Texts
Return to list | edit | delete | Create a new | history | Statistics | ? Help
Ol’ga Dubitskaja. Partizuanoin reidat
Ol’ga Dubitskaja
Partizuanoin reidat
Livvi
New written Livvic
Joga
kevätty Karjalan tazavallan Kanzallizes muzeis avavuu uuzi ozuttelu , kudai on omistettu Karjalan frontale .Tämän keviän ozuttelu on partizuanoih nähte .
Kanzallizes muzeis 22.kevätkuudu oli avattu Partizuanoin reidat -ozuttelu , kudai on omistettu Suuren Ižänmuallizen voinan Karjalan frontan partizuanoin liikkehen histouriele .
Ozuttelun voinanaigazil pajoloil avattih Oniegan meridian -horan pajattajat .Sit sananvuoron otti muzein johtai Mihail Gol’denberg .
– Täl kerdua meijän tavoittehennu on houkutella , kiinnostuttua nuorižuo , hos voinan jälles rauhas on kazvanuh jo nelli sugupolvie , sanou Mihail Gol’denberg .
Ozuttelun avajazien gost’annu oli Kul’tuuruministerstvan ezittäi – Varvara Lebedeva , Karjalan frontan partizuanan Jaakko Rugojevan bunukku .
Varvara Lebedeva uskaldi , ku Karjalan tazavallan 100-vuozipäiväkse rodieu kohendettu muzein enzimäine pordahikko da luajittu alalline ozuttelu Karjalan frontas .
Partizuanoin reidat -ozuttelul , kui sanoi Mihail Gol’denberg , on kolme nevvonandajua – kirjuttai Konstantin Gnetnev , Petroskoin valdivonyliopiston professoru Sergei Virigin da histourien kandiduattu German Čumakov .
Ozuttelu ei ole tavalline vie sendäh , ku sil on kolme kurattorua – Ilja Serko , Mihail Dankov da Aleksei Ter’oškin .
– Täl ozuttelul on ebätavalline taido - da tila-azettamine . Ozuttelus on luajittu partizuanoin tugikohtu , kudai oli Haikol’as .On sie ozutteluseiniä informatsien , fotokuvien da dokumentoinke , sanou Ilja Serko .
– Täh ozutteluh nähte myö luajimmo stelan – zirkalopinnaine viizikulmaine tiähti ruskiel mual , kuduah on kirjutettu Karjalan frontan partizuanoin joukkoloin nimet . Myö luajimmo juuri zirkalopindazen tiähten sendäh , ku ozuttelun kaččojat kuvastuttas sih da voidas ellendiä kai , midä ellendettih partizuanat , konzu puolistettih omua muadu , jatkau mies .
Niilöile , ket oldih ozuttelun avajazis , puutui nähtä Sergei Simon’anua , Zven’aščaja tišina (Helizii hil’l’ažus ) -fil’man luadijua .Tämä fil’mu kerdou partizuanoin reidois .Sidä sežo suau kaččuo ozuttelus .
Ozutteluzualah tulduu , kerras näet partizuanoin tugikohtan koupiedu .Sie on kai – stola , kravatit , astiet , brujat , ammunduvehkehet , sovat .Ozuttahes , ku terväh kentahto karahtah sydämeh .
Ozuttelu on juattu ozih , kudamis jogahizes ollah omat voinan aijan dokumentat , fotokuvat da čomazet .
Toizes Partizuanoin reidat -ozutteluzualas ollah Georgii Stronkan da Osmo Borodkinan voinan aigua luajitut čomazet .
Pidäy sanuo , ku kaikkiedah Karjalan tazavallan Kanzallizes muzeis on läs 200 tuhattu voinanaigahistu vehkehty .
Ozuttelun hantuzis ruvetah organizuimah “pyörižii stolii ” da vastavundoi karjalazien histouriekoinke .Školaniekkoih niškoi luajitah mieldykiinnittäjii vastavundoi da ižänmuan suvaičusurokkoi .
Partizuanoin reidat -ozuttelu rubieu ruadamah oraskuun 21.päiväh suate .
Partizuanoin reidat
Livvi
New written Livvic