Texts
Return to list | edit | delete | Create a new | history | Statistics | ? Help
Tatjana Torvinen. Etnososioligija elämäntyönä
Tatjana Torvinen
Etnososioligija elämäntyönä
Karelian Proper
New written karelian
Uuvven vuuvven
uattona tuli ikävä viesti – Venäjän Tietoakatemijan Karjalan Tietokeškukšen Kielen , kirjallisuon ta istorijan instituutin ruataja , Karjalan etnososiologijan peruštaja , KT :n tietoalan anšijoitunut ruataja Jevgeni Ivanovič Klementjev šiirty tuonilmasih 25.talvikuuta .
Jevgeni Klementjev šynty 8.heinäkuuta 1938 vuotena Mujejärven piirin Ontajärven kyläššä karjalaisešša pereheššä .Vuotena 1967 hiän lopetti Petroskoin valtijonyliopiston istorijallis-filologisen tietokunnan ta šen jälkeh jatko opaššušta Neuvoštoliiton Tietoakatemijan etnografijan instituutin aspirantuurašša .Hänen opaštajina oltih tunnetut etnologijan asientuntijat Julian Bromlei , Mihail Guboglo , Leokardija Drobiževa ta muut .
Klementjev valmisti väitöškirjuah niijen ainehistojen pohjalla , kumpasie hiän oli kerännyn kenttämatojen aikana Karjalan kylissä .Lopetettuo aspirantuuran 1970 vuotena hiän rupesi ruatamah tutkijana Kielen , kirjallisuon ta istorijan instituutissa , a 3.kevätkuuta 1972 hiän puolušti kandidattiväitöškirjan aihiešta ”Sosialini struktuuri ta kanšallini ičetunto (Karjalan ASNT :n ainehistojen pohjalla )”.
Vuuvvešta 1979 Klementjev oli ošallistun väještölašentaohjelmien kehittämiseh Karjalan tašavallan alovehella .Väještönlašentojen välisinä kaušina Jevgeni Ivanovič oli pitän lukusie etnososiologisie tutkimukšie , kumpaset annettih kuva Karjalan kantarahvahien nykytilantehešta , kielitilan erikoisukšista šekä etnisen ičetunnon muuttumisešta .Monie vuosie tutkien näitä kyšymykšie Klementjevistä tuli oikein hyvä Karjalan ta karjalaisien proplemojen tuntija .
Analisoimalla tilaštotietoja , joukkoviestimie ta virallisie dokumenttija hiän luati prognosija , kumpaset hyvin rikeneh toteuvuttih .Hänen tutkimukšien tulokšie oli aina otettu huomijoh tašavallan etno-sosialisen ta etno-demografisen tilantehen käsittelyššä valtijovallan tašolla .Klementjev oli moničči palkittu merkittäväštä panokšešta Karjalan tašavallan yhteiskunta-poliittisien , sosiali-talouvellisien ta etnisien prosessien tutkimiseh .
Jevgeni Ivanovič on jättän meilä šuuren perinnön : noin 250 tutkimuštyötä .Hänen tutkimukšet karjalaisien , vepšäläisien ta šuomelaisien istorijašta Karjalašša XX vuosišualla šekä kielikyšymykšie koškijat kirjutukšet annetah luaja kuva šiitä , mimmosie proplemoja on Karjalan tašavallan kantarahvahilla , kumpaset XX vuosišuan toisen puoliskon aikana on šuatu kokie šuurta venäläiskulttuurin vaikutušta .
Ainehistojen keruušša ta analisoinnissa Jevgeni Ivanovič oli aina hyvin tarkka , huolellini ta peruštehellini .Viimesinä vuosina Klementjev oli pannun šuurie voimie šiih , jotta šuaha sistematisoija kaikki tietoelämäh aikana kerätty ainehisto .Tärkienä työnä hänellä oli bibliografisen luvettelon luatimini , kumpasešša oli tietoja niistä ihmisistä , mit oli äijän ruattu karjalaisien kulttuuri - ta kieliperinnön tutkimisen , šäilyttämisen ta kehittämisen hyväkši .Valitettavašti hiän ei kerinnyn šuaha tätä työtä loppuh .
Etnososioligija elämäntyönä
Karelian Proper
New written karelian