Texts
Return to list | edit | delete | Create a new | history | Statistics | ? Help
Irina Mironova. ”Kolematoi rahvazjouk” ühtenzoiti kaiken mirun
Irina Mironova
”Kolematoi rahvazjouk” ühtenzoiti kaiken mirun
Veps
New written Veps
Sur’
Voin toi äjad gor’ad kaikuččehe kanzaha .No kaik edemba meišpäi oma ned opakad voded , kaik vähemba om nenid , ked muštaba voinan aigad .Om kazvanu jo ni üks’ sugupol’v , kudamb tedab voinan polhe vaiše kirjoišpäi , fil’moišpai , istorijan urokoišpai , nenišpai , ked mäniba läbi voinas .I tämbei meiden päazj om kaita muštod neniš , ked vojuiba , miše mö eläižim mirus , a mugažo antta nenid tedoid toižile sugupol’vile ičemoi lapsiden , vunukoiden da pravunukoiden kal’t .
Nacein , ei ole vodes mugomad praznikad , konz lidnoiden da küliden irdoil keradase muga äi rahvast , kut Vägestusen päiväl .Nece om tärged praznik kaikuččen kanzan täht .Äjiš lidnoiš da küliš mäniba aigtegod , miččed oli omištadud Vägestusen päiväle .Kacum , kut ned mäniba Kalages .
Semendkun 8.päiväl Kalagen školas mäni praznikkoncert , mitte oli omištadud Vägestusen päiväle .Koncertaha ühtniba pened lapsed päivkodišpäi , školan openikad da opendajad , a mugažo ”Pihläine ”-vokal’grupp Kalagespäi .Hö lugiba tetabiden runoilijoiden runoid voinan polhe , pajatiba pajoid , ozutiba kargmahtoid .Praznikal sanutihe äi lämid sanoid meiden veteranoile : min’orale Anna Petrovna Gorbačovale i repressiruitud Jevgenii F’odorovič Kirilinale .Mugažo adivoiden keskes oliba voinan lapsed : Nina Ivanovna Arestova , Lidia Konstantinovna Puzovikova , Valentina Sem’onovna Mironova , Lidia Konstantinovna Kirilina .Kaik saiba lahjaks änikoid da georgijevskijan lentaižišpäi rindripkid , miččid tegiba lapsed ičeze käzil .Zalas oli praznikaline i läm’ il’m .Muga om harvoin , konz ühthe keradasoiš erazvuiččiden igiden ristitud , miše johtutada sidä jügedad voinan aigad , muštelta kolijoid saldatoid .
Naku jo nelländen kerdan Kalages mäneb ”Kolematoi rahvazjouk ”-akcii .Semendkun 9.päiväl školanno kerazihe külänikad : voinan ühtnikoiden lapsed , vunukad , pravunukad , openikad i opendajad .Külänikad astuiba školaspäi kul’turpertihesai pidädes kädes ičeze tatoiden , dedoiden , pradedoiden , baboiden fotokuvid – niiden , ked ühtniba Surehe Voinaha .
Kaikid tulijoid mitingale tervehtoitiba Kalagen administracijan pämez’ Natalja Silakova i školan pämez’ Svetlana Gotič .Oli sanutud äi lämid sanoid veteranoile , voinan lapsile , kaikile külän eläjile .Mitingan aigan openikad lugiba runoid , ”Pihläine ”-hor pajati pajoid voinan polhe .Jäl’ges oli änetomuden minut kolijoiden muštoks da änikoiden panend kaumoile .
Vägestusen päiv tob meiden südäimihe ozad , ilod , no sil-zo aigal gor’ad .Muštkam igäks Sures Voinas , neniš , ked lahjoičiba meile mirud i mitte kalliž oli vägestusen arv .Necidä ei sa unohtada !
”Kolematoi rahvazjouk” ühtenzoiti kaiken mirun
Veps
New written Veps