VepKar :: Texts

Texts

Return to list | edit | delete | Create a new | history | Statistics | ? Help

Olʾga Smotrova. Livuttua kieleh piirustamal

corpus: Journalistic texts

Source:
Oma Mua. № 11, 2017, p. 7

Olʾga Smotrova

Livuttua kieleh piirustamal

Livvi
New written Livvic
Suomelas-ugrilazen školan enzimäzen kluasan opastujat kučuttih gostih Kipinä-žurnualan ruadajii. Hos lapset vai enzimästy vuottu opastutah karjalan da suomen kieldy, hyö jo äijän tietäh omas tulies kieliopas- tuksen abuniekas – Kipinä-žurnualas.

Lapsii kummatutti “Kipinän” piätoimittajan Jana Filimonkovan kerdomus žurnualan luadimizeh nähte. Mittuman suuren ruavon pidäy ruadua sih niškoi, ku žurnualu piäzis ilmoih! A min verdu rahvastu yhtyy yhten noumeran luadimizeh! Toiči piäl kahtenkymmen hengie, opi vai duumaija! Yhtet kirjutetah, toizet piirustetah, kolmandet kohendetah, vie painetah da leikatah. “Kipinän” toimittajien kyzymyksih žurnualan valmistamizeh nähte lapset maltettih kerras da oigieh vastata.
– Mih niškoi enzimäzekse toimittajil pidäy luadie moine mustu-valgei žurnualu? kyzyy toimittai Oksana Čurigina da ozuttau tavallizel bumuagal printeral painettuu žurnualua.
– Ga enzimäi pidäy kai kohendua, a ku hairahtustu roinnou, vastattih opastujat.
Yhtelläh toimittajien ruado rodieu mielužembi da kebjiembi, ku žurnualan luadimizes ruvetah auttamah iče sen lugijat.
Täl kerdua “Kipinä” kuhkutti omii pienii lugijoi piirustamah kaksi čomua kezäkuvua žurnualan keskisivuloile. Sih niškoi lapsil oli annettu sanat karjalan kielen kahtel murdehel da suomen kieldy opastujile – suomen kielel. Sanoin mugah pidi piirustua ezinehet da luonnon ilmivöt. Muga, sanommo, lapsien yhtele joukole oli annettu sanat livvikse: pilvi, meččy, jogi, veneh, griba, muarju, kajoi. Toizen joukon lapset piirustettih čomaine vienankarjalazien sanoin mugah: päivä-ni, talo, aita, koira, lampi, kala, kukkapenkki. Mittuine kuva rodih opastujil da kaikkiigo sanoi hyö ellendettih oigieh, suau nähtä karjalankielizen “Kipinän” oraskuun noumeras.
“Kipinän” toimittajat passiboijah Suomelas-ugrilazen enzimäzen kluasan opastujii hyväs urokas da avus žurnualan valmistamizes.
The site was created by the staff of the Karelian Research Center of the Russian Academy of Sciences
You can freely use the materials of our site and share them, most importantly - indicate authorship and a link to our resource.
More about the CC BY 4.0 license
© VepKar. Open corpus of Veps and Karelian languages