Texts
Return to list | edit | delete | Create a new | history | Statistics | ? Help
Anastasija Lebedeva. Minun died’ois da minus
Anastasija Lebedeva
Minun died’ois da minus
Livvi
New written Livvic
Tartu
kynäh -rubriekku jatkuu .Täl kerdua painammo kerras nellän livvikön kirjutettuu materjualua .Net nuoret kirjuttajat ollah Petroskoin valdivonyliopiston nelländen vuozikursan opastui Anastasija Lebedeva , Čalnas eläi Vera Noskova , alavozelazet Vera Larionova da Vera Kondratjeva .
On räkki heinykuun päivy .Nengozet päivät jiäjäh mustoh loppumattominnu .Koirat peitytäh pilveksizeh , vahnat huogavutah murginan jälles .Minä olen kezän aigua kyläs .Minä en nähnyh ni muamua , ni tuattua jo läs kahtu kuudu .Siä on poudu , kai on kirkas päivänvalgies , kai kibjei on kaččuo .Minä vuotan muamua gostih lebopäivikse .
Lapsusaijas jo minä en ihailluh miehii .Tuatto ruadoi taksatorannu , häi oli mečäs kogo kezän , da ku häi ei olluh mečäs kezäl , häi ryyppäi viinua kois , Petroskois .Sygyzyl myö hänenke vastavuimmo – hänel kazvoi pardu da laihtui vačču .Enzimäzes silmänlipahtukses minä hämmästyin : ongo tämä endine tuatto vai uuzi mužikku ?Ahah , endine on , kuččuu minuu sulavasti – Nasten’ka .No olgah , lähten
sebävymäh .
Naizethäi oldih minun mieles parembat .Buabo oli pehmeisydämelline , häi minuu äbäzöičči , keitti rokkua da pastoi piiruadu da val’l’oidu .A muamo ...Muamo oli kaikis paras .Hänel oli muga äijy edusijua !No enne kaikkie oli muaman nuorus da čomus .Nygöi minä ellendän , ku häi sežo oli lapsi .Muamal oli silei valgei nahku , turbiet tukat , suuret vihandat silmät da hänen huulil oli ruskei pomuadu .Kai kylän lapset minuu kadehtittih .
...On räkki hienykuun päivy . Minä jo hyvin tiijän , mi on tovelline igävys .Oraskuus myö tulimmo Siämärveh .Muamale pidäy ruadua täytty vägie .Telefonua täs meil ei ole .Kezämökkilöis eläjät tullah da lähtietäh iäres .Minä rubien huolevumah , syväin kydöy .Tänäpäi häi tulou nepremenno .
Buabale muaman tulendu oli suuri ihastus .Tiettäväine , voibihäi vahnu akku huogavuo bunukas hos kaksi-kolme päiviä !Tytöl on muamo , da muamal pidäy puaksumbah tiijustua tytärdy .Da i midäbo häi yksinäh ruadau kogo kezän linnas , konzu ukko on mečäs ?Ruadaugo vai laškistelehes ?
Täl räkel heinykuun päiväl minä en voi istuo viluččazes kois .Minä pal’l’ahilleh menen pihale , kapsahtammos , nouzen saruale .Täs meil on kummalline taloi .Kaksi pertii ”tartuttih bokin ” toine toizeh , rouno ku siamilazet kaksozet .Vahnas kois eletäh deda Miša da baba Kat’a .Heil on suuri talovus : peldo , ogrodu , žiivatat .Heidy kyläs kunnivoijah .Deda Miša on died’oin velli .Enne minun buabo da died’oi elettih Petroskois omas pienes kois , a sit muutettih fatierah .Died’oi tahtoi eliä kezil suuren rodukunnan koin rinnal , sendähgi piätti tuvva oman koin Petroskoispäi Siämärveh .
Minule saruaspäi avavuu levei nägöala : piha , tie , laukku , vahnu škola , meččy .Tiäpäi , mečäspäi , hänel pidäy tulla .Minä pilčistän silmii , luimotan kačon .Čirittäy , laukan levo čilkettäy päiväzel .
Silkeskie minun tagan närizöy lat’e .Šohistah kuivat lehtet – deda Miša kobizou vastoinke .Häi sanou minule midälienne , minä hörkistän korvua – “ku häi ajoi poujezdal , on jo aigu tulla kyläh ”.Deda Miša tavan mugah börböttäy muga hil’l’azeh da laškah , ga minä en voi ellendiä , pagizougo häi ven’akse vai karjalakse .
Minun sydämes tuli tuhahtahes kirkahambi da ilozembi , migu pihal täl räkel heinykuun päiväl .Muamo ozutahes mečän tagua .
Ainavo ristikanzu , kuduale muaman tulendu on läs atkal tapahtumu , on minun died’oi .Kezä on hänen aigu .Myö kai luajimmo yhtes : kävymmö meččäh sieneh da marjah , opastummo kirjuttamah , valelemmo vagoloi , panemmo mustoh kirjaimikkuo , lämmitämmö kylyy , resuičemmo kajoloi , kaivammo čyöttölöi , luvemmo iänehkniigua “Pro Veru i Anfisu ”, ongitammo , ližiämmö da vähendämmö luguloi , sovvammo järvie myö died’oin vahnal venehel , kudai muga hyväle tulou nenäh terval .Died’oi suvaiččou lapsii , ga enämbäl kaikkii häi suvaiččou minuu .
Nygöigi on , tiettäväine , räkkii heinykuun päivii , vaiku minä olen nygöi igävy , vändžäkkö nuori naine .Minul räkes piän kivistäy da jallat puhaldutah .On i kylä samal kohtal , meijän pieni kodi seizou yksinäh da niken sinne ei ajele .Koirat peitytäh pilveksizeh da lapset pal’l’ahilleh han’n’atah pihua myöte .Ku minä igävöičen muamua , soitan hänele .Ga died’oidu ei ole enämbiä täl ilmal .Da konzu minä sen suuren kaimavon ellendin , oli jo myöhä .
Minun died’ois da minus
Livvi
New written Livvic