Texts
Return to list | edit | delete | Create a new | history | Statistics | ? Help
Ol’ga Žukova. Kel’tedon olimpiad möst kerazi openikoid
Ol’ga Žukova
Kel’tedon olimpiad möst kerazi openikoid
Veps
New written Veps
Kaikuččen
keväden školan openikad keradasoiš Petroskoihe , miše ozutada ičeze kel’tedoid .Sulakun 7.päiväl oli tehtud regionaline olimpiad , miččel lapsed vägestihe ičeze mahtoil karjalan , vepsän da suomen kelen tedoiš .Olimpiadan tegijan om Karjalan opendusen kehitoituzinstitut .
Olimpiadradod zavodi praznikavaiduz , kus openikoile sanutihe lämid vaihid Opendusen , Kul’turan da Rahvahaližen politikan ministerstvoiden ezitajad .Tuli sanumaha tervhensanoid Suomen konsul Tarvo Nieminen .Kaik hö sanuiba siš , kut om tarbhašt opeta kodikelid školiš .
Lujas čomitiba avaidust kantelel vändajad neičukaižed Kalevalaspäi .Veronika Košeleva Kotkojärv’ - küläspäi hüvin lugi Z .Dubininan runon livvinkarjalaks .Suomalaiž-ugrilaižen školan openik Polina Kononova lugi runon , miččen hän kirjuti iče vepsän kelel da ozuti videorolikan – necen runon venäkeližen variantan .
Täl vodel olimpiadaha ühtni läz kahesadkümned mest .Tuliba openikad Petroskoišpäi , Karjalan rajonoišpäi da Piterišpäi .Vepsän kelen tedod kactihe kahtes gruppas : 4.-5.klassan openikad da 9.-11.klassan openikad .Norembas gruppas oli kuz’ last : Roza Lazar , Darjana Treskina , Zahar Korkin , Arina Koz’uk , Polina Biševa , Nast’a Lobanova .
Vanhembaha gruppaha ühtni mugažo kuz’ openikad : Marina Mališeva , Marina Ščerbakova , Maria Kočerina , Polina Kononova , Jekaterina Pol’akova , Darja Ivanova .
Om lujas žal’ , miše necil vodel ei tulnugoi vepsläižed lapsed Piterin agjaspäi .Nägub , miše peniden školiden saubatuz tegi huban azjan kelen opendamižes .Konz-se Piterin agjaspäi tuleskeliba openikad eskai nelläs školaspäi .Nügüd’ kaik om vajehtanus i ei hüväha polehe .
Täl vodel olimpiadtös kaikuččel openikal oli viž tegendad , miččed ozutiba erazvuiččid tedoid : kut openik el’gendab lugetud tekstad , kut iče hän mahtab kirjutada da pagišta , mahtab-ik tehta oiktoid grammatižid formid .
Noremban gruppan töid arvostiba školan opendajad : Maria Mironova Kalagespäi , Ales’a Anušenkova Šoutjärvespäi da Petroskoin Suomalaiž-ugrilaižen školan opendai Nadežda Petrova .Vanhembiden openikoiden tedoid kacuiba : ”Kodima ”- lugendlehtesen pätoimitai Irina Sotnikova , Karjalan opendusen kehitoituzinstitutan metodist Tatjana Gorškova da Petroskoin universitetan opendai Ol’ga Žukova .
Lapsed tarkašti tegiba kaik tegod , meletiba da holduiba .Kense paremba tedab kel’t , ken-se – hondomba .Konz kanzas pagištas kelel , lapsele nece lujas abutab .Nägub , miše opendajad-ki paneba äi väged opetes lapsid kel’he .Arvostelijoiden polespäi toivotam kaikile openikoile tahtod da mahtod vepsän kelen opendamižes .
I ozatelem vägestajid !
Olimpiadan rezul’tatad tuliba mugoižed : Norembas gruppas ezmäižen sijan sai Šokšun školan videnden klassan openik Roza Lazar , toižen – Darjana Treskina , Šoutjärven školan videnden klassan openik , koumanden – Zahar Korkin , Suomalaiž-ugrilaižen školan videnden klassan openik .Vanhembas gruppas ezmäižen sijan sai Kalagen školan kahesanden klassan openik Marina Mališeva , toižen – Kalagen školan kümnenden klassan openik Maria Kočerina , koumanden – Jekaterina Pol’akova , kümnenden klassan openik Suomalaiž-ugrilaižespäi školaspäi .Mugažo ozatelem Suomalaiž-ugrilaižen školan ühtendentoštkümnenden klassan openikad Polina Kononovad , kudamb sai ezmäižen sijan .Vägestajid varastab čoma lahj – matk Suomehe .
Kel’tedon olimpiad möst kerazi openikoid
Veps
New written Veps