Texts
Return to list | edit | delete | Create a new | history | Statistics | ? Help
Nadežda Vasiljeva. Kalevalan piirin lentoyhteyven istorija
Nadežda Vasiljeva
Kalevalan piirin lentoyhteyven istorija
Karelian Proper
New written karelian
Monet
Kalevalan eläjät hyvin muissetah niitä aikoja , konša Kalevalašta Petroskoih melkein joka päivä oli voinun piäššä …lentämällä .Pieni lentokoneh , kumpaista rahvaš kučuttih ”kukuruznikakši ” kuletti piirin eläjie piäkaupunkih .Vähä yli kakši tuntie ilmašša keinuntua ta Anlentokoneh matkuštajineh laškeutu Petroskoin Peski-lentokentällä .
Kalevalašša lentokonehen matkuštajie otettih vaštah ta šuatettih hyväččäiset , hyväntahtoset neiččyset-kassirit .Halukkahie lentyä lentokonehella oli aina äijän …
Joka talvi , konša Ylä - ta Ala-Kuitilla ta Kontokin järvellä jiä oli riittävän pakšu , avautu paikallini lentoyhteyš .Ka Koštamukšen Kontokki ei kaikičči voinun ottua vaštah lentokonehta : rikeneh järvellä lumikerrokšen alla oli vettä , mi šuurešti haittasi lentokonehen laškomista ta lentohlähtyö .
Šiännöllini lentoyhteyš Koštamukšen kera alotettih myöhemmin , šen jälkeh kun rupesi toimimah Koštamukšen paikallini lentokenttä .Vuokkiniemen , Jyškyjärven ta Luušalmen kylistä talviaikana niise piä-si piirikeškukšeh .Näissä kylissä jiäkenttien johtajat tunnollisešti šuoritettih tehtävieh .Esimerkiksi , Jyškyjärven paikallisen ”lentokentän ” johtajana oli Jekaterina Nikulina .Hiän tiesi kaiken lennoista , matkuštajien luvušta , jiän ta lentokaistan kunnošta ta hiän aina piti tuon tarkalla .
Kalevalašta Luušalmeh ta Jyškyjärveh lentokoneh kävi kakši kertua päiväššä : kyläläiset piäštih käymäh piirikeškukšeh liäkärih ta muita aseita hoitamah ta šamana päivänä voitih myöštyö kotih .Lentolippu näihi reissuloih makšo (uškokkua tahi elkyä ) yhen rupl’an .Šemmoset oltih ajat !
Kalevalan , Luušalmen ta Jyškyjärven lapšet vuottamalla vuotettih lepo - tahi pruasniekkapäivie .Juuri šilloin lapšilla järješšettih lentokierrokšie kylien yllä .Viiještäkymmeneštä kopeikašta lapšet piäštih kaččomah omua kylyä lentokonehen ikkunašta linnunlennon korkeuvelta .Nyt jo ruavahat ihmiset hyvin muissetah niitä lapšuštuntehie , konša lentokoneh hurissen nousi ilmah ta hyö šuurella innolla painauvuttih ikkunua vaššen ta yritettih tunnistua alahana olijat omat talot ta omat kavut .
Oli niitä aikoja , konša kešällä Kalevalašša oli vesilentokonehki .Še autto meččätulipalojen šammuttamisešša .”Vapua-aikana ” lentokoneh tavallah keinu ualtoloilla Kuittijärven rannikolla nykysen Runonlaulajien niemen lähellä .
Tänäpiänä hyvin harvoin Kalevalan yllä šuau kuulla lentokonehen mouttorin ta lapojen hurinan .Aikoinah kaunis Kalevalan lentokentän rakennuš vanhenou ta lahou .Šen ikkunat kačotah kaipuulla tyhjäh lentokaistah ikäh kuin toivoen , jotta voit olla konšanih elämä alkau tiälä uuvveštah ta lentokaistalla joka päivä rupieu kuulumah lentokonehen hurina .No tuškin nämä toivehet toteuvutah konšanih .
Kalevalan piirin lentoyhteyven istorija
Karelian Proper
New written karelian