Texts
Return to list | edit | delete | Create a new | history | Statistics | ? Help
Sidorkin, Valerii. Oneganiemen kaunehuolla lumottu
Sidorkin, Valerii
Oneganiemen kaunehuolla lumottu
Karelian Proper
New written karelian
Pakkaiskuušša täyty
90 vuotta istorikon ta kotišeutututkijan Aleksandr Mošinin šyntymäštä .
Aleksandr Mošin šynty 17.pakkaiskuuta 1927 vuotena Oneganiemellä , Šungan šeurakunnan Zavjalovo-kyläššä talonpojan pereheššä .Petroskoin rakennuštehnikumin lopetettuo Mošin monta vuotta oli ruatan arhitektorina Karelgraždanprojektprojektikonttuurissa .Mieš šuunnitteli tašavallan kaupunkien ta kylien rakennukšie .Myöhempäh hiän toimi Karjalan ammattiliittojen obkomissa .
Oman Oneganiemen istorija aina oli kiinnoštan Mošinie .Aleksandr Ivanovič halusi enemmän tutkie šitä ta šen takie hiän läksi opaštumah Petroskoin valtijon yliopiston istorijallis-filologisella tietokunnalla .Hiän äijän aikua vietti arhiivoissa ta kirjaštoissa tutkien pohattua ainehistuo Oneganiemen šeuvušta , pakautteli Oneganiemen kylien entisie eläjie , tallenti niijen muisselmie .Kaiken kerätyn ainehiston pohjalla Mošin kirjutti lukusie kirjutukšie ta kuvaukšie täštä teemašta .
Enšin niitä painettih Karhumäjen piirin ta tašavallan lehtilöissä .Myöhempäh alko ilmeštyö Aleksandr Mošinin kirjuttamie kirjoja .Niijen luvušša oltih “Očarovanije Zaonežjem ” (Oneganiemen lumot ), ”Oneganiemen tunnettujen ihmisien luvettelo ” šekä yhteistyöššä tyttäreh kera valmissettu ”Zaonežje v biografijah ” (Oneganiemen elämänkertoja ).
Aleksandr Mošinin Oneganiemen tarinoja -kirja (Zaonežskije bival’ščini ) on aivan ainutluatuni teoš .Täh kirjah on kerätty Oneganiemen šeuvun folkloriainehistuo – kertomukšie ta tarinoja , kumpaset Mošin oli tallentan omilta muanmiehiltä .
Šuurešta panokšešta Oneganiemen istorijan tutkimiseh 2001 vuotena Mošin oli hyväkšytty Venäjän muantietehellisen šeuran jäšenekši .
Hyvin aktiivisešti Aleksandr Ivanovič toimi yhteiskunnallisella alalla .Hänen alottehešta oli peruššettu Oneganiemen ošakunta -järještö , kumpaista hiän iče rupesi johtamah .Šuuren Isänmuallisen šovan aikana nuorena prihana Aleksandr joutu Oneganiemen keškityšleirih ta oman šeuvun vapauttamisen jälkeh šoti Karjalan rintamalla .Šentäh Mošin kuulu Tašavallan entisien keškityšleirien alaikäsien vankien neuvoštoh ta oli Petroskoin šota - ta työveteranien neuvošton hallitukšen jäšen .Ta tietenki hiän kuulu Karjalan Kanšallisen kirjašton rinnalla toimijah Kotišeutututkija-klubih .
Aleksandr Ivanovič oli oikein monipuolini ihmini , hiän tykkäsi luontuo , musiikkie ta kuvataitehta , äijän luki .Kolme vuotta takaperin Aleksandr Mošin šiirty tuonilmasih .Hiän jätti jälkišukupolviloilla šuuren arhiivan .Šiinä on muutomie käsikirjutukšie , kumpasie ei ole vielä painettu ta kumpaset vuotetah omua hetkie .
Oneganiemen kaunehuolla lumottu
Karelian Proper
New written karelian