Texts
Return to list | edit | delete | Create a new | history | Statistics | ? Help
Gul’a Polivanova. Kaiken rigehtin hänen urokoile
Gul’a Polivanova
Kaiken rigehtin hänen urokoile
Veps
New written Veps
Konz
minei tuli kirjeine Karjalaspäi , en-ik voi minä kirjutada ičein opendajan Viktor Petrovič Jeršovan polhe – minä ihastuin !Nece ristit tuli minun eloho lujas amu i jäti hüvän , sel’ktan jäl’gen igäks .
Konz mö opendamoiš školas , erased opendajad tuleba lapsile enamba mel’he , mi toižed .I sid’ ed voi tehta nimidä .I minä-ki en voi sanuda , mil nece ristit vägesti minun henged , vaiše minä kaiken ihastusiš rigehtin hänen urokoile .Tedan ,voib meletada , mišto hän vedi urokoid , miččed oliba minei lujas mel’he .Nece om muga da ei ani muga-ki .Viktor Petrovič vedi kaks’ urokad – fi zikad da tähtaztedod , a minä kaikid enamba navedin literaturad …Nügde , konz minä kazvoin i iče radan školas nastavnican , voin sanuda , mišto necidä opendajad lapsed navediba hänen hüvüdes , hänen iloižiš , hänen sures henges , miččes kaiken oli tahoine čomile openikoile i uradijoile .
Viktor Jeršov om sündnu 27.elokud vodel 1937 penehe külähä , miččen nimi om Azmjärv’ .Viktor lopi nel’l’ klassad Azmjärves da läksi opendushe Järvhe .Jäl’ghe 7.klassad hän ajoi opendushe Püidho , sigä-žo zavodi radon školas №2.Vaiše nor’ priha ei opendand lapsid Püidos hätken – händast ottihe armijaha .A kodihe hän tuli jo vanhemban leitenantan i pakičihe radole Vidlan školha , kus vedi likundurokoid .
Mäni vähäšt aigad , i nor’ opendai läksi opendamhas A .I .Gercenan nimel universitetha fi zikan i matematikan fakul’tetale .Naku mi oli kirjutadud hänen harakteristikas : «Viktor Petrovič om hüvä kanznik , händast arvostaba lapsed , opendajad , kazvatajad .Hän om vastusenpidäi , ustavakaz , principialine , hüvä ristit… ».
Viktor Petrovič nai mugažo nastavnical .Konz tuli Vidlaha radole neižne , laskval Nadežda-nimel , armastuz nouzi noren prihan henges , kutnä kevädel heraštub ma .Ei üks’ lirine runo oli kirjutadud sil aigal i äkkid särahti neiččen heng !Sündui uz’ kanz – üks’ oli fi zik , a toine – lirik .Nadežda Nikolajevna äi vozid vedi Vidlan školas venän kel’t da literaturad .Kanzas kazvoi kaks’ hüväd tütärt , kudambad lujas hüvin openzihe školas .Noremb Žen’a-tütär sai openduses hobedaižen medalin .Äjan väged da hengen lämäd andoiba Viktor Petrovič i Nadežda Nikolajevna ičeze lapsile da openikoile , kazvatiba hüvid ristituid .Vaiše tuskičihe Viktor Petrovičan heng ičeze pen’t kodimad , ičeze röunad da ičeze kel’t .
Viktor Jeršov oli ezmäižen ristitun , kudamb toi Vidlan školaha vepsän kul’turad .Hän kerazi ümbri ičesaze ristituid , kudambad mahtoiba pagišta ičeze kelel , teziba vepsän ranvahan tradicijoid da kul’turad , kudambad navediba kodimad i kel’t , kel kibištab henged ičeze röunas .Siloi Viktor Petrovič radoi školas pämehen .Hän kucui školha radole Vera Vasil’jevna Lodiginad , kudamb zavodi vedäda školas vepsän kelen fakul’tativad .Edel Viktor Petrovič iče vedi fakul’tativad .Pened i sured lapsed hüviš meliš käveliba fakul’tativale , openziba kel’t , pajatiba pajoid , lühüdoid pajoižid , erased prihad mahtoiba väta taljankal .Vanhembiden openikoidenke Viktor Petrovič tegi kohendusen vanhas honuses , miččespäi tuli klass-muzei .Kezal hän oigenzi lapsid ühtes Vera Vasil’jevna Lodiginanke tedištuzmatkaha külidme , miččid om äi ümbri Vidlas , keradamha erazvuiččid kaluid ozutelusen täht .Eskai kaik nene kalud oli anttud Vidlan kul’turkeskusehe .Muga Vidlas sündui muzei .
Ühtes opendajanke Gennadii Dmitrijevič Maksimovanke Viktor Petrovič avaiži meiden školas ezmäižen klassan , miččes lapsed zavodiba opeta urokoil kodikel’t .Rad oli lujas jüged – ei olend kirjoid , radlehtikoid , programmoid , runoid lapsile .Oli vähä kazvatajid , kudambile tuliba mel’he nene uded vajehtused , sikš kaik nece rad mäni jügedas .Uskmatomuz’ eli äjiš ristituiš .Sikš kaik azjad , miččid tegi Viktor Petrovič , mišto paremboita radod meiden agjas , oma tarbhaižed .
Kaiken igän Viktor Petrovič kirjuti runoid venän i vepsän kelil : laps’aigas , ičeze mas , mecas , živatoiš da linduiš – hänen runoiš voib nägištada kaikid elon polid .Om niiš ilo , armastuz , kibu i hol’ ičeze penes rahvahas , kaikuččes ristitus , kaikuččes tactud küläs i sures lidnas .Hänen runod om paindud äjiš kirjoiš , miččid lugeba lapsed školas .Niid voib löuta kogomusiš i lugeda kulehtesiš .
Hotkas lendaba voded .Kazvoiba lapsed , tegihe surikš vunukad .Lujas hotkas mäneb aig .Läksiba taihvale armaz ak i vunuk , oli hänen elos kaiked – karktoid päivid i magedad aigad – kut Jumal andab .Äjid lapsid pästi školaspäi hüvä opendai , äi hüvid runoid jäti meile lahjakaz runoilii , a , voib olda , völ äjan kirjutab !Viktor Jeršov ei luge ičeze vozid , kaiken om muhu modol , kaiken om hüviš meliš , se sinna , se tänna rigehtib astta Vidladme – kaikuččel päiväl lähteb kävelusele .Pästi hän bardan da sanui : ”Minä nügde olen vanh dedkoine , sikš kävelen bardakaz , edel , konz mina iče olin lapsen , kaik dedkoižed pidiba bardan ”.
Konz oli praznik ”vanhan ristitun päiv ” mö lapsidenke minun klassaspäi kucuimei Viktor Petrovičad školha adivoihe .Hän äjan starinoiči iče ze laps’aigan polhe , kut openzihe i zavodi radon školas , kut kirjutaškanzi runoid .Lapsed äjan kü zeliba , adivoičetiba Viktor Petrovičad i kaikile tuli mel’he nece vastuz .
Školas minä küzuin ühtesradnikoil , midä hö muštaba Viktor Petrovičan polhe , i kaik ühthe än’he sanuiba , mišto muštaba händast vaiše hüväl vaihel .Kaikišpäi mehišpäi hän oli parahiman , kaikutte hänen pätuz oli oiged , hän hüvin voi ladida jügedan radon , abutada lämäl sanal i arvosti kaikid ristituid .Minä hökkähtin kaikidenke .
Konz-se Viktor Petrovičan polhe oli kirjutadud : ”Viktor Petrovič Jeršov navedib kodikel’t .Hän pidäb ičtaze vaihenke laskvas , lämäs , siledoitab sidä , ozutab sen čomut ”.
Pihläine , pihl’ , ala kumarte minei ,
Varasta , hoikaine , tuleb läm’ sinei ,
Keväz’ jo tuli , i sädatez kazvab ,
Änikoiš päiväine äi marjoid paštab …
Muloi Viktor Petrovič Jeršovale oli jubilei .Kerazihe adivoid , tuliba tütred kanzoidenke Piterišpäi da Moskvaspäi , rigehtiba tänna i kaznuded vunukad .Ei ole tärged kuverz’ vot om kirjutadud pasportas , a kuverdan sinä mujad henges !Minä toivotan ičein armhale opendajale , ühtesradnikale sur’t ozad , vahvad tervhut , lämid vastusid da hüväd elod !
Kaiken rigehtin hänen urokoile
Veps
New written Veps