Texts
Return to list | edit | delete | Create a new | history | Statistics | ? Help
Kristina Strelkovič. Lapesd lugeba Virantanast
Kristina Strelkovič
Lapesd lugeba Virantanast
Veps
New written Veps
Meiden
Šoutjärven školha vilukus oli anttud uded kirjad .Minä , kut vepsän kelen opendai , jo olen tednu , miše nene kirjad oma .No openikole 10.-11.klassoišpäi oli lujas melentartušt tedištada niiš .Heil oli äi küzundoid , sikš pätin , miše tarbiž tundištoitta openikoid uziden kirjoideke .Üks’ niišpäi om ”Virantanaz ”.Sen painusen päerigoičuz om siš , miše se om nelläl kelel – suomen , estin , vepsän da venän kelil .
Meile openikoidenke ozastui olda urokoil Kalevalan mödhe Šoutjärven etnografižes muzejas .Sigä mugažo tehtihe pen’t rindatust Virantanaz-eposanke .Lapsed oliba jo tedištanuded Kalevalad , no Virantanaz-kirjan polhe hö kuliba ezmäižen kerdan .Sikš mö pätim lugeda necen kirjan vepsän kelen urokoil .Mugažo , miše urokad oližiba melentartuižembad , mö otim vepsän radion efirad .Sigä-ki lugetihe Virantanast .Päliči koumes urokas i kahtes koditös kirjad oli jo lugetud .Mö zavodim jagatas ičemoi mel’pidoil .Openikad oliba sures ihastuses .Naku nene oma heiden Virantanhan arvostelused :
Lilia Danceva , 10.klassan openik
Virantanaz-kirj om minei mel’he .Se vähäižen johtuti minei Kalevalad , sen hengid .Ozutesikš , Aira koskub Ainoho .Kirj lugetas kebnašti , ühtel hengitusel .
Arina Žerebcova , 10.klassan openik
Ei amu mö klassanke lugim Nina Zaicevan Virantanaz-kirjan .Nece kirj om paindud ei amu .Sidä ani kebn lugeda i se om kätud nelläha kel’he .Kirj starinoičeb Viran kanzan polhe , mectusen , armastusen da veroiden polhe .Kirj om lujas hüva da melentartuine .Sišpäi voib tedištada äi tedoid vepsläižen kul’turan polhe .Vepsläižid jäi vähän , no heiden kul’tur da kel’ kaičese kirjoiš , runoiš , pajoiš da neciš eposas .Minä meletan , miše nece kirj om arvoine kirjlaukoiden paličoiden täht .
Karina Safonova , 11.klassan openik
Minä olen tundištanus Virantanaz-eposanke vepsän kelen urokoil .Necen kirjutesen tegii starinoičeb vepsän rahvahan elos , veroiš i kul’turas .Minei om mel’he Virantaz-epos , sikš miše sigä om äi vepsän kul’turan erigoičusid : veroid , puhegid , pajoid , voikuid .Sigä ozutadas vepsän mehen taba .Sen pähenged oma Vir , kudamb tegi ičeze tanhan , Viran ak – Aira , da toižed henged – Anni , Talli , Vallöi-paimen .Minun melen mödhe , nece kirj om lujas kebn lugemižen täht .Minä meletan , miše kaikuččele mehele , kudambale om melentartušt vepsän kel’ da kul’tur , pidab lugeda necidä eposad .Hänele linneb lujas melentartušt putta vepsän rahvahan miruhu .
Jevgenia Razumova , 11.klassan openik
Minei tuli mel’he vepsläine Virantanaz-epos , i sen lugemižen jäl’ghe minun henghe jäi hüvä tundmuz .Minun melen mödhe , nece kirj linneb melentartuižen kaiken mehiden täht .Virantanaz tundištoitab ičeze lugijad vepsän kul’turanke , tradicijoidenke da veroidenke .Minä meletan , miše jogahižele mehele pidab lugeda se , miše olda läheližemba vepsän kul’turannoks .
Vladimir Kikinčuk , 10.klassan openik
Minei tuli mel’he Virantanaz-epos .Neciš kirjas starinoitas Vir-pähengen elon istorijas , hänen kanzas , sigä om vepsän veroid , miččiden mödhe elitihe hänen tanhal .Oli lujas melentartušt lugeda – minä kaikile nevon necidä kirjad .
Lapesd lugeba Virantanast
Veps
New written Veps