Texts
Return to list | edit | delete | Create a new | history | Statistics | ? Help
Klavdija Aleksejeva. Tiedoiniekku
Klavdija Aleksejeva
Tiedoiniekku
Livvi
New written Livvic
Suarnu
Ellettih enne ylen vahnat da köyhät ukko da akku .Tuli ukol mieleh bohattuo .Häi heityi tiedoiniekakse .
Yöl ukko da akku peitettih bohatan mužikan hevon .Mužikku hebuo eččiy , ga nikui ei lövvä .Sit tiedoiniekku sanou hänel :
– Vuota , opin minä tiedoloi .
– Ku voizit löydiä , minä sinul hyvän palkan maksazin ! sanou bohattu .
Keräi köyhy mužikku huavoh nogikegälehty da lähtiettih hyö bohatan mužikan kel juamua myö , hebuo eččimäh .Astuttih , astuttih da mendih kohti heboh .Hevon ižändy ylen äijäl kiitti tiedoiniekkua , andoi hänel den’gua dai jauhuo .Piästih köyhät ukko da akku elämäh .
Sih aigah suari hävitti kuldazen nimikol’čazen .Häi rubei eččimäh tiedoiniekkua , ken vois auttua .Suaril sanotah :
– On moine plieššipiä starikkaine , ylen tiedäi !
Työndi suari troikal starikkastu tuomah .Troiku ajoi karahutti starikan pihah , ga starikku kai pöllästyi , a ku tiijusti , mis on dielo , kaikkineh prostiihes akan kel .Eihäi olluh se starikku ni mi tiedoiniekku , muite vai kielasteli .
Suari sanoi hänel :
– Voinnet löydiä minun kol’čazen , bohatut , a et löydäne – piä poikki .
Pandih starikkastu hyväh pertih tiedoloi opittelemah .Istuu häi päivän , istuu toizen , ga nimidä piäh ei tule , igävy vai on .
– Mindähbo et ni syö , ni juo , kyzytäh hänel suarin käskyläzet , – vai on igävy , vai ristivelli pidäy ?
– Hos olis , ga ei tiel olis , sanou starikku .
Annettih hänele ristivellekse iččehmoizen plieššipiän .Jälgimäzenny päivänny starikal tuskat jo ei synnytä vaččah , häi sanou ičekseh :
– Oh , pliešši , pliešši , jälgimäzii päivii elät kuldazen kol’čazen täh .
Kuuli net sanat hänen ristivelli dai romahtih polvilleh starikkazen edeh :
– Misbo sinä tiijustit , ku kol’čazen minä otin ?
Uvvessah jalgoih kumardih , sanou :
– Eigo vois kui toizin tädä dieluo kiändiä ?
Starikkaine otti hänel kol’čazen , syötti sen kanal , a ku vois se kana tundie , katkai oigies siives sulgazen .
Tuli suari , kyzyy :
– No , lövvitgo kol’čazen ?
– Ga tiijustin , kana on syönnyh sinun kol’čazen .
Työttih kanat pihal , starikkaine kerras tunnusti sen kanan .Tapettih kana da löyttih kol’čaine .
Suari piästi starikkazen kodih da andoi hänele seiččie podvodua syömisty da juomistu .
Tuli starikku kodih , ga akku ylen äijäl ihastui da sanoi :
– Enämbiä vai nikunne ei liikahutettas , ga pädis eliä .
Tiedoiniekku
Livvi
New written Livvic
–
–
–
–
–
–
–
–