Texts
Return to list | edit | delete | Create a new | history | Statistics | ? Help
Irina Sotnikova. Läksi Čoma praznik
Irina Sotnikova
Läksi Čoma praznik
Veps
New written Veps
Tämbei
kivisaskelmižen kompleks zaimib tärktan sijan Karjalan ekonomikan kehitoituses .Täs radab 87 radištod , niišpäi läz kümned radab Kalages .Vodel 2016 Kalages zavottihe tehta praznik ”Kaivajan päiv ”.Se pidätas elokun jäl’gmäižel pühäpäiväl .Necil vodel Kaivajan päiväd praznuitihe jo koumandentoštkümnenden kerdan .
Praznikal oli äi rahvast : tuliba iče külän eläjad , eläjad susedkülišpäi , eskai adivod lidnaspäi .Necil kerdal praznikan täht valitihe čoma sija Änižen randal , kus mäni ”Kalarand ”-praznik .Sigä puhtastadihe sur’ tandreh penzhištoišpäi , tehtihe laučad kivespäi , čoma scen .A mitte čoma kezasä oli necil päiväl !Paštoi päiväine , irdal oli lujas läm’ , a järvespäi puhui verez tullei .
Praznik zavodihe Kalagen administracijan pämehen Natalja Silakovan tervhensanoišpäi .Hän ozateli kaikid eläjid praznikanke , sanui lämid sanoid ristituile , kudambiden jüged rad om sidotud kiven samižehe .
Praznikan sädajad tegiba melentartuižen programman , kaivajiden täht tehtihe jouksportvändod .Niihe ühtni nel’l’ joukud : ”Interkamen’ ”, ”Kara-Tau Grupp ”, ”Jameh ” i noriden jouk , miččehe mülüiba školan openikad da pästnikad .
Kului vessel energine muzik , a sil aigal kaivajad ül’dütusiš ozutiba ičeze vägid , mahtoid , udatid sportstancijoil .Stancijad oliba ani erazvuiččed : ”Kezabiatlon ”, ”Kivikäc ”, ”Kivikaroi ”.Mugoižes formatas praznik oli tehtud ezmäižen kerdan i kaik eläjad jäiba hüviš meliš .
Kaikile ühtnikoile da kacujile tuli mel’he kivikäč-vänd .Se nahodib körlind-vändoho .Täs vägestab se , ken edemba kaikid rehkab kiven kivilaudadme .Üks’ mez’ valab vet laudale , a toine rehkab kiven .Meletan , miše se tuleb popol’arižeks Kalages .”Kivikaroi ”- stancijal pidi tehta sild lapakoiš kivišpäi muga , miše se ei lanktenuiži , toižed tegiba čuhundusen kivišpäi , kel se linneb korktemb . Oliba toižed-ki melentartuižed tegendad , miččid pidi tehta kaivajile , ozutesikš , pidi hüpta hüpindnoral , leta kivištang i toižed .
Praznikal oli äi lapsid .Heiden täht tehtihe erine programm .Petroskoišpäi kuctihe klounad , kudamb ilostoiti lapsid , vändi heidenke .Mugažo lapsed voiba ühtneda erazvuiččihe mastar’-klassoihe .
Praznikal ei olend aigad tusttuda , ristitud hüvin mänetiba aigad .Konz jouksportvändod lopihe , Natalja Silakova andoi vägestajile diplomid i sportmal’l’oid .Ezmäižen sijan sai ”Kara-Tau Grupp ”-jouk , toižen – ”Interkamen’ ”, koumanden – ”Jameh ”.
Jäl’ges oliba regionaližed sportvändod – lendmäčvänd da minijaugmäč .Voibištelmahas Kalagen kaivajidenke tuliba joukud Ladvaspäi , Voznesenjespäi i Podporožjespäi .
Ehtal karjeroiden radnikoiden täht oli furšet .Praznik lopihe čomal lämoiambuskelusel .
Spasib kaikile , ken tegi mugoižen čoman praznikan .Eriži tahtoin kitta Jana Grišinad i Natalja Silakovad , praznikan idei oli originaline i lujas melentartuine .Sures abus praznikan tegemižes spasiboičem külän prihoid , mugažo Aleksandr Ščerbakovad , ”Valun ”-pämest Sergei Gor’kod , ”Kara-Tau ”-pämest Dmitrii Gor’kod , ”Granum ”-cehan pämest Boris Jemel’janovad , ”Jameh ”-pämest Roman Kirütkinad .
Läksi Čoma praznik
Veps
New written Veps