Texts
Return to list | edit | delete | Create a new | history | Statistics | ? Help
Maria Filatova. Etnine tem om arvos
Maria Filatova
Etnine tem om arvos
Veps
New written Veps
”SMIrotvorec ”-konkurs tehtihe
jo kümnenden kerdan . Täl vodel se praznuiči ičeze jubilejad .Se vedetas Rahvazkeskeižen žurnalistikan gil’dijan tahton mödhe .Gildii radab etnižen joukvestišton hüvüdeks .Konkursan pätegend om tugeta lehtmehid , kudambad kirjutaba Venäman rahvahiden elos , neniden kul’turan da tradicijoiden polhe .Gil’dijan pämez’ Margarita Länge sanui : ””SMIrotvorec ” oli eksperimentaližen projektan , mitte tegihe meiden man media-alovehen palaks .Nece om ozaidanus lahjakahiden lehtmehiden abul , kudambad kehitoitaba etništ temad i nügüd’ media-aloveht ei sa eskai kuvitelda necita temata ”.
Ezmäine konkursan etap ezmäi mäni kaikuččes Venäman regionas .Konkursaha ühtni 15343 lehtmest 54 regionaspäi .Heiden radoišpäi valitihe parahimid i jo kül’mkus finalistad kerazihe Moskvaha .Konkursan päetapale tuli 40 joukvestišton ezitajad .Konkursaha ühtniba lehtmehed Amuraspäi , Dagestanaspäi , Moskvaspäi , Habarovsk - da Pskov-lidnoišpäi , Orenburgaspäi , Iževskaspäi , Vladikavkazaspäi da toižiš Venäman lidnoišpäi da külišpäi .Ühtni konkursaha meidenki redakcii .Galina Baburova oigenzi konkursaha ičeze kirjutesen ”Pit’kha eläškab Karjala uniš ”.
Radod , miččed oigetihe konkursale , oliba ani erazvuiččed .Nene oma sured ciklad rahvahiden kul’turas da keles , starinad melentartuižiš ristituiš da heiden elo-oziš , paginoid azjoiš , miččed oma tärktad keliden kaičendan täht – kaik ned koskiba igähižiden rahvahiden elod da problemoid .
Konkursan päivil Moskvas vedetihe Mediaforum lehtmehiden täht .Sinna tuli enamb 100 lehtmest kogonaižel Venämalpäi .Konkursan ühtnikad mugažo radoiba Mediaforumal .Sigä letihe lujas tärktoid küzundoid , miččed koskeba etništ žurnalistikad .Ozutesikš , pagištihe lehtmehiden ližaopendusen polhe , mugažo siš , kus lehtmehed voiba sada rahatuged .Äjan pagištihe sen polhe , miše federaližiš kanaloiš da lehtesiš vähän pagištas da kirjutadas igähižiden rahvahiden nügüdläižes da enččes elos .Nored mehed ei tekoi kodiröunan kul’turad , ei tekoi kel’t-ki .Mediaforuman aigan taritihe erazvuiččid azjoid , miččed voižiba pätta nenid problemoid .Ozutesikš , taritihe tehta ližaopendusen kursad lehtmehiden täht , sureta paukad lehtmehile , kudambad kirjutaba kahtel kelel – ičeze kodikelel da venäks , paremboita opendust školas da universitetas , kus voiži tehta lehtmehiden openduzčasuid .
”SMIrotvorec ”-konkursan ühtnikoiden täht tehtihe vastusid melentartuižiden ristituidenke . Muga , Moskvan universitetan žurnalistikan fakul’tetan pämez’ Jelena Vartanova vastsihe finalistoidenke i vedi melentartušt paginad nügüdläižes joukvestištos .Pagištihe sen polhe , miše nored mehed kaik paksumba lugeba kirjutesid internetas , hö ei otkoi käzihe lugendlehtesid i harvemba kacuba televizorad .Jose pigai lugendlehtesid , radiopaginoid da televidenijad ei linne ?Vastusel pagištihe sen-ki polhe .
Tärged vastuz mäni Dumas-ki .Konkursan ühtnikad vastsihe Rahvahaližen politikan departamentan pämehenke Vitalii Sučkovanke .Lehtmehed taričiba vastusel erazvuiččid azjoid , miččed voižiba kehitoitta etništ temad da abutada igähižile rahvahile jäda eloho .Pagištihe sen polhe , miše etnine joukvestišt ei voi eläda valdkundan rahatugeta .
”SMIrotvorec ” lopihe praznikaližel koncertal . Čoma ceremonii tehtihe Gelikon-Operas , kus nimitadihe vägestajiden nimed .Galina Baburovan kirjutez om sanu koumanden sijan regionaližiden kompanijoiden keskes ”Kodikeled ”-nominacijas .Nece om sur’ vägestuz da hüvä arvznam meiden ”Kodima ”-lehtesen radole .
Etnine tem om arvos
Veps
New written Veps