Texts
Return to list | edit | delete | Create a new | history | Statistics | ? Help
Ivan Kudel’nikov. Varraskuuričču
Ivan Kudel’nikov
Varraskuuričču
Livvi
New written Livvic
Seiččievuodizennu minä
lähtin školah .Olin ylen varačču da hil’l’aine .Opastuin kudakui .
Enzipäivis minul kadoi kumi .Se oli puuttunuh rinnal istujan Man’a-tyttözen laukkah .Konzu toizet lapset tiijustettih sen , hyö ruvettih riezittämäh Man’ua .Hyö kirruttih :
– Varraskuuričču !Varraskuuričču !
Man’a ruskeni , ruskeni dai pačkahtih itkuh .Kyynälien keskes sanoi , što kumi petties puutui hänen sumkah .
Minul rodih žiäli Man’ua , rubein kieldämäh toizii lapsii :
– Heittäkkiä riezitändy !
A ičele juohtui mieleh , kui minägi kerran odva en puuttunuh varraskuuričakse .
Ennevahnas meijän hierus ylen äijäl varattih varraskuuriččuriäzitändiä .Onnuako konzu olet pieni lapsi da sinul ei ole sidä , midä on toizil lapsil , a sinul himoittau kuitahto suaha moine vešši , sit tulou mieleh , eigo sua näpätä sen toizes talois .Lapsen mieles se ei ole suuri riähky , sendäh ku eihäi sinuu nähtä .Moine kummu oli minunkegi .
Toizen taloin brihaččuzel Mit’a Mitrofanoval oli tuataspäi jiännyh lyhytvardehine labjaine .Mit’a sil kaivoi keväizil ojazii da työndeli virdua myö piendy , kuuzen kojas luajittuu venehytty .Myö , toizet lapset , vai kačoimmo .Oli meilegi labjat , ga niis oldih pitkät varret – paha oli kaivua .En tiijä , kui tuli minule mieleh ajatus varrastua dovarišal tämä labjaine .
Konzu pimeni , minä hil’l’akkazin menin toizen taloilluo , lövvin labjazen (vie päiväl minä primietin , kus Mit’a sidä pidäy ), liččain rindua vaste dai ravieh juoksin kodih .Čökkäin labjazen pordahien alle da ajattelen , kui huomei rubien kaivamah ojastu pienel labjazel .
Huondeksel muamo rubei pyhkimäh pordahii dai sen labjazen dogadi .Tuli pertih da rubei kyzelemäh , kuspäi tämä labjaine joudui pordahien alle ?Toizet lapset (meidy oli yheksä hengie ) oldih vaikkani , sendäh ku hyö nimidä ei tietty .Minul pidi kai sanuo .
Muamo ei nivouse čakannuh minuu .Häi andoi labjazen minule kädeh da käski kerras vediä sen järilleh sinne , kus olin ottanuh .Vie muamo käski sanuo Mit’an vahnembile , što enämbi nikonzu minä en rubie nimidä toizis talolois ottamah kyzymättäh , da vie kyzyö prošken’n’ua .“Ethäi sinä tahto olla varraskuuričannu ”, sanoi muamo .
Käin Mitrofanovielluo .Mit’an vahnembat muhahtettihes da sanottih : “Van’a et tahto olla varrastajannu .”
Kogo ijäkse jäi minule piäh mieli , ku nikonzu minuh näh ei sanota , ku astuu varraskuuričču .
Man’an kel yhtes seiččie vuottu käimmö školah .Händygi ni kerdua enämbiä ei sanottu varraskuuričakse .
Enne vahnembat da lapset hyvin mustettih : varrastus on pahin riähky .Žiäli on , ku sen unohtettih nygöi .
Varraskuuričču
Livvi
New written Livvic
–
–