Texts
Return to list | edit | delete | Create a new | history | Statistics | ? Help
Mehed L’udmila . Šustrik da tieliikkehen siännöt
Mehed L’udmila
Šustrik da tieliikkehen siännöt
Livvi
New written Livvic
Šustrik-kažinpoigazen Roindupäiväkse
vahnembat lahjoitettih pyörän .Šustrikale moine lahju rodih mieldy myö .Kerran , konzu häi ajeli uvvel pyöräl pihal , hänele vastah puutui vahnu da mielevy Polkan-koiru .
– Azetu , hau-hau-hau ! kirgui Polkan kažinpoigazele .
– N’au ... Mibo rodih ?Mindäh kirrut ?Šustrik heityi pyöräs da ovvostellen kačoi Polkanah .
– A-voi-voi , kažiraukku , etgo sinä tiijä tieliikkehen siändölöi ?
– Mittuzii vie siändölöi ? kummeksi Šustrik .
– Sinä olet ajelii , minä olen kävelii . Sinul pidi enzimäi andua tie minule , muiten voit ähkähtiäkseh kävelijäh .
Kaččomattah sih , ku Šustrik on vie pieni , häi tarkah tiezi , ku kävelijäl suau mennä dorogas poikki vaigu “zebrua ” myö .
– Polkan , täshäi ei ole tien ylityskohtua .
Polkan kačahtihes ymbäri da lekutti händiä .
– Minä puaksuh kävelen linnua myö da tiijän , ku pyörän rul’as pidäy olla kelloine . Sit ajelii vois ilmoittua kävelijöile , ku hyö oldas varavozilleh .Tiijängi , ku pyörälajajal pidäy panna piäle šl’oma da kuvastin , ku mašinan šouferit da kävelijät nähtäs händy pimies .
Šustrik atkalasti lekutti piädy – häi täs nimidä ei tiedänyh .
Sit Polkan kehoitti kažinpoigazele :
– Kuččukkuammo dovariššoi da ruvekkuammo yhtes opastumah tieliikkehen siändölöi !
Kažinpoigazele tämä idei rodih mieldy myö da häi kučui kukkii kanoinke , Hr’un’at’outan , vahnan hanhen , sorzan da kanan - da sorzanpoigazii .
Polkan tervehti kaikkii tulluzii da algoi paginua :
– Minä tiijän , ku linnas eläjes pidäy hyvin tiediä tieliikkehen siännöt .Linnois levielöi pihoi myöte ajau äijy mašinua – taksit , avtoubusat , gruuzumašinat .Ties poikki menöy äijy rahvastugi .Kaikil on kiireh , ga kaikin tietäh tieliikkehen siännöt .
– Sanele , mittuzet ollah net siännöt ! kyzyi Šustrik .
– Kävelijäl enne kaikkie pidäy tiediä , ku mennä ties poikki suau vaigu silloi , konzu svetoforas on vihandu tuli . Konzu menet ties poikki , ei sua kižata , ähkie toizii , juoksendella libo vitkittiä .Ruskien tulen aigah ei sua mennä ties poikki , sendäh ku sil aigua ajetah mašinat .Ga ku ei ole svetoforua , ties poikki suau mennä tien ylityskohtas – “zebras ” poikki .Ties poikki mennes pidäy vuottua , konzu kai mašinat azetutah .Rubiemmogo nygöi ajelemah da kävelemäh tieliikkehen siändölöin mugah meijän pihas ?
– Rubiemmo ! mendih myödäh kai elätit .
Dovarišat piirustettih “zebran ” tiele da ruvettih opastamah toizii siändölöih .Sorzut’outa luadi kolmekulmazen tiemerkin , kuduah oli piirustettu kävelii .Hanhi leikkai pahvis kolme eriväristy kruugastu – ruskien , keldazen , vihandan .Kukkihäi rubei vuoretellen ozuttamah kruugazii , a kävelijät da šouferit liikuttih vai niilöin mugah .
Kukki ozutti ruskien tulen šouferiloile – Šustrik pyöräl da sorzanpoigazet potkulavvoil azetuttih , a kävelijät jo varuamattah astuttih ties poikki .Keldazel tulel kukki ilmoitti , ku pidäy “valmistuo ”.Konzu häi ozutti vihandan tulen , šouferit lähtiettih ajamah , kävelijät – kanat kananpogazienke , Hr’un’a-t’outa – ruvettih vuottamah , konzu Kukki-svetoforu andau “luvan ” mennä ties poikki .
Polkanal oli hyviä mieldy , ku pienet da vahnembat nygöi tietäh tieliikkehen siännöt .Šustrikalehäi vahnembat lahjoitettih šl’oman da heijästimen , kudaman häi kleičči šl’omah .
Šustrik da tieliikkehen siännöt
Livvi
New written Livvic
–
–