Texts
Return to list | edit | delete | Create a new | history | Statistics | ? Help
Etnostudii Kalag’-küläs
Etnostudii Kalag’-küläs
Veps
New written Veps
Vepsän
kul’tursebr tegeb ut projektad .Täl vodel se planuičeb tehta Etnostudijan , mitte radaškandeb Änižröunan Kalag’-küläs .Projektan tegii Julia Aprodu starinoiči meile sen polhe .
– Om-ik nece projekt znamasine vepsläižiden täht ?
– Projekt om znamasine da aktualine nügüd’ . Se abutab kehitoitta vepsän kirjkel’t da vepsän rahvahan kul’turad .Se om mugažo oigetud vepsän kelen pohjoižpaginan kaičendaha .Meiden projektan radho tartuba lapsed .Joga vodel vanhembid ristituid , kudambad pagižeba vepsän pohjoižpaginal , tegese kaik vähemba .Ühtes heidenke lähteba elospäi vepsläižed verod , tradicijad , kadob meiden paginki .Sikš , nece projekt om tarbhašt nügüdläižes aigas , nügüdläižes situacijas .
– Om-ik se oigetud lapsiden opendamižehe ?
– Nece projekt om tehtud sen täht , miše lapsed , nored mehed zavodiba opeta ezitatoiden kel’t , miše hö tedaižiba rahvahan kul’turad , miše heil oliži melentartuz’ ičeze jurihe , miše hö tunduižiba ičeze vepsläižid jurid . Entostudijas lapsed opendaškandeba vepsän kel’t , vepsän rahvahan kul’turad , istorijad , saba tedoid nügüdläižes vepsläižiden elos .Etnostudijan radho mö kucum vanhembid vepsläižid , kudambad andaba norile ičeze tedoid .
– Starinoiče , kut zavodib rata Etnostudii ?
– Radho mülüba erazvuččed kursad . Niid linneb seičeme : ”Vepsän kel’ ”, ”Kodiröun ”, ”Istorii ”, ”Tedorad ”, ”Tradicijad da radonmahtod ”, ”Rahvahaline söm’ ”, ”Rahvahan sädandrad ”.Kaikuččen kursan täht om tehtud ičeze programm .
– Kut radaškendeba nene kursad ?
– Ezmäine kurs , miččen nimi om ”Vepsän kel’ ”, om lujas tärged . Se om tehtud sen täht , miše nored voižiba opeta vepsän paginad da kirjkel’t .Lapsed vasttasoiš külän vanhoiden ristituidenke , kundleškandeba heiden paginad .Mugažo tegeškandem literaturehtoid , miččil starinoičem vepsläižiden runoilijoiden da kirjutajiden polhe .Mö planuičem tehta meiden Etnostudijas foto-ozutelusen .Sil linneb ozutadud vepsläižiden küliden fotod , meiden röunan londusen fotokuvad .Kaikuččele fotole ližadam kirjutesid , starinoid meiden man istorijan polhe .Šoutjärven etnografine muzei abutab meile rados .Lapsed oppiba enččid predmetoid , hö opendaškandeba vedämaha ekskursijad muzejas .Mugažo tahtoim , miše hö iče kirjutaižiba vanhemban pol’ven starinoid , heiden muštlotesid enččes elos .Projektas linneb tehtud ”Istorijan mušt ”-kurs .Sil lapsed saba tedoid sen polhe , kut eliba meiden küläd Suren Voinan aigan .Om tetpas , miše meiden man eläjad radoiba min’oroin .Heiden jügedas rados pidab teta lapsile-ki .Lapsed tegeškandeba videod , kus voinan veteranad starinoičeba necen azjan polhe .
– Midä koskub rahvahan radmahtoid ? Planuitas-ik tehta openduzkursid vai mastar’-klassoid ?
– Ka , Etnostudijas linneb vedetud käzitöiden mastar’-klassoid . Lapsed opendaškandeba tehmaha erazvuiččid tehmusid tohespäi .Mugažo opendaškandem lapsid vaumičemha vepsläižid sömižid : paštta kalitoid , skancoid , kürzid ...Nügüd’ nece om tarbhaine azj .Sikš miše melentartuz’ rahvahan sömižihe nügüd’ om sur’ .Meiden male tuleskeleba turistad , kudambad kaiken aigan küzeleba necen polhe .Mugažo mö tahtoim tehta ičeze tätüteatran .Muga lapsed saba tedoid rahvahan fol’kloras .
– Miččed ezmäižed haškud projektan rados om jo tehtud ?
– Mö zavodim jo vedäda ”Nored oppijad ”-kursad . Lapsidenke mö ajelem Šotjärven etnografižehe muzejaha .Sigä lapsidenke radab muzejan pämez’ Natalja Anhimova .Lapsed opendasoiš vedämaha ekskursijad muzejas .Lapsid om 20.Lapsed tedištiba , mi om ekskursii muzejas .Natalja Aleksandrovna opendab lapsid kacmaha muzejan katalogid , lugeda tarbhaižid kirjoid , tundištoitab heid muzejan eksponatoidenke .Pigai lapsed vedäškandeba ekskursijad venän da vepsän kelel lapsiden da vanhembiden adivoiden täht .Hö tegeškandeba ekskursijad erazvuiččile temoile : kalatez , mectuz , mecan radod , naižiden radod , radod mal , vepsläine pert’ .
– Midä edemba tegeškandet ?
– Mö zavodim jo toštki radod . Vaumičem lapsidenke praznikan .Opendam pajoid , karguid .Tahtoim , miše lapsed ozutaižiba niid ”Kalarand ”-praznikal , mitte linneb Kalag’-küläs 23.kezakud .
– Kut pit’kha projekt radaškandeb ?
– Projekt radaškandeb kezakuspäi kül’mkuhusai . Minä lujas tahtoižin , miše Etnostudii ei lopte ičeze radod .Tahtoižin , miše küläs oliži Etnokeskuz , kuna lapsed voižiba tulda da opetas konz taht .Tahtoin , miše vepsän rahvahan tradicijad , kel’ da verod oliži kaitud .
Etnostudii Kalag’-küläs
Veps
New written Veps