiži-musejon näyttelykeškukšešša .Še on omissettu Kalevala-eepossalla .Näyttelyn korissukšena on käytetty teatteritaijon ilmekkyškeinoja : lavaššukšie , erikoisvalotušta , iänieffektijä .
Kalevalašta Pohjolah -näyttelyššä vierahat voijah ei ainuoštah nähä kummallisie eksponattija .Heilä on mahollisuš matkuštua muinoista Kalevalua myöten , käyvä Louhen taloh , šelailla Lapšien ”Kalevala ” -šähkökirjan šivuja , paššauttua karjalaista pukuo , šuorittua ihmehelliset muutokšet , leikkie , piäššä vaikeijen tehtävien läpi , šuaha kiini Hiijen hirven šekä takuo Šampomelličän .
Uuši näyttely avattih runošanoilla .Lapšilla , kumpaset tultih näyttelyn avajaisih , še oli tovellisena löytönä – ihanko tosieh juuri niin šoitti kantelehta vaka vanha Väinämöini ?Koululaiset piäštih tovelliseh interaktiiviseh teatteriesitykšeh ta heijät kučuttih miellyttäväh matkah , kumpasešša hyö niin kun Kalevalaeepossan šankarit Väinämöini , Lemminkäini , Ilmarini matkuššettih Kalevalan muašta Pohjolah Meččolan ta Ahtolan paikkojen kautti .
– Tiälä voit kaikkie liikuttua , kuot’ella ta kačella , a vet tavallisissa näyttelyissä eksponattija ei šua koškie , kerto vaikutelmieh näyttelyn nuori kävijä Ksenija .
Näyttelyn luatijien šanojen mukah , iče runot miärättih šemmosen teatteriluonnon näyttelyllä .Näyttelyn peruštamisen ideja šynty musejošša harjottelujen jälkeh , mit oli omissettu eepossalla .Musejoruatajat huomattih , jotta lapšie kiinnoššetah ”Kalevalan ” šankarit ta hyö piätettih esittyä šen muinosen muajilman .
– Meilä himotti avata lapšilla šuurta ta šalaista eepossan muajilmua , jotta heijän ois mukava šuaha tietyä eepossašta , meijän perinnöštä , ta jotta hyö oltais ylpeitä šiitä , šelvitti näyttelyn luatija Natalja Arhipova .
Mitä ennein-vanhah šyötih , mistä keitettih olutta , mitä Šampomelliččä anto rahvahalla – vaštaukšet näih kyšymykših koululaiset iče löyvetäh näyttelyššä .
Kiži-musejon enšimmäisen näyttely-teatterin valmistamisešša autettih Karjalan kuklateatteri , Tatjana Kalininan Kuklatalo-näyttelyšali , Taitehmusejo , Kanšallini kirjašto .Kaikin yheššä hyö luajittih näyttelyn puolešša vuuvvešša .
– Tiälä voit kaččuo esinehie , lukie tietoja niistä ta kappalehie Kalevalan runoista , leikkie . Ilman leikkie tiälä mitänä ei voi olla , šentäh kun leikiessä lapšen on mukavampi šuaha tietyä uutta ”Kalevalašta ”, eepilliseštä runouvešta .Ta kaikki še ottau alkuh meijän istorijašta ta kulttuurista , korošti Kiži-musejon johtaja Jelena Bogdanova .
Kalevala-eepossan teema miellyttäy lapšie , a uuši näyttely avuau lapšilla eepossan ta auttau ymmärtyä šitä .
Kalevalašta Pohjolah -näyttelyh voit tuttavuštuo 25.kešäkuuta šuaten Kiži-musejon näyttelykeškukšešša Fedosovan kavulla , 19.Kävijillä järješšetäh mukavie oppimatkoja ta muasteri-oppija .Šen lisäkši leikkihuonehešša lapšie vuottau monta stolapelie , värityštä šekä pieni kuklateatteri .
Näyttelyn vierahien šanojen mukah , heilä šynty yhtevyštunneh , vet još piäššä yhteisvoimin kaikkien tehtävien läpi , niin hyvä varmašti voittau pahan .
Matka Kalevalašta Pohjolah alko
Karelian Proper
New written karelian