Texts
Return to list | edit | delete | Create a new | history | Statistics | ? Help
Ol'ga Mironova. Tehkam mir parembaks!
Ol'ga Mironova
Tehkam mir parembaks!
Veps
New written Veps
Vilukun
25.päiväspäi uhokun 3.päivähasai Karjalas mäni ”Änižjärven desant ”akcii .Akcijan ühtnikad oma üläopenikad Karjalaspäi , Vologdan , Leningradan , Novgorodan , Tomskan agjoišpäi , Komin valdkundaspäi i Piterišpäi .Kaiked akcijaha ühtni 90 mest .Karjalas nece akcii mäni kudes rajonas : Prionežjen , Kondopogan , Suojärven , Medvežjegorskan , Sortavalan rajonoiš .Kaikuččes küläs üläopenikoiden joukud tegiba mastar’-klassoid , abutiba rauhile (vanhoile ) ristituile tehta kodiradoid .
Üläopenikoiden päiväl , 25.vilukud , jouk ”Il’bez ” (sihe mülüi 14 mest ) tuli Kalagehe .Necil päiväl üläopenikad tegiba äi hüvid azjoid openikoiden da eläjiden täht .
Školas openikoiden täht tehtihe erazvuiččid melentartuižid mastar’-klassoid .Tundištoitihe ”Dudling ”-pirdandtehnikaha .Lapsed ezmäižen kerdan tegiba mugoman radon , i se tuli heile mel’he .
Konz lopihe urokad , i openikad läksiba kodihe , ken-se üläopenikoišpäi läksi abutamha rauhale ristitule Jevgenia Stepanovna Mel’nikovale .Hän eläb üksnäze i hänele om jo 91 vot .Üläopenikad kaivoiba lunt sel’gitades tehuzid da toiba vet i haugoid , tegiba miččid-se kodiradoid .Toižed üläopenikad läksiba administracijaha .Sigä oli heittud päčid , i üläopenikad kandišiba jänuzid kirpičuid vereile .Hö tegiba jügedan , no lujas tarbhaižen radon .
Ehtal školas külän eläjiden täht tehtihe koncert .Nored ozutiba teatrozutelusen Karjalan polhe , pajatiba pajoid i vändiba gitaral .Adivoid tervehtoiti ”Pihläine ”-pajosebr vepsän da venän kelil .Üläopenikoile tuli lujas mel’he meiden vepsläine kollektiv .
Jäl’ges koncertad oli diskotek augotižškolan openikoiden täht .A necil aigal vanhembad lapsed üläopenikoidenke vändiba lendmäčvändoho .
Kaikid ihastoiti nece vastuz .Se toi uzid tundištoitusid , hüväd mel’t .Nece om hüvä akcii – abutada rauhile , ezmäi kaiked niile , ked eläba üksnäze .Spasib akcijan sädajile i norile ristituile aktivižes rados , melentartuižiš mastar’-klassoiš i sures abus .
Tehkam mir parembaks!
Veps
New written Veps