Texts
Return to list | edit | delete | Create a new | history | Statistics | ? Help
Aleksandr Kräkkijev. Histourien jyrkil lainehil
Aleksandr Kräkkijev
Histourien jyrkil lainehil
Livvi
New written Livvic
Syvät
i mieldykiinnittäjät ajatukset läikähtettihes sanoih , sanat tegoh .Tietty dielo , mieros langua löydyy , ku vai kehtuazit kerie .
Yhtelläh kummalline mua on Ven’a , vie enämbi kummakas rahvas .On moine vaikutus , rounoku heijän piälöis on iguine viheldäi , šn’augai läbivedo .Hyö alalleh šarahtellaheze yhtes vieros toizeh .I mi ihmetyttäy , kiinittäy mieldy , joga kerdua hyö koitellah suurdu ihastustu vuotandas ozan uuttu kiännälmysty .Vuotetah , vuotetah , gu Äijiäpäiviä , a iče ollah varavozilleh , buitogu nilakkoillenjiädy myöte šliehkakse väzynyönny venynyöl tuhul .Vuottua jo vois , ollou varua , einehty .Ga igä loppeheze .Pahakse mielekse .Kätty et pane vastah .
Ga sit milbo ylbeilläh da midä varatah rahvas ?
Konzu sotsiolougat alletah tutkie ylbevyön kogomustu , piäkohtua , alguperiä , sit karahtah mieleh kobareh ei ylen mielihisty kyzymysty .Pal’l’astui , Ven’al eläjien ylbevyön algulähtö ei ole nygyaigu , a mennyt – muan i rahmannoin rahvahan omaluaduine histourii , raden’n’urahvahan perindölline hengelline da ainehelline kul’tuuru .
Ei ole kummua , gu nygyine yhteiskunnallistalovehelline kehitys , rahvahalline elos ei ole kebjei , kaččomattah ilmoituksih suurelližuon uskomattomas kazvus , turutandas kovah , yllin-kyllin .Suureh kelloh soitandu loitos kuuluu .
Tozi notkoh vierendäs
lujah typitty .
Toppu silmäs vierahas
nenäh syvitty .
Probliemoin äijyön keskes aktuallizinnu ollah köyhys (Ven’al on 19 miljounua köyhiä ) madalat palkat da eläkkehet , hindoin ounahusnostandat käzis pyzymättäh , ilotoi ruavottomus , tervehyönhoido , hirvei , huigietoi lahjondu , ičenmyöndy (rakkahat vierahah eloh ), yhteiskunnallizen palvelun viäristetty hindupoliitiekku käzis pyzymättäh , rözmäkösti i m .i .
Kulleh nygöi otetah
omal aižal , levval !
Rihmois piästäh , voitetah .
Roža voittu terval .
Eigo ruavottomakse jovvundu ole ainos syngy , kovasydämelline tapahtumu ?Se on tovelline kibu , muailmua teterdäi este , viluvarzi , mil herrat pietäh kuris , kylytetäh kaikelleh rahvastu .Kykkyzilleh , päičet piäs , ohjakset käis .Se on ristikanzan arvuo alendai vägivaldaine ilmivö , orjakse suattamine .Tirpetäh rahvas kai vaivazeh vaččah da harmavutah .Kuni rahkehet ei katketa .Seiny on joga puolel vastah .
Huaveh uhrun ammuine
piästä kynzis pagoh .
Eigo segi sammanne ,
livahtanne ragoh ?
Suurelližuon mielikuva nägyvästi vaihtelou eloisijas kiiniolendas , eloksen tazos .Sanakse , Moskovas , Piiteris eläjil ylbevytty on enämbi pienien paikoin rahvahistoh nähten , kus on tilandeh toizin .Halgi ilmois .
“Piälpäi kokoi čoma kaččuo , aganuo on sydämes .” Sit selväs syys syväin ei täyty ilol .Pitkäs tansus on äijy mutkua .“Yhtes kives ei koskie , yhtes koivus ei kaskie ”. Eihäi Moskovu , Piiteri olla kogo Ven’a .
Pieni lugu rahvastu eletäh Ven’al hyvin .Enimät ollah kurjuon rajal .Eländysijas maksettuu varua jiäy vai leibäh-suolah .Muuh kormani ei käske .Sithäi ei ni himoita pidiä vesseliä , jorottua pajuo da kuluttua suappualoin pl’ašn’as .
Luhistus , hävitystila kovasydämellizenny tovelližuon kuvastajannu .Kurrellizii aidoi bokalleh , kyndämättömii peldotilkuzii , tyhjii liävöi , tyhjii piharakenduksii , puolekse rippujii avvoi olijoi veriälöi .Abieh möllötetäh tyhjät hökkelilöin ikkunat .Ei ni yhty hebuo , lehmiä , poččii , lammastu , kanua .Ga ni ainavo silmy ei nägis tädä ilottomua hylgyeloksen tovelližuttu .Avoi-voi !Igävy nägy !Hierun eloksen seizoi vezi nikui ei tahto virrata .Äijy taloidu puusteni .Milbo voidas ylbeillä tämän hyllätyn hierun keskoveh ?
N’uudui hörö mieleh Karjalan lohkon erähäle sitkeihengizele hierulazele hiiluttua yhty tulehmuo .“Kel pezä , sil kezä ”. Yksingi jumsuttas čikuttas koin (kugali vägie , sigäli higie ), ga “mečoi kuuzen ladvas murginoiččou ”.Kipi kapi agjat vastai tävvytäh .Yheksä priiččua löydyy yhtele jälles , ruadosijan kavottuu sil merkillizel päderäl .
Nägyy vallan jället
tylčän ruavon jälles .
Pidäs tiediä čeri ,
konzu kiehuu veri .
Hyvät tulokset , ylbeillen , kuulutah TV :s , raadivos , ga menetykset vaikkani peittäy muahut .Herroi se šeikku ei huolestuta .Voibi vai kummeksii rahvahan kestävytty da heijän kovua ozua .Onhäi vie olemas vaikkaniolijoi da sanankuulijoi , kedä opastettih painumah tuules .Kyrčistetäh , siivet tukutut , gu matikat katiskas , “puuttumattah pudroloih , tartumattah talkunoih ”.“Hieru kynzilleh , miero varbahuzilleh ” konzu uuzi jälgehtulii vastu , hyvöindellen , rabavuu pyhkimäh .
Rahvas varatah vuajinduuvvistuksien todevuttamistu komieloin purjehvenehien omistajien vesselien “kalazienke ” kannel sobazilleh retseptoin myöte .Ei hengi pala , gu äijy kriizissua matkan varrel on nähty .Kehitysohjelman tavoittehel , gu puul , pidäs olla juuret muas .Melliččy ei pyöri siiriči virduajal kohuajal viel .Toiči kanduogi piet kondiennu , konzu vähilleh ainos pidäy olla varavozilleh .“Vai liemeh palat , maidohgi puhut ”.
“Välttämättömät selgien iellizen eloksen uskalmot ” – ammuine Ven’an perindö , tsuari Nikolai I aijois algajen . Nevvostoliitos havizendu tulies aijas da suavutuksis oli ideolougien i valdivollizen poliitiekan ozannu .Rahvahale moizet čomazet (maidojovet kiisselirannoinke ) ollah , gu mielehiine kyly .Mierole oli sanottu , ku lämmie vaččah valettu , a uskondanke iče tiijät .Se on eloksen tovelližus bauhujan histourien jyrkil lainehil .
Milleh net uskalmot vahnois koiduu :
hos ruadoh tartujan tarkannu
libo ohjavoh vembelel tuovun
meil herrakse – kaglah kurkoinnu ?
En tiijä , ongo helvetti olemas .Gu se ollou , sit kannattas enne kuolendua ihan tozissah reknailla , midä sie olis , i luadie kai , ku et piäzis sinne , hornan kattilah .
Ijän eläjes täl ihalal ilmal , tämän ilmankannen ual , kai tullah vastah .Paha ei kohene , pane hos mezipuččih .Ruadi olizit ruajuh , ga riähkät vietäh uaduh .Iguine igä on aiga pitky aigu muokatakseh muan kamajas .Voi olla elaijan kärzimys on onnuako vähembi sih verraten .Ristikanzas borčuiččou hyvä i paha .Ozakse rahvaskunnal on vällys vallita tahto .
Midä et tiijä , se ei kibevytä .Enimistöhäi eletäh tämän höbläkkösanondan mugah .Sanua on , gu kirjavua kanua .Prostoi jällespäi tostahes .
Muailman probliemu on se , gu houkat ollah varmat omas mieles .Hyö ollah myös , gu vastukavazet oksat .Nimi oigei tiedo ei tuo heile sydämen sykehty omien hairahtuksien täh , hos olis aigu hajustuakseh .Puaksuh vaikkani čuhistah , a oman otetah .Kaivos kaččelijal šlöpöil kaivonsuu on kogo taivas .Net yhteiskundutiipat suajah elätysty , imijen tostu ristikanzua , gu varattavat kägöintäit .Toizen syväimen verdy .
Ga pitkäl haraval pidäs eččie :
kunnontundo , huoli , tagustus ,
sagien mečän viijenden mäin oččah
unohtunnuh viäryön tunnustus .
Viizahis on ebävarmuttu , eččijen alalleh uuttu tieduo , i voijah tunnustua , gu oldaneh viäräs , i korjuamah oma ellendys , pon’a .Hairahtus rinnal kävelöy .
Mielipuolizih ei yksikai suas suuttuo , eihäi niken ole vähämieline natodielo .
Virran jyttyöh vikkely
elaijan on juoksu .
Aigu on , gu väkkeli ,
šläkkäy mutkis puaksuh .
Histourien jyrkil lainehil
Livvi
New written Livvic