Texts
Return to list | edit | delete | Create a new | history | Statistics | ? Help
Irina Sotnikova. Riža sinä-ki kevät!
Irina Sotnikova
Riža sinä-ki kevät!
Veps
New written Veps
Kezakun
29.päiväl Šoutjärven etnografižes muzejas mäni hüvä aigtego , mitte kerazi külän eläjid .Oli avaitud kuvaozuteluz , miččen nimi om ”Karjalan keväz’ ”.Ristituil oli voimuz tundištadas kuviden avtoranke – taidehpirdajanke Konstantin Moškinanke .
Konstantinan kodima om Vätka (Kirov-lidn ).Laps’agaspäi hän navedi pirta .Ezmäi hän openzihe taidehškolas , jäl’ges učiliščas da institutas .Nel’l’ vot tagaze hän ezmäižen kerdan tuli Šoutjärvehe .Necil kerdal hän tuleb vepsläižidennoks jo koumanden kerdan .Sündub küzund – mi toi händast vepsän male ?
Konstantinale om melentartušt suomalaiž-ugrilaižiden rahvahiden istorii .Vepsläižiš hän kulišti mamalpäi .Hänele oli melentartušt tedištada heiden polhe .Zavodi ecta materialad .Tedišti , miše vepsläižed eläba ani läz heidenke – Vologdan agjas , da völ pagižeba ičeze kelel .Sid’ hän tahtoi tedištada völ enamba vepsläižiš .Zavodi oppida niid .Eskai openzi vepsän kel’t i nügüd’ hüvin pagižeb sil .
Äjad pirdajad tuleba Karjalaha , miše pirta londust , järvid , jogid .A Konstantin tuli Karjalaha , miše enamba tedištada vepsläižiš .Šoutjärv’-küläd hän valiči sikš , miše nece om pohjoižvepsläižiden kul’turkeskuz .Sid’ om etnografine muzei , vepsän hor , rahvaz pagižeb kelel .Muga hän tuli Šoutjärvehe .Ičeze ezmäižes matkas Šoutjärvehe Konstantin sanub : ”Vastuz oli lujas läm’ , täs tundištimoi hüviden ristituidenke .Ezmäi kaiked minun sil’mnägubale tuli kuva Hamamäthaze .Minä sid’-žo mel’düin neche londuzkuvaha .Siloi irdal oli keza .Ümbri oli čoma londuz , Änine .Ühtes vepsän horanke minä läksin Oštaha praznikale .I minä el’genzin , miše tänna pidab pörtas .Siloi völ ei olend idejad tehta ozutelust .Kulin kel’t , pagižin ristituidenke , tundištimoi vepsän rahvahan kul’turanke i el’genzin , miše vepsläižed oma läheližed meile .Nägin tutabid antropologižid modoid , kulin tutabad änetust ”.
Toižen kerdan Konstantin tuli Šoutjärvehe kevädel : ”Nece oli läm’ päipaštokaz keväz’ .Oli Äipäiv .Nikonz en nägend mugomad siništ vet joges .Sil päiväl pirdin kogonaižen päivän ”.Hänen henged libutiba meiden londuz , vepsläine külä , rahvaz .Ičeze tundmusid matkas Karjalaha hän ozuti ičeze kuviš .Muga sündui idei tehta projektan i pidi se todenzoitta .Nece projekt , miččen satusen mö tämbei nägem , oli lujas pit’k i jüged .I kut sanui Konstantin , hänen täht se oli lujas melentartuine i tärged .
Konstantin Moškinan kuvaozutelusen pätem om Karjalan keväz’ .Nece nimi om anttud päkuvale , kus om ozutadud kaikid vahvemb pirdajan tundmuz matkas Karjalaha .Täs pirdai kuvazi külän čomut , pertid , joged , ristitun jügedad radod ičeze linmal .Necidä päkuvad ližadaba toižed taidehpaltnad , kus om pirtud külän irdad , mecjärvut , Änine , lainhed , lete , pedajad ...No kaikid nenid kuvid ühtenzoitab keväz’ .I pidab sanuda , kaikuččel kuval se om ani erazvuitte .Keväz’ znamoičeb midä-se ut , verest kut londuses , muga ristituiden elos-ki .Tahtoiše , miše ristitud oližiba ozakahad , eläižiba hüvin .
Mugažo ozutelusel voib nähta eläjiden modkuvid , pertid .Niiš hän tahtoi ozutada mel’kuvan , mitte om tipiline vepsläižile .
Konstantin eläb edahan Karjalaspäi , no nece ei telusta hänele olda sidos Karjalanke ičeze kuviden kal’t .Hän om sidä mel’t , miše Karjala mil-se kožub Vätkaha : ”Tahtoin ozutada miše kaik nece om pohjoine , nece om sija kus eläba suomalaiž-ugrilaižed rahvahad .Nened londuzkuvad oma läheližed kaikile suomalaiž-ugrilaižile rahvahile ”.
Taidehpirdajan täht om tärged , miše hänen radod ihastoitaižiba ristituid , miše kaik nece oliži mel’he heile .Jäl’ges institutad nece om ezmäine Konstantin Moškinan ozuteluz vepsän mal .
Tuldes muzejan zalaha , om mugoine tundmuz , miše nügüd’ irdal om keväz’ , puhub verez tullei , londuz heraštub .Tulgat ozutelusele i rižagat ičeiž kevät !
Riža sinä-ki kevät!
Veps
New written Veps