Texts
Return to list | edit | delete | Create a new | history | Statistics | ? Help
Sidorkin, Valerii. Mainijo starinankirjuttaja
Sidorkin, Valerii
Mainijo starinankirjuttaja
Karelian Proper
New written karelian
Eli
ta oli Karjalašša ainutluatuni ihmini , kumpani kekši starinoja .Eikä ne oltu tavalliset starinat , a erikoiset , nykyelämäštä kertojat – kaupunkin ta kylän elokšešta .Kučuttih šitä starinankirjuttajua Vasili Firsoviksi .Hiän oli juuriltah vepšäläisiltä šeuvuilta Vologdan alovehen Vitegorskin piiristä .Ka kohtalo šuatto hänet Petroskoih , missä hänen starinamaini luomistyö avautu täyvellisešti .
Vielä kotimualla olleššah Vasili alotti kirjuttua pienie kertomukšie , kumpaset painettih hänen enšimmäisissä kirjoissa .Ka juuri Petroskoissa elyässä Firsovin ainutluatuni starinankirjuttajan lahja tuli näkyvih .Yksi Vasili Firsovin kirjuttama starinakokoelma näki päivänvalon vielä kirjuttajan eloššah ollešša .Ta kolme jälkimmäistä kirjua ilmešty jo hänen enneinaikaisen kuoloman jälkeh .Niissä on muisselmie Vasili Firsovista ta hänen starinoja .Nämä ainehistot oli valmistan Vasili Firsovin yštävä , taiteilija Dmitri Moskin .A tunnettu kirjuttaja ta filosofi Juri Linnik kirjutti vielä yhen kirjan , kumpasešša hiän tutki starinankirjuttajan luomistyötä .
Noin kolme vuotta takaperin Karjalan Kanšallisešša kirjaštošša , šen asientuntijan , kirjailijan ta dramakirjuttajan Jaana Žemoiteliten alottehešta oli kehitetty Čitka-nimini kirjallisušprojekti .Tämän projektin mukah kirjaštošša järješšetäh yleisie lukomistilaisukšie , niin kuin on tapana joka teatterissa , missä näyttelijät iäneh luvetah tulijan näytelmän tekstie .Šillä tavalla rahvašta tutuššetah petroskoilaisien kirjuttajien uuših teokših .Ajan mittah näijen tilaisukšien ošallistujista tuli harraštaja kirjallisušteatteri .Nykyjäh Čitka-projektie toteutetah jo ihan näytelmämuotosina tilaisukšina .
Tuanoni tilaisuš oli ohjattu Jaana Žemoteliten Aika kerätä potakkua -nimisen s’urrealistisen draman mukah .Aihetta tämän teokšen kirjuttamiseh Jaana oli šuanun juuri Firsovin starinoista .Realisuš ta fantastikka šiinä on uškomattomašti šitouvuttu keškenäh .Näytelmän ohjasi Arkadi Samoilov , a näyttelijinä ošallissuttih Jaana Žemoiteliten lisäkši kirjaštonhoitaja Aleksandr Dokučajev , nuorisoaseita hoitaja ammattimieš Jussi Jäskeläinen , Kodima-lehen piätoimittaja Galina Baburova , muusikko ta opaštaja Igor’ Solovjov , runoilija Oleg Mošnikov .
Enši-illan jälkeh niin kuin on tapana kaččojat kerrottih mielijäh esitykšeštä ta näytelmäkirjutukšešta .Niijen kešen oli Karjalan tunnettuja kirjailijie , lehtimiehie ta dramakirjuttajie šekä kirjašton tavallisie kävijie .Kaikin oltih yhtä mieltä , jotta näytelmä onnistu .
Vielä ihmiset kerrottih muisselmie Vasili Firsovista ta tapahtumašta tuli šamoin tuon mainijon starinankirjuttajan muistoilta .
Mainijo starinankirjuttaja
Karelian Proper
New written karelian