Texts
Return to list | edit | delete | Create a new | history | Statistics | ? Help
Muamonkielen päivä Kiestinkissä
Muamonkielen päivä Kiestinkissä
Karelian Proper
New written karelian
Tuiskukuun 19.päivänä
Kiestinkin karjalaisien kulttuurišeurašša loppu karjalan kielikurššien kolmaš kauši .Kurššien viimeni harjottelu oli omissettu Kanšainvälisellä muamonkielen päivällä , kumpaista juhlitah 21.tuiskukuuta .Toimehpito järješšettih kyläkirjašton tiloissa , šentäh kun karjalan kielikurššija kolme vuotta peräkkäh oli pietty juuri Kiestinkin kirjaštošša .
Tapuamisen avasi meijän karjalan kielen opaštaja Tatjana Koval’ova .Hiän kerto kurššien kolmannen kauven lopputulokšista ta kiitti kaikkie ošallistumisešta .
Toimehpivon yksi teemoista oli ”Kiestinkin eläjien šukunimien istorija ”, šentäh kun Kiestinkin karjalaisien kulttuurišeuran johtaja Gennadi Kundoz’orov tuanoin löysi tovissukšen šiitä , jotta 1920-luvulla hänen kantatuatot jouvuttih vaihtamah šukunimen .Šelvisi , jotta tämä teema on monella lähini .Aihien käsittely oli mukava ta monipuolini .Jokahisella löyty perehistorijoja šukunimistä .XX vuosišuan alušša šukunimijä jouvuttih vaihtamah kuin pakolaiset , kumpaset ašettauvuttih elämäh Šuomen puolella , niin ni eryähät perehet , kumpaset jiätih elämäh Karjalan alovehella .Šiih vaikutti poliittini tilanneh , mi oli Karjalašša 1920-luvulla .
Galina Šeina kerto šukunimien merkitykšeštä , mit oltih käytöššä Kiestinkin piirin alovehella XVIII–XIX vuosišatojen vaihtiešša .
Gennadi Kundoz’orov esitti Karjalan Heimo -aikakaušlehen numeron , mi on kokonah omissettu Kiestinkin pos’olkalla .Tämä numero ilmešty 1997 vuotena , ka vähä ken on šitä luken .
Pruasniekan aikana kuulu äijän lauluja , runoja ta anekdottija omalla kielellä .Perintehen mukah stolua korissettih karjalaiset ruuvvat .
Tahomma kiittyä kirjaštonruatajie Galina Šeinua ta L’udmila Vlasovua mahollisuošta pityä kielikurššija ta šeuran kokoukšie kirjaštošša šekä toimehpitoloih ošallistumisešta ta karjalan kanšallisen kulttuurin šäilyttämisen ta kehittymisen kannatukšešta .
Šamoin passipoičemma Tatjana Koval’ovua , kumpani joutoaikana opašti meilä karjalan kieltä .Tatjana Aleksandrovna vetäy oman kielen harjotteluja ni päiväkojin kašvattajilla ta alkeisluokkien koululaisilla šekä ohjuau karjalan kielen kerhuo Louhen Lapšien luomiskeškukšešša .
Kiitämmä Karjalan Rahvahan Liittuo , Karjalan kanšallisušpolitiikan ministerijyö , Šuomen Pohjois-Viena -šeurua šiitä , jotta meilä on tarvittavie karjalan kielen opaššušvälinehie , oppikirjoja , šanakirjoja , pakinašanakirjoja .
Muamonkielen päivä Kiestinkissä
Karelian Proper
New written karelian