Texts
Return to list | edit | delete | Create a new | history | Statistics | ? Help
Maria Košeleva. ”Kukirikku” tervehtoitab teid!
Maria Košeleva
”Kukirikku” tervehtoitab teid!
Veps
New written Veps
Nored
aktivistad ”Periodika ”-paindištospäi kaiken aigan tegeba midä-se ut rahvahiden keliden kaičendan täht .Hö ei väzugoi meletada erazvuiččid melentartuižid projektoid , konkursoid da vastusid , miččed abutaba kaita da popul’arizoida vepsän da karjalan kelid .Ei amu lopiba ”КарелиЯ – это мы ” – konkurs da ”Rada melel ei kelel ”-projekt .Paiči necidä Karjalaižiden , vepsläižiden da suomalaižiden mediakeskuses paksus mäneba mastar’-klassad , kel’navedijoiden vastused , seminarad da äi tošt .
Tal’ven lopus ”Kodima ”-lehtesen toimitajad meletiba völ ühten idejan – tehta muga sanutud Lingvistižen teatran vepsän kelel .Sen tegijad oma Galina Baburova da Irina Sotnikova .Kut sanui Galina , nece ei ole todesine teatr .Sil om vähän erilaine tegend .Teatran vastusile tuleba kaik , kelle om melentartušt vepsän kel’ , ken pagižeb sil .Teatran päidei om siš , miše ozutada ičeze kelen mahtoid scenal .Ühtnikad valičeba miččense tekstan .Se voib olda kut vepsän , muga venän-ki kelel .Sen tekstan mödhe ühtnikad tegeba teatrozutelusen , miččen voib ozutada erazvuiččil azjtegoil da vastusil .Galinan sanoiden mödhe nece om lujas hüvä maht keratas ühtes , pagišta vepsän kelel toine toiženke .Ozutada norile vepsläižile , miše kel’ eläb , miše sil pagištas nügüd’-ki , miše sil voib pagišta nügüd’läižiš azjoiš .Se om lujas tärged niiden üläopenikoiden täht , ked vaiše zavodiba opeta kel’t .Ozutada ristituile sidä , miše om norišt , kudamb tahtoib da mahtab pagišta vepsäks .
Ezmäine teatran vastuz mäni 6.keväz’kud ”Periodika ”-paindištos .Siš ühtnikad tundištoitihe toine toiženke , starinoičiba ičeze polhe .Ezmäižele vastusele tuliba lehtmehed , Paginkluban ühtnikad , baltianmeren-suomalaižiden keliden kafedran üläopenikad .Kaikile tuli mel’he teatran idei .Jogahine jagoihe ičeze idejoil .Ühtnikad toba armhid starinoid , kirjutesid da tekstoid .Lugeba niid rolidme da kändaba niid .
Om melentartušt , miše teatras oma eri-igäižed ristitud i heil oma erazvuiččed kel’mahtod .Kense pagižeb vepsäks laps’aigaspäi , ken-se openzi sidä školas vai universitetas , ken-se vaiše zavodi opeta sidä .No kaiken-se kaik el’gendaba toine tošt .
Kut i kaikuččes azjas , teatran rados mugažo oma erazvuiččed jügedused .Galinan sanoiden mödhe , vepsän kelel ei ol dramad , ei ole pjesoid , miččen voib otta da panda lavale : ”Meile pidab valita tekst , miččenke voib rata , i jo sišpäi kirjutada scenarijad ”.Völ , ozutesikš , norišt tahtoib panda midä-se ilokast , a aigvoččed tahtoiba , miše se oliži sidotud vepsän veroihe , tradicijoihe .
Teatran ühtnikad pit’kha valičiba teatran nimed , oli lujas äi melentartuižid idejoid .No lopuks pättihe nimitada teatran ”Kukirikkuks ”.Nügüd’ vastused pidätas kerdan nedališ koumanz’päivin .Niile voib tulda jogahine tahtnik .
Mö küzuim üläopenikoil , kudambad tuleba teatran vastusile , heiden mel’pidod teatras .
Darja Švecova
(magistraturan 1.voz’kursan openik ):
”Ei amu zavodi rata lingvistine teatr .Kaikile oli melentartušt , kut se radaškandeb , da midä siš tegeškandeba ühtnikad .Ved’ äjile nece om uz’ mahtišt , äjad eziniba scenal vaiše školaigan .Minä meletan , miše lingvistine teatr om hüvä idei .Nece om völ üks’ mahtišt kävutada vepsän kel’t ei vaiše openduzparoil .Nece om uz’ mahtišt da voimuz ozutada ičtaze , sikš minä tahtol ühtnen teatran vastusihe ”.
Jelizaveta Makarova
(3.voz’kursan üläopenik ):
”Minun melen mödhe , lingvistine teatr om unikaline voimuz kehitoitta necen polen Karjalas .Nece idei tuli minei mel’he , sikš minä äkkid pätin ühteta sihe .Minä tahtoin tehta ičeze paindusen neche azjaha , tarita idejoid , abutada .Minai oma tutabad , kudambad kirjutaba starinoid , pjesoid , kudambad tahtoižiba käta niid vepsäks .Meletan , miše se om čoma voimuz kehitoitta lingvistišt teatrad da vepsän kel’t , kul’turad da literaturad ”.
Tatjana Martjanova
(1.voz’kursan üläopenik ):
”Minei tuli mel’he lingvistižen teatran tegendan idei .Minun melen mödhe nece om hüvä , miše vepsläižil mugažo oliži mitte-se sädandaloveh , kus voib todenzoitta eloho ičeze idejoid .Mugažo nece om lujas čoma voimuz kehitoitta vepsän kel’t .Venälaižiden tekstoiden kändmine abutab siš .Minä ühtnen teatran radoho , sikš miše tahtoin hüvin pagišta vepsäks da tundištoittas melentartuižidenke ristituidenke ”.
Mö toivotam teatran ühtnikoile da tegijoile surid satusid , hengen libutandad da voimusid !
”Kukirikku” tervehtoitab teid!
Veps
New written Veps
(
”
(3.
”
(1.
”