Texts

Return to list | edit | delete | history | ? Help

Säpsän kirjaston hyväkse

Corpus: New-writing language

New written Livvic, Journalistic texts

Source: Natalja F’odorova, Oma Mua. № 14, (2017), p. 7

Säpsän kirjaston hyväkse
(Livvi)

Lilija Aleksandrovna Lesnitskaja opastui Priäžän piirin monis školisMatrosoin kylän, Kinelahten, Priäžäs da Vieljärven školis. Kyläspäi kyläh muuteltih tuatan ruavon periä. Aleksandr Andrejevič Ivanainen oli partien ruadai, hänele oli käskietty nostua korgiembale ruadotazole jällele jiännyöt lesopunktat. Sen periä hänel aiven pidi muuttua kohtas toizeh, hänen peräh matkai kogo pereh.
Vieljärven školan loppiettuu Lilija Aleksandrovna piäzi opastumah Karjalan Kul’tuuruopistoh kirjaston hoidajakse. Opastuksen loppiettuu händy työttih ruadoh Säpsän kyläh. Ruadotaibaleh algavui elokuus 1969 da jatkui vuodessah 2008.
Säpsän kirjasto pidi yhtehisty ruaduo Säpsän kul’tuurutaloin da Splavninskoin alguškolanke. Äijy mieldykiinnittäjiä piduo oli pietty kirjaston da kul’tuurutaloin seinis. Ruado lapsienke, literatuurukilvat vältämättäh kuulutah kirjaston hoidajan ruadoh.
Sil aigua kirjastosistiemah tuli uudinekirjastoloile pidi opastuo toine toizes ruadoneroloih da kilbailta keskenäh. Säpsän kirjasto pidi mostu ruaduo Sodderan kylän kirjastonke, kus ruadoi Ol’ga Mihailovna Borovkova. Ruadoneroloil vaihtamine toi kirjastoloin ruadoh äijy uuttu da hyviä.
Kirjaston hoidajan ruadoh kuuluigi “kniigoin kandamine”. Se tarkoittau, ku kirjaston ruadajal pidi kandua libo tuvva kniigoi eri kodiloih da laitoksih, sanommo, bol’niččah, meččypunktan toimistoh, Pieni-Sunskoin meččypunktan garažah, päivykodih. Lilija Aleksandrovna yhtyi rahvahan lugemizeh, valličuksih, kuului kaikenmoizih komiissieloih. Omas ruavos naine sai äijän kiitändy- da kunnivokirjastu.
Lidija Lesnitskaja oli Bes’oduška-naizien kluuban johtajannu vuvves 2000. Naine on ruadoveteruanu da tänäpäi on eläkkehel. Lilija Aleksandrovna on hyvä akku da muamo, huolekas buabo. Yhtes ukkohke Lidija Aleksandrovna on elänyh 47 vuottu, molodoit kazvatettih kaksi poigua da nygöi heil on kolme bunukkua.