Texts
Return to list | edit | delete | Create a new | history | Statistics | ? Help
Toini leipä
Toini leipä
Karelian Proper
New written karelian
Karjalaisien
perintehellisellä ruokastolalla juurekšie ta kašviksie ei ollun kovin äijän .Kaikista käytetyin juurekšista oli nakris .Karjalaiset piettih nakrista ”toisena leipänä ” ta šyötih šitä miltei šaman verran , kuin nykyjäh ihmiset šyyvväh potakkua .Karjalašša nakrista kašvatettih šuurin miärin ihan 1930-lukuh šuaten , šäilytettih šitä kuopissa .
Nykyjäh tämä juurikaš on melkein kokonah unohutettu , a vet nakris on yksi hyövyllisimmistä ruuvvista .Šiinä on C , B , B2 , В3 , A -vitamiinija , kaliumin , natriumin , kalsiumin , rauvan , magniumin ta fosforin šuoloja .Nakrehešša on hiilihydrattija ta äijän sellulosua , kumpani hyvin vaikuttau šuoliston toimintah .
Ennein karjalaiset valmissettih nakrehešta eri ruokie : keittoja , huttuja , nakrista hauvottih , paissettih , kuivatettih , luajittih šiitä vuaššua ta kompottie .
PAISSETTU NAKRIS
Nakrehet alušta kokonaisina kuorineh laitettih kiukuah pastumah .Paissetut nakrehet noššettih , otettih kettu pois piältä , pilkottih pieniksi kappalehiksi , lisättih šiemenvoita ta talkkunua , pikkuni vettä ta šuolua ta tuaš pantih kiukuah paistumah .Ennein šyöntie valmeheh nakrispaistieh lisättih hienonnettuo lanttuo , še anto ruuvvalla erikoista makuo .
NAKRISHAUTE
Nakrehet peštih ta kuoritettih , leikattih pieniksi kappalehiksi ta lat’attih patah .Kuattih pikkuni vettä , pantih kanši piällä ta pantih pata kiukuah hautumah .Valmis nakris noššettih puašta , jähytettih ta šyötih viluna , kaššettih šitä toko talkkunah , kakrajauhoh tahi suarittuh ruisjauhoh .
NAKRISHUTTU HELMIŠUURIMAN KERA
Resepti : 1 stokana šuurmua , 2,5 stokanua vettä , nellä nakrista , kakši ruokalusikkua voita ili šiemenvoita , šuolua mavun mukah .
Nakris peštih , kuoritettih ta pilkottih pieniksi kappalehiksi , lat’attih patah ta lisättih šuolua .Šiitä šamah patah pantih etukäteh livotetut helmišuurimat .Pantih pata tulella ta keitettih pienellä tulella puolikypšykši .Šiitä huttu hyväsisti hämmennettih , lisättih voita ili šiemenvoita ta pantih kiukuah hautumah .Šyötih šemmoista huttuo vilun maijon kera .
LAPŠIEN HERKKUJA
Kiukuašša kuivatettuo nakrista šanottih ”kičukši ”.Nakris kuoritettih ta leikattih hienoiksi viiploiksi ta pantih kiukuah kuivumah .Kuivatetut nakrisviiplot (kičut ) oltih karjalaisien lapšien parahana herkkuna .Lapšet šyötih šitä makijaisien ieštä .
Toini leipä
Karelian Proper
New written karelian