Texts
Return to list | edit | delete | Create a new | history | Statistics | ? Help
Ol’ga Žukova. Kut mö kuzen valičim
Ol’ga Žukova
Kut mö kuzen valičim
Veps
New written Veps
Uden
voden praznikaks tat toskeli mecaspäi kodihe kuzen .Hänen Ondrii-poig tahtoi lujas necil kerdal mända tatanke .
– Tatoi , ota mindai mecha kuzen tomha , – pakičihe poig .
– Mängam , – sanui tat , – vaiše tarbiž suksed sada .
Ondrii löuzi ihastusiš pigašti suksed ičeleze i tatale .Hö paniba suksed jaugaha i läksiba mecha .Ondrii kacub : ümbri kaik om lumes – penzhad , pud – ei voi el’geta , kus mi om .
– Kacu , poig , – heikahti tat , – nece lumesine mätaz om pen’ puhut .
Tat tabazihe barbas i zavodi pudištada , sortta lunt .Lumi lanksi , ozutihe kuzine .
– Oh , ka sil oma lujas harvad oksed ühtes polespäi . Em otkoi necidä .
– Raukaine kuz’ , – sanui Ondrii , – nügüd’ kül’mäb ičeze lunipövuta .
– Ei kül’mä , pigai möst paneb lunt i katab sidä , – sanui tat . – A kutak meile valita čoman kuzen ? Kuni ed sorda lunt , ed nägišta , mitte se om .Ala holdu , poigaine , mö pakičem kuzel prostida meid , miše kosketim sidä hödhüvid .
– Ka , necen voim tehta , – ihastui prihaine . – Kuzine , prosti , ala kurktu meiden päle !
– Tarbiž löuta kuz’ , mitte kazvab eriži toižiš puišpäi , – nevoi tat . – Sil oksaižed-ki linneba oiktad kaikiš polišpäi .
– Kacu , sigä om eriži seižui kuz’ , – heikahti Ondrii .
– Ka , nece om čoma , oksikaz . Necile kuzele andam parahiman sijan pertiš .Panem sen vädraha , maha , valaškandem vedel , i se ihastoitaškandeb meid hätkemba .
Ondrii astui hüviš meliš tagaze kodihe , ved’ hö tatanke oliba valičenuded kaikid čomemban kuzen .Paneškanzi lunt , i Ondrijale tuli pähä meletuz , miše lumi katab möst i uinotab heraštoittud kuzižid .
Kut mö kuzen valičim
Veps
New written Veps