Texts
Return to list | edit | delete | Create a new | history | Statistics | ? Help
Galina Baburova. Möst valitihe parahimad
Galina Baburova
Möst valitihe parahimad
Veps
New written Veps
Openduz
: Ezmäižel päiväl sulakud Karjalan opendusen kehitoitandan institutas möst mäni kodikelen olimpiadan regionaline etap , miččel valitihe parahimad rahvahaližiden keliden tundijad .
Kut i kaiken , ezmäi keväz’kus Karjalan školiš mäniba olimpiadad , miše valita parahimid kodikelen openikoid .Nece oli muga nimitadud municipaline etap .Municipaližen etapan vägestajad jo ühtniba regionaližehe etapaha da vägestihe kesketi rahvahaližiden keliden tedoiš .Meiden valdkundas vepsän kel’t opetas nelläs sijas : Petroskoin Suomalaiž-ugrilaižes školas , Šokšun , Šoutjärven da Kalagen keskškoliš .Täl vodel paiči openikoid neniš nelläs školaspäi olimpiadan regionaližehe etapaha ühtni üks’ priha Vidl-küläspäi .
Kogonaz oplimpiadaha ühtni 73 last .Nene oma Präžan , Oloncan , Kalevalan , Änižjärven , Medvežegorskan , Kondopogan , Suojärven rajonoiden školiden openikad , mugažo lapsed Petroskoin ümbruzkundaspäi , Piterišpäi da Piterin agjaspäi .
Heiden keskes oliba 4.-5.da 9-11.-klassoiden openikad .Olimpiadan vepsän kelel kirjuti ezmäižes gruppas viž last , vanhembiden klassoiden openikad oli ühesa : kuz’ last , kudambad opendasoiš ühesandes klassas da koume last , kudambad opendasoiš ühtendestoštkümnedes klassas .Olimpiadal lapsile tarbiž oli ozutada kodikelen tedoid paginas da kirjutandas .Kodvdihe lapsiden tedoid grammatikas , leksikan tedoid , pagin - da kirjutandmahtoid .Norembiden klassoiden openikoile tarbiž oli eskai lugeda čomin tekstoiden paloid än’heze , miše žurijouk voinuiži kodvda , kut hüvin laps’ ei vaiše el’gendab tekstan jüväd , no mahtab-ki virkta vepsän kelen sanoid .Žurijoukuihe mülüi keliden opendajid , tedomehid , lehtezmehid .Vepsänkeližid radoid kodviba Ol’ga Žukova , L’udmila Aleksejeva , Tatjana Gorškova , Maria Filatova , Maria Košeleva da Galina Baburova .
Olimpiadan avaidamine mäni institutan praznikzalas .Sigä tervehtoittihe olimpiadan ühtnikoid , heiden täht eziniba rahvahaližed karg - da pajokollektivad .Olimpiadan tegijad tovotiba satusid da ozad openikoile .Holevad opendajad andoiba ičeze nevondoid .Sid’ lapsed mäniba märitud honusihe .Paginad taritud temoile mäniba eriližiš honusiš , kus žurijouk voinuiži kaikes tünudes pagišta kaikuččen openikanke da tehta hänele küzundoid .Kaik paginad oli kirjutadud diktofonoile .Kogonaz olimpiadradon kirjutamižele oli anttud koume časud .Päliči koumes päiväs oli tehtud ühthevedod .
4. da 5.openduzvoden openikoiden keskes ezmäižen sijan sai Darja Kirilina Kalagespäi , toižen – Rozalia Lazar Šokšun školaspäi , koumanden – Milana Karpova Kalagen školaspäi .
9.-10.-klassoiden openikoiden keskes vägesti Vladimir Romanov Vidlaspäi , toižen sijan sai Petroskoin Suomalaiž-ugrilaižen školan openik Polina Kononova , koumanden – Jana Naumova Šoutjärvespäi .
11. – klassoiden openikoiden keskes vägesti kaks’ neičukašt Kalagen školaspäi – Al’ona Mališeva (ezmäine sija ), Jelena Medvedeva (toine sija ) da üks’ Petroskoin suomalaiž-ugrilaižes školaspäi – Natlia Timbajeva (koumanz’ sija ).
Kaik parahimad olimpiadan openikad saiba diplomad da muštlahjad .Tradicijan mödhe , olimpiadan vägestajad lähteba matkaha Suomehe .Pidab ližata , miše vägestuz olimpiadas voib abutada openikoile päzundan aigan universitetha .
Kodima-lehtesen radnikad ozateleba openikoidvägestajid da heiden opendajid , toivotaba heile tulijoid satusid openduses da rados .
Möst valitihe parahimad
Veps
New written Veps